Revelasion 9 - Nouvo Testaman dan Kreol Morisien

¹ Alor, sinkiem anz la ti soufle so tronpet; mo ti trouv enn zetwal sorti dan lesiel tom lor later. Zot ti donn anz la lakle pwi-san-fon.

² Zetwal la ti ouver pwi-san-fon e depi sa pwi la enn lafime parey kouma lafime gran fourno ti sorti. Soley ek latmosfer ti vinn nwar avek sa lafime la.

³ Enn kantite sotrel ti sorti dan lafime la e vinn lor later; zot ti gagn pouvwar parey kouma pouvwar bann skorpion lor later.

⁴ Finn dir zot pa detrir bann lerb ni okenn verdir ou zarb lor later. Zot ena drwa detrir selman bann dimoun ki pena sele Bondie lor zot fron.

⁵ Zot ena drwa tortir zot pandan sink mwa, me pa touy zot. Douler sa tortir la li parey kouma douler kan enn skorpion pik enn dimoun.

⁶ E dan sa lepok la dimoun ti pou rod lamor me pa pou trouv li; zot pou souete mor, me lamor pou refiz koste.

⁷ Bann sotrel ti parey kouma bann seval bien ekipe pou konba; lor zot latet ti ena koumadir dis kouronn an-or e zot figir ti parey kouma figir dimoun.

⁸ Zot seve parey kouma seve bann madam, e zot ledan parey kouma ledan bann lion;

⁹ e zot ti ena enn lakok lasie kouma enn kwiras lor zot e son zot lezel parey kouma saryo ki ti pe tire par seval ki ti pe al dan lager.

¹⁰ Zot ti ena lake avek pikir kouma bann skorpion. Zot pouvwar pou bles dimoun pandan sink mwa ti trouv dan zot lake.

¹¹ Kouma lerwa, zot ti ena enn anz destrikter; an Ebre ti apel zot Abadon e an Grek Apolyon.

¹² Premie maler ti pase. Ena ankor de lezot pou vini.

¹³ Apre siziem anz soufle so tronpet, lerla mo tann enn lavwa sorti kot sa kat kwin lotel devan Bondie,

¹⁴ li ti dir sa siziem anz ki ti ena tronpet la, “Larg sa kat anz ki ti ansene kot larivier Efrat.”

¹⁵ Alor, kat anz la finn libere. Zot ti finn fini pre pou ler, zour, mwa ek lane pou touy enn tier limanite.

¹⁶ Mo tann dir ti ena de san milion solda avek zot seval.

¹⁷ Ala kouma mo ti trouv zot dan mo vizion: bann solda ti met kwiras kouler dife, ble safir ek zonn disouf; latet bann seval parey kouma latet lion e dan zot lagel dife, lafime ek souf ti pe sorti.

¹⁸ Enn tier limanite ti mor avek sa trwa fleo la; dife, lafime ek souf ki sorti dan lagel bann seval.

¹⁹ Pouvwar bann seval sorti dan zot lagel ek dan zot lake; zot lake parey kouma serpan, zot ti ena latet ki zot ti servi pou bles lezot.

²⁰ E sa parti limanite ki ti reste, zot pa ti mor par sa bann fleo la; zot pa ti repanti e regret bann travay ki zot ti pe fer ar zot laenn e zot ti kontigne ador diab ek bann idol an-or, an-arzan, an bronz, an ros ek an dibwa ki pa kapav ni trouve, ni tande, ni marse.

²¹ Sa bann zans la, pa ti repanti pou zot bann krim, mazik, pou zot bann aksion imoral ek zot bann vol.