Zn 20 - Nouvo Testaman dan Kreol Morisien

Tonbo vid

¹ Premie zour lasemenn, boner gramatin kan ti ankor fer nwar, Marie Madlenn al dan tonbo e li konstate ki ros ki ti devan lantre tonbo, finn avanse.

² Lerla li galoupe, li al get Simon Pier e lot disip ki Zezi ti kontan la e li dir zot, “Zot finn kokin Lesegner dan tonbo e nou pa kone kot zot finn al met li.”

³ Lerla Pier ek lot disip la sorti pou al dan tonbo.

⁴ Toulede galoupe ale me lot disip la galoup pli vit ki Pier e li ariv avan li dan tonbo.

⁵ Li bese pou gete e li trouv bann bandaz an lin anba me li pa rantre.

⁶ Ler Simon Pier, ki ti pe vinn deryer li, arive, li rant dan tonbo e li trouv bann bandaz an lin.

⁷ Linz ki ti servi pou rekouver so latet, ti nepli avek bann bandaz me finn anroule apar dan enn lot plas.

⁸ Apre sa, lot disip ki finn ariv premie dan tonbo, rantre li osi. Ler li trouve, li krwar.

⁹ Tou sa letan la, zot pa finn konpran ki li ti bizin resisite parmi bann mor parey kouma finn ekrir dan liv.

¹⁰ Apre sa, bann disip la retourn kot zot.

Zezi zwenn Marie Madlenn

¹¹ Marie ti pe asize deor, pre ar tonbo e li ti pe plore. Letan li ti pe plore, li bese pou get dan tonbo.

¹² Li trouv de anz abiye anblan ki ti pe asize; zot ti la, kot ti met lekor Zezi, enn kot latet, lot kot lipie.

¹³ Zot dir, “Fam, ki fer to pe plore?” Li dir zot, “Zot finn kokin mo Segner e mo pa kone kot zot finn al met li.”

¹⁴ Letan li finn fini dir sa, li vir deryer e li trouv Zezi ki ti pe debout, me li pa ti rekonet li.

¹⁵ Zezi dir li, “Fam, ki fer to pe plore? Kisannla to pe rode?” Li ti krwar zardinie e li dir, “Misie, si twa ki finn pran li, dir mwa kot to finn met li, mo pou al sers li.”

¹⁶ Zezi dir, “Marie.” Marie vire e dir an Ebre, “Rabouni!” (Seki vedir Met).

¹⁷ Zezi dir, “Pa tous mwa, parski mo pankor mont kot mo Papa. Al kot mo bann frer e dir zot, ‘Mo pe al kot mo Papa ek zot Papa, kot mo Bondie ek zot Bondie.’ ”

¹⁸ Marie Madlenn sorti e al anons bann disip, “Mo finn trouv Lesegner!” E li rakont zot seki Zezi finn dir.

Zezi aparet devan so disip

¹⁹ Aswar premie zour lasemenn, bann disip ti ansam dan enn lakaz. Zot inn met lakle dan laport parski zot ti gagn per bann Zwif. Zezi vini, li debout devan zot e li dir, “Shalom”.

²⁰ Kan li fini salye zot, li montre zot so lame ek so kot. Bann disip ti dan enn gran lazwa kan zot finn trouv Lesegner.

²¹ Zezi dir zot ankor, “Lape avek zot; parey kouma mo Papa finn avoy mwa, mo osi mo avoy zot.”

²² Apre sa, Zezi soufle lor zot e dir zot, “Ala Lespri Sin.

²³ Si zot pardonn pese dimoun, pese la pou pardone, si zot tini pese dimoun, pese la pou tini.”

Zezi ek Toma

²⁴ Toma, enn parmi Ledouz, (so nom gate Didim, ki vedir Zimo), pa ti avek zot kan Zezi ti vini.

²⁵ Bann lezot disip inn dir li, “Nou finn trouv Lesegner.” Me li dir zot, “Si mo pa trouv ar mo lizie bann mark koulou dan so lame, si mo pa met mo ledwa dan so ple e si mo pa met mo lame dan so kot, mo pa pou krwar.”

²⁶ Wit zour apre, bann disip ti ansam dan lakaz e Toma ti avek zot. Ti ena lakle dan laport e Zezi vini, li debout devan zot e li dir, “Shalom.”

²⁷ Apre li dir ar Toma, “Met to le dwa isi, ala mo lame; pran to lame, met li dan mo kot. Pa doute me krwar.”

²⁸ Toma dir, “Mo Segner, mo Bondie.”

²⁹ Zezi dir, “Akoz to trouve, to finn krwar? Bienere seki krwar san trouve.”

Kifer finn ekrir sa liv la?

³⁰ Zezi finn fer devan so bann disip boukou lot sign ki pa finn ekrir dan sa liv la.

³¹ Tousala finn ekrir pouki zot krwar ki Zezi-mem Lekris, Garson Bondie e pouki bann seki krwar gagn lavi par so nom.