అపొస్తు 13 - ମାପୁରୁଦି ସତ୍ ବାକ୍ୟ ପୁନି ନିୟମ୍ବର୍ଣ୍ଣବା ନି ସାଉଲ ପ୍ରେରିତ ସିସୁ ୱାଜା ବାସେ ଆତାର୍ 1 ଆଣ୍ଟିୟକ ମଣ୍ତଲିଦୁ ଏସ ବାବବାଦି ନି ସିକିୟା ଗୁରୁର୍ ମାର୍ହାର୍ । ୱାରି ଲୋଇ ମାର୍ହାନ୍ ବର୍ଣ୍ଣବା, ସିମୋନ ଆମାକାନ୍କି ନିଗର ଦର୍ତାନ୍ ୱେଙ୍ଗିଁତା ମାର୍ହାନ୍, ଲୁସିଅସ୍ କୁରିଣିଦୁ ବାସାନିକାନ୍, ମହନେମ ୱାନ୍ ରାଜିୟ ପାଲ ହେରୋଦତି ଇଲ୍ତୁ ପିରିତାମାର୍ହାନ୍ ମାରି ସାଉଲ । 2 ୱାର୍ ପ୍ରବୁଦି ସେବା ନି ଉପାସ୍ କିନିୱାଲେ, ପବିତ୍ରଆତ୍ମା ୱାରିଙ୍ଗ୍ ଇର୍ହାନ୍, “ନାନ୍ ଏମେ ପାଣି ଉଣ୍ତିଙ୍ଗ୍ ବର୍ଣ୍ଣବା ନି ସାଉଲତିଙ୍ଗ୍ଁ କୁକ୍ତାମାନା, ଆୟାଉଣ୍ତିଙ୍ଗ୍ ୱାରିଙ୍ଗ୍ଁ ନା ଉଣ୍ତିଙ୍ଗ୍ ୱେର୍ଏ କିଦୁ ।” 3 ୱାର୍ ଉପାସ୍ ନି ପାର୍ତନା କିଜି ଆୟା ରିଏରି ମୁସ୍କୁ କିକୁ ଇଡ୍ଜି ୱାରିଙ୍ଗ୍ଁ ପ୍ରଚାରକିନି ପାଣିଦୁ ପୋକ୍ତାର୍ । ସାଇପ୍ରସ୍ତୁ ସେବା ପାଣି 4 ପବିତ୍ର ଆତ୍ମାଦି ମାଣାନ୍ ପକାୟ୍ ଆଜି ବର୍ଣ୍ଣବା ନି ସାଉଲ ସେଲୁକିୟାଦୁ ସର୍ହାର୍ ମାରି ଆବେଟ୍କୁ ଜାହାଜ୍ତାନ୍ ସାଇପ୍ରସ୍ ସାରିବେଡ଼୍ତି ସାମ୍ଦୁର୍ ମାନି ନାଣ୍ମିରି ଇସ୍ରିବୁମି ବାଡିଦୁ ସର୍ହାର୍ । 5 ସାଲାମି ଗାଡ଼୍ତୁ ଇଜି ଜିହୁଦିର୍ ପାର୍ତନାକିନି ଇଲ୍କାଙ୍ଗ୍ ମାପୁରୁଦି ବାକ୍ୟ ପ୍ରଚାର୍ କିତାର୍ । ଜୋହନ ମାର୍କ ୱାରିୱାଲେ ମାନ୍ଜି ସାହାଜ୍ୟ କିଜିମାର୍ହାନ୍ । 6 ୱାର୍ ସାଇପ୍ରସ୍ ଇସ୍ରିବୁମି ବାଡି ଜିଣାଜି ପାଫଦୁ ସର୍ହାର୍ । ଆବେ ୱାର୍ ବାର-ଜିସୁ ଦର୍ତି ଅରେନ୍ ଜିହୁଦି ଗୁଣୁଏଙ୍ଗ୍ଁ ବେଟ୍ବୁଡ଼ାତାର୍ । ୱାନ୍ ନିଜେଦିଙ୍ଗ୍ଁ ବାବବାଦି ଇଜିମାର୍ଆନ୍ । 7 ୱାନ୍ ଆୟା ଦ୍ୱିପଦି ସାସନ୍କିନି ସର୍ଗିୟସ୍ ପାଉଲ୍ତି ଅରେନ୍ ନେଗି ତଡ଼୍ ମାର୍ହାନ୍ । ସର୍ଗିୟସ୍ ଅରେନ୍ ବୁଦିମାନି ଲୋକୁ ମାର୍ହାନ୍ । ୱାନ୍ ମାପୁରୁଦି ବାକ୍ୟ ୱେନ୍ଡ୍ରେଙ୍ଗ୍ ବଦାକିଜି ବର୍ଣ୍ଣବା ନି ସାଉଲତିଙ୍ଗ୍ଁ କୁକିସ୍ତାନ୍ । 8 ମାତର୍ ଗୁଣିଆ ଏଲିମାସ ଇକା ୱାନି ଗ୍ରିକ୍ ଦରୁ ୱାରିଙ୍ଗ୍ ବାଦା ସିତାନ୍, ଇରିଙ୍ଗ୍ଁ ୱାନ୍ ସାସନ୍କିନିୱାନିଙ୍ଗ୍ଁ କ୍ରିସ୍ତଦି ବିସ୍ବାସ୍ ଉଣ୍ତିଙ୍ଗ୍ଁ ୱେର୍ଏ କିଜି ଇଡ୍ଦେଙ୍ଗ୍ଁ ବଦା କିଜିମାର୍ହାନ୍ । 9 ମାତର୍ ସାଉଲ ଆମାୱାନି ଆଇ ଦରୁ ପାଉଲ ପବିତ୍ର ଆତ୍ମାଦୁ ପୁରାଆଜି ଗୁଣିଆ ତରିନ୍ ସିଦା କାଣ୍କାଣୁକୁ ସୁଡ଼ୁଜି ଇର୍ହାନ୍, 10 “ଏ ସୟତାନ୍ତି ମାରିସି ! ନିନ୍ ୱିଜୁ ନେଗି ବିସୟତି ସାତ୍ରୁ ! ନିନ୍ ୱିଜୁ ବିସୟତି ସାଲାକିଦୁ ପୁରାଆତିକିନ୍ଦା ମାରି ୱିଜୁଦିନ୍ ପ୍ରବୁଦି ସତ୍ତିଙ୍ଗ୍ ମିଚ୍ ଇଜି ଇନ୍ଡ୍ରେଙ୍ଗ୍ ଇଜି ସେସ୍ଟା କିଜିନି । 11 ଇଲେଇ ନିନ୍ ପ୍ରବୁଦି କିୟୁଦୁ ଦଣ୍ଡ୍ ପୟ୍ନି । ନିନ୍ କାଣା ଆଜି ଏସ ସମୟ ସାନ୍ଦି ୱେଡ଼େରି ଜାୟ୍ ସୁଡ଼୍ଦେଙ୍ଗ୍ ଆଟ୍ଇ ।” ଆୟାଦାପ୍ରେ ଏଲିମାସଦି କାଣୁକୁ ନାଣ୍ତ ଦୁରିଦୁ କେର୍ବିନି ୱାଜା ଆନିକା ୱାନ୍ ଅଡ଼୍ବିତାନ୍ ମାରି ୱାନି କିୟୁ ଆସ୍ସି ସାରି ତର୍ସି ଅତେଙ୍ଗ୍ଁ ଇଜି ଅରେନ୍ୱାନିଙ୍ଗ୍ ପୟ୍ଦେଙ୍ଗ୍ ଆସ୍ତାନ୍ । 12 ଇୟା ଗଟ୍ନା ସୁଡ଼୍ଜି ସାସନକିନିୱାନି ବିସ୍ବାସ୍ ଆତାତ୍, ଇରିଙ୍ଗ୍ ୱାନ୍ ପ୍ରବୁଦି ସିକିୟା ୱେନ୍ଜି କାବାଆତା ମାର୍ହାନ୍ । ପିସିଦିଆଦି ଆଣ୍ଟିୟକିଆଦୁ ସେବା ପାଣି 13 ପାଉଲ ନି ୱାନି ସାଙ୍ଗର୍ ପାଫଦାନ୍ ଗାଡାନାସି ପାମ୍ଫିଲିଆଦି ପର୍ଗା ଦର୍ତି ଉନ୍ଣ୍ତ୍ରି ଗାଡ଼୍ତୁ ଇତାର୍ । ଜୋହନ ମାର୍କ ୱାରିଙ୍ଗ୍ ଇୟାବାନୁ ଡ଼ିସ୍ସି ଜିରୁସାଲାମ୍ତୁ ଡ଼େସିସର୍ହାନ୍ । 14 ୱାର୍ ପର୍ଗାଦାନ୍ ସଲ୍ସି ପିସିଦିଆଦି ଆଣ୍ଟିୟକଦୁ ଇତାର୍ ମାରି ରମ୍ନିଦିନ୍ ପାର୍ତନା ଇଲୁଦୁ ସଲ୍ସି ବାସ୍ତାର୍ । 15 ମାରି ମସାଦି ନିୟମ୍ ମାରି ବାବବାଦିରି ମାଣାନ୍ ରାସ୍ତିକା ପଡ଼ାତି ୱେନ୍କା, ପାର୍ତନା ଇଲ୍ତି ପେରିକାର୍ ୱାରି ଲାକ୍ତୁ ଇୟା ମାଟା ଇଜି ପକ୍ତାର୍, “ତଡ଼ାନ୍କୁ, ଜଦି ଲୋକାଙ୍ଗ୍ ୱେଡ଼ିକାକିନି ୱାଜା ମି ଇନି ଉପଦେସ୍ ସିନିକା ମାନାତ୍, ଆର୍ତିଙ୍ଗ୍ଁ ଇନ୍ଡ୍ରୁ ।” 16 ପାଉଲ ନିଲ୍ଜି ଲୋକାଙ୍ଗ୍ ଆଲେଜ ମାନ୍ଡ଼୍ରେଙ୍ଗ୍ ଇଜି କିୟୁ ଜୁଟ୍ସି ଇର୍ହାନ୍ : ଉଣ୍ତାତିମାନି ଇସ୍ରାଏଲ୍ତି ତଡ଼ାନ୍କୁ ନି ମାପୁରୁଙ୍ଗ୍ଁ ପାର୍ତାନା କିଜିମାନି ଅଣଜିହୁଦିର୍, ନା ମାଟା ୱେନ୍ଡ୍ରୁ ! 17 ଇସ୍ରାଏଲ୍ ଲୋକା ମାପୁରୁ ମା ଡକାରାଦାଦାରିଙ୍ଗ୍ଁ ବାସେକିତାନ୍ ମାରି ମିସର୍ତୁ ୱାର୍ ଆଇ ଦେସ୍ତିକାର୍ ୱାଜା ବାସାଜି ମାର୍ହି ସମୟତୁ ଉନ୍ଣ୍ତ୍ରି ପେରି କୁଟୁମ୍ତୁ ମିସା କିତାର୍ । ମାପୁରୁ ୱାନି କାବାଆନି ସାକ୍ତିଦାନ୍ ୱାରିଙ୍ଗ୍ଁ ମିସରତାନ୍ ସପ୍ସି ତାତାନ୍, 18 ମାରି ସାଲିସ୍ ବାର୍ସେକ୍ ସାନ୍ଦି ମରୁବୁମିଦୁ ୱାରି ତାଗ୍ଇ ତାନିଙ୍ଗ୍ ସାସ୍ କିତାନ୍ । 19 ମାରି, ୱାନ୍ କିଣାନ୍ ଦେସ୍ତୁ ସାତଗୋଟା କୁଟୁମ୍ତିଙ୍ଗ୍ ଦଂସ କିଜି ବାସେକିତି ଲୋକାଙ୍ଗ୍ ଆୟା ଦେସ୍ ସିତାନ୍ । 20 ପୁରା ସାରିସ ପଚାସ୍ ବାର୍ସେକ୍ ଲୋଇ ଇୟାୱିଜୁ ଗଟନା ଗଟାତାମାର୍ହାତ୍ । ଇୟା ୱେନ୍କା ସାମୁଏଲ୍ ବାବବାଦିଦି ସମୟ ସାନ୍ଦି ମାପୁରୁ ୱାରି ମୁସ୍କୁ ବିସାର୍ କିନିୱାରିଙ୍ଗ୍ ଆସ୍କିତାନ୍ । 21 ଏସ୍ତିୱାଲେ ୱାର୍ ଅରେନ୍ ରାଜାଦିଙ୍ଗ୍ ବଦା କିତାର୍, ମାପୁରୁ ୱାରି ମୁସ୍କୁ ସାଲିସ୍ ବାର୍ସେକ୍ ସାନ୍ଦି ସାସନ୍ କିନି ଉଣ୍ତିଙ୍ଗ୍ଁ ବିନ୍ୟାମିନ୍ କୁଟୁମ୍ତି କିଶତି ମାରିସି ସାଉଲତିଙ୍ଗ୍ଁ ଆସ୍କିତାନ୍ । 22 ତାନିୱେନ୍କା ମାପୁରୁ ୱାନିଙ୍ଗ୍ ରାଜାଗାଦିଦାନ୍ ସପ୍ସି ଦାଉଦତିଙ୍ଗ୍ଁ ୱାରି ରାଜା କିତାନ୍ । ମାପୁରୁ ୱାନି ବିସୟ୍ତାନ୍ ସାକିୟ୍ ଇର୍ହାମାର୍ହାନ୍, ନାନ୍ ଏମେନାନି ଲୋକାଙ୍ଗଁ ଜିବନ୍ନନା, ଜେସିଦି ମାରିସି ଦାଉଦ ଆୟାନାନି ଅରେନ୍; ୱାନ୍ ନା ବଦାଦାନ୍ ୱିଜୁ ପାଣି କିନାନ୍ । 23 ଇୟା ଦାଉଦ କୁଟୁମ୍ତି ଜିସୁଙ୍ଗୁଁ ମାପୁରୁ ୱାନି ପାର୍ମାଣ୍ ଇସାବ୍ତାନ୍ ଇସ୍ରାଏଲ୍ ଜାତିଦି ରକିୟାକର୍ତ୍ତା କିତାମାନାନ୍ । 24 ଜିସୁ ୱାନି ପାଣି ଆରାମ୍ କିନି ଆଗ୍ଡ଼ିରାନ୍ ଜୋହନ ଇସ୍ରାଏଲ୍ତି ୱିଜୁ ଲୋକା ଲାକ୍ତୁ ପ୍ରଚାର୍ କିଜି ଇର୍ହାନ୍, ୱାରିଙ୍ଗ୍ଁ ପାପ୍ତାନ୍ ମନ୍ ଡ଼େପ୍ସି ଡୁବନ୍ ଅନିକା ମାନାତ୍ । 25 ମାରି ଜୋହନ ୱାନି ସେବା ପାଣି ସେସ୍ କିନି ଆଗ୍ଡ଼ି ଲୋକାଙ୍ଗ୍ ୱେନ୍ବାତାନ୍, ନା ବିସୟ୍ତାନ୍ ମି ଅଡ଼୍ବିନିକା ଇନିକା ? ମିର୍ ଆମାୱାନିଙ୍ଗ୍ଁ କାପ୍କିଜିନିଦେର୍, ନାନ୍ ଆକାନ୍ ଆଏ । ମାତର୍ ୱେନ୍ଡ୍ରୁ ! ନା ୱେନ୍କା ଏନ୍ ୱାଜିନାନ୍, ନାନ୍ ୱାନି ପାଦାମ୍ତି ଜୁତେଙ୍ଗ୍ତି ଗାଟି କୁତ୍ତେଙ୍ଗ୍ ବା ନାନ୍ ଜଗ୍ ସିଲେ । 26 “ଅବ୍ରାହାମ କୁଟୁମ୍ତି ଏ ଇସ୍ରାଏଲ୍ ତଡ଼ାନ୍କୁ ମାରି ମାପୁରୁଙ୍ଗ୍ଁ ପାର୍ତାନା କିଜିମାନି ଇବେମାନି ଅଣଜିହୁଦି ଲୋକୁ, ମାଙ୍ଗିଁ ନେ ଇୟା ପରିତ୍ରାଣଦି ମାଟା ସିଆୟ୍ ଆତାମାନାତ୍ । 27 ମାତର୍ ୱାନ୍ ରକିୟାକର୍ତ୍ତା, ଜିରୁସାଲାମ୍ତୁ ତେବାଜି ମାନିକାର୍ ମାରି ୱାରି ନେତାର୍ ଆକା ନେସ୍ଏର୍ ମାର୍ହାର୍ । ୱାର୍ ୱିଜୁ ରମ୍ନିଦିନ୍ତୁ ପଡ଼ାଜି ମାନି ବାବବାଦିରି ମାଟାଦି ଅର୍ତ ବୁଜାଏଜି ମାର୍ହାର୍ । ଆରିଙ୍ଗ୍ଁବା ଜିସୁଙ୍ଗୁଁ ଦୋସ୍ କିଜି ୱାର୍ ବାବବାଦିରି ବାକ୍ୟଦିଙ୍ଗ୍ଁ ପୁରା କିତାର୍ । 28 ସାନିଦଣ୍ତତି ଇନି ନିନ୍ଦାଦି ମାଟା ପୟ୍ଏନ୍ଣ୍ତା ବା ୱାନିଙ୍ଗ୍ଁ ସାନିଦଣ୍ତ୍ ସିଦେଙ୍ଗ୍ ଇଜି ୱାର୍ ପିଲାତ୍ ରାଜେଙ୍ଗ୍ଁ ଇର୍ହାର୍ । 29 ୱାନି ବିସୟ୍ତାନ୍ ଦାର୍ମୁସାସ୍ତ୍ରଦୁ ଏମେ ୱିଜୁ ବିସୟ୍ ରାସାତାମାନାତ୍, ଆୟାଇସାବ୍ତାନ୍ ୱିଜୁ ପାଣିକିତି ୱେନ୍କା ୱାର୍ ୱାନିଙ୍ଗ୍ କ୍ରୁସଦାନ୍ ରେପ୍ସି ତାସି ଉନ୍ଡ୍ରି ଦୁକିଗୁଟାଦୁ ଇଟ୍ତାର୍ । 30 ମାତର୍ ମାପୁରୁ ୱାନିଙ୍ଗ୍ଁ ସାତିମାଣାନ୍ ନିକ୍ତାନ୍, 31 ନାଣ୍ତ ଦିନ୍ ସାନ୍ଦି ୱାନି ୱାଲେ ଗାଲିଲିଦାନ୍ ଜିରୁସାଲାମ୍ତୁ ସନି ୱାନିକା ଆଜିମାନି ଲୋକାଙ୍ଗ୍ ୱାନ୍ ତରାୟ୍ଆତାନ୍ । ଇଲେଇ ୱାର୍ ଇସ୍ରାଏଲ୍ ଲୋକା ଲାକ୍ତୁ ୱାନି ସାକି । 32 ମାରି, ମାପୁରୁ ମା ଡକ୍ରାଦାଦାରିମାନୁ କିତି ପାର୍ମାଣ୍ ବିସୟ୍ତାନ୍ ମାପ୍ ମିଙ୍ଗିଁ ଇୟା ନେଗିକାବୁର ୱେର୍ସିନାପ୍, 33 ମାପୁରୁ ଜିସୁଙ୍ଗୁଁ ନିକ୍ସି ୱାରି ମାରିସି ଜେ ମାଡ୍, ମା ଉଣ୍ତିଙ୍ଗ୍ଁ ଆୟା ପାର୍ମାଣ୍ ପୁରାକିତାମାନାନ୍, ଏଣ୍ତେସ୍ ଗିତ ସଂହିତାଦି ମାରିଉନ୍ଡ୍ରି ପାଟାଦୁ ଇୟା ମାଟାଦିଙ୍ଗ୍ ୱେର୍ସି ରାସାତାମାନାତ୍, “ନିନ୍ ନା ମାରିନ୍, ନେର୍ ନାନ୍ ମି ବୁବା ଆତାମାନା ।” 34 ମାରି ଦୁକିଦୁ ସାବ୍ଦେଙ୍ଗ୍ଁ ଡ଼ିସ୍ଏନ୍ଣ୍ତା ୱାନିଙ୍ଗ୍ଁ ସାତିମାଣାନ୍ ନିକ୍ତେଙ୍ଗ୍ଁ ଇଜି ମାପୁରୁ ଇୟା ମାଟା ଇର୍ହାମାର୍ହାନ୍; ଦାଉଦତିଙ୍ଗ୍ଁ ସିତିମାନି ପାର୍ମାଣ୍ ଇସାବ୍ତାନ୍ ନାନ୍ ନିଙ୍ଗିଁ ପବିତ୍ର ନି ସତ୍ତି ଆସିର୍ବାଦ୍ ଦାନ ସିନା । 35 ସାସ୍ତ୍ରଦୁ ମାରି ଉଣ୍ତ୍ରି ବାଡିଦୁ ରାସାତାମାନାତ୍, ନିନ୍ ନିଜେଦି ବିସ୍ବାସ୍ତାନ୍ ସେବାକିନିୱାନିଙ୍ଗ୍ ଦୁକିଦୁ ସାବ୍ଦେଙ୍ଗ୍ଁ ଡ଼ିସ୍ସୋ ସିଇ । 36 ଦାଉଦ ୱାନି ସାସନ୍ କିନିୱାଲେ ମାପୁରୁଦି ବଦା ପୁରାକିଜି ସାରାସାରି ସାତାନ୍ ମାରି ଡକ୍ରାଦାଦ୍ସିୱାଲେ ମୁସାୟ୍ଆତାନ୍ । ୱାନି ମେନ୍ଧଲ୍ ଦୁକିଦୁ ସାବିତାତ୍ । 37 ମାତର୍ ମାପୁରୁ ଆମାୱାନିଙ୍ଗ୍ଁ ସାତିମାଣାନ୍ ନିକ୍ତାନ୍, ୱାନ୍ ସାବ୍ଏନ୍ । 38 ମାରି, ଏ ତଡ଼ାନ୍କୁ, ମିର୍ ଇକା ନେସ୍ତୁ ଜେ, କେବଲ ମୋସାଦି ମାଣାନ୍ ମି ଲାକ୍ତୁ ପାପ୍ କେମାଦି ସୁସମାଚାର୍ ପ୍ରଚାର୍ ଆଜିନାତ୍, 39 ମାରି, ମସାଦି ନିୟମ୍ତାନ୍ ଏମେ ୱିଜୁ ବିସୟ୍ତାନ୍ ମିର୍ ମୁକ୍ଡ଼ାଜି ଦାର୍ମୁ ଲୋକୁ ଆଦେଙ୍ଗ୍ ଆଟ୍ଇତିଦେର୍, ବିସ୍ବାସ୍କିନି ୱିଜେରେ ଲୋକୁ ଜିସୁଦି ମାଣାନ୍ ଆୟାୱିଜୁ ବିସୟ୍ତାନ୍ ମୁକ୍ଡ଼ାଜି ଦାର୍ମୁ ଲୋକୁ ଆଦେଙ୍ଗ୍ଁ ଆଟ୍ନାନ୍ । 40 ଜାଗାର୍ତା, ବାବବାଦିର୍ ଆମାକା ଇର୍ହାମାନାର୍, ଆକା ଏଣ୍ତେସ୍ ମି ଉଣ୍ତିଙ୍ଗ୍ଁ ଗଟାଏତ୍ । 41 ଏ ମାନାଇଲୋକ୍ ! ମିର୍ କଲବଲ୍ ଆଜି ସାଦୁ ! ଇରିଙ୍ଗ୍ ନାନ୍ ନେର୍ ଏମେ ପାଣି କିଜିନା, ଏନ୍ ଆକା ବୁଜା କିଜି ସିତିଙ୍ଗ୍ ବା ମିର୍ ବିସ୍ବାସ୍ କିଇଦେର୍ । 42 ପାଉଲ ନି ବର୍ଣ୍ଣବା ପାର୍ତନା ଇଲୁ ଡ଼ିସ୍ସି ସନିୱାଲେ, ମାରିଉନ୍ଣ୍ତ୍ରି ରମ୍ନିଦିନ୍ ଡ଼େସିୱାଜି ଇୟାୱିଜୁ ବିସୟ୍ତାନ୍ ମାରି ନାଣ୍ତ ବୁଜାକିଦେଙ୍ଗ୍ଁ ଇଜି ୱାରିଙ୍ଗ୍ଁ ଲୋକୁ କୁକ୍ତାର୍ । 43 ଲୋକୁ ମିଟିଙ୍ଗ୍ଁ ଡ଼ିସ୍ସି ସର୍ହି ୱେନ୍କା ନାଣ୍ତ ଜିହୁଦି ନି ଜିହୁଦି ଦର୍ମଦି ଲୋକୁ ଅଣଜିହୁଦିର୍ ପାଉଲ ନି ବର୍ଣ୍ଣବାଦି ୱାଲେ ସର୍ହାର୍, ସିସୁର୍ ୱାରିୱାଲେ ମିସାଜି ମାପୁରୁଦି ଦୟାଦାନ୍ ଜିବନ୍ କାଟେ କିଦେଙ୍ଗ୍ ୱାରିଙ୍ଗ୍ଁ ୱେଡ଼ିକା ସିତାର୍ । 44 ୱେନ୍କାରି ରମ୍ନି ଦିନ୍ତୁ ଗାଡ଼୍ତି ୱିଜେରେ ପ୍ରବୁଦି ବାକ୍ୟ ୱେନ୍ଡ୍ରେଙ୍ଗ୍ଁ ଇଜି ଉଣ୍ତାତାର୍ । 45 ଲୋକୁଗହଲି ସୁଡ଼୍ଜି ଜିହୁଦିର୍ ରିସାଆତାର୍ ମାରି ପାଉଲତି ମାଟାଦୁ ଜିଦ୍ କିଜି ୱାନିଙ୍ଗ୍ଁ ନିନ୍ଦା କିତାର୍ । 46 ମାତର୍ ପାଉଲ ନି ବର୍ଣ୍ଣବା ମାରି ନାଣ୍ତ ଆଟ୍ୱାଦାନ୍ ଇର୍ହାର୍, ମି ଲାକ୍ତୁ ପାର୍ତୁମ୍ ମାପୁରୁଦି ବାକ୍ୟ ପ୍ରଚାର୍ ଆନିକାମାର୍ହାତ୍ । ମାତର୍ ମିର୍ ଏସାଙ୍ଗ୍ୱିଜ୍ଇ ଜିବନ୍ ପୟ୍ଦେଙ୍ଗ୍ଁ ଇଜି ନିଜେଦିଙ୍ଗ୍ଁ ଜଗ୍ ସିଲିକା ଅଡ଼୍ବିଜି ତେନିଙ୍ଗ୍ଁ ବିସାର୍ କିତିମାନିଙ୍ଗ୍ଁ, ମାପ୍ ମିଙ୍ଗିଁ ଡ଼ିସ୍ସି ଅଣଜିହୁଦିରି ମାନୁ ସନାପ୍ । 47 ଇରିଙ୍ଗ୍ଁ ପ୍ରବୁ ମାଙ୍ଗିଁ ଇୟା ମାଟା ସିତାମାନାନ୍ : ନାନ୍ ମିଙ୍ଗିଁ ଅଣଜିହୁଦିରି ଉଣ୍ତିଙ୍ଗ୍ଁ ଜାୟ୍ ୱାଜା କିତାମାନା, ଏଣ୍ତେସ୍ ୱିଜୁ ଦୁନିଆ ରକିୟା ପୟ୍ନାତ୍ । 48 ଅଣଜିହୁଦିର୍ ଇକା ୱେନ୍ଜି ୱେଡ଼ିକା ଆତାର୍ ମାରି ପ୍ରବୁଦି ମାଟା ଉଣ୍ତିଙ୍ଗ୍ଁ ଦନ୍ୟବାଦ୍ ସିତାର୍ । ଏମେକାର୍ ଏସାଙ୍ଗ୍ୱିଜ୍ଇ ଜିବନ୍ ଉଣ୍ତିଙ୍ଗ୍ଁ ବାସେଆତାମାର୍ହାର୍, ୱାର୍ ଆୟା ମାଟାଦୁ ବିସ୍ବାସ୍ କିତାର୍ । 49 ଆୟା ରାଜିଦି ୱିଜୁ ବାଡିଦୁ ପ୍ରବୁଦି ବାକ୍ୟ ୱେଙ୍ଗିଁତାତ୍ । 50 ମାତର୍ ଜିହୁଦିର୍ ଗାଡ଼୍ତି ପେରି ଲୋକାଙ୍ଗ୍ ୱେରିସ୍କିଜି ପାଉଲ ନି ବର୍ଣ୍ଣବାଦି ମୁସ୍କୁ କାସ୍ଟୁ ସିଦେଙ୍ଗ୍ ଆସ୍ତାର୍ ମାରି ଆୟା ରାଜିଦାନ୍ ୱାରିଙ୍ଗ୍ଁ ସପ୍ତା ପେରିତାର୍ । 51 ପ୍ରେରିତ ସିସୁର୍ ଆୟା ଲୋକା ବିରଦ୍ତାନ୍ ୱାରି ପାଦାମ୍ତି ଦୁଡ଼ି ସାଡ଼୍ସି ସିଜି ଇକନିୟାଦୁ ସର୍ହାର୍ । 52 ଆଣ୍ଟିୟକଦି ବିସ୍ବାସିର୍ ପବିତ୍ର ଆତ୍ମା ନି ୱେଡ଼ିକାଦୁ ପୁରା ଆତାର୍ । |
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020