Revelasion 8 - Nouvo Testaman dan Kreol Morisien

Setiem sele

¹ Letan Annyo ouver setiem sele, ti ena silans dan lesiel pou apepre enn demi-er.

² E mo trouv set anz pe dibout devan Bondie, e finn donn zot set tronpet.

³ Enn lot anz avek enn lansanswar an-or ti vinn dibout devan lotel; zot ti donn li enn bon kantite lansan pou li ofer ansam avek lapriyer tou bann pep Bondie lor lotel an-or divan tronn.

⁴ Lafime lansan ki sorti depi lame anz la, ti monte devan Bondie ansam ar lapriyer pep Bondie.

⁵ Apre anz la pran lansanswar, li ranpli li ar dife ki sorti lor lotel e li anvway sa lor later; e ti ena kout toner, loraz, zekler ek tranblemandeter.

Bann tronpet

⁶ Sa set anz avek zot tronpet la, prepar zot pou soufle.

⁷ Premie anz la ti soufle so tronpet, lerla lagrel ek dife melanze avek disan ti tom lor later. Enn tier lemonn ti brile, enn tier bann zarb ti brile e enn tier lerb ver ti brile.

⁸ Deziem anz la soufle so tronpet. Enn zafer koumadir enn montagn dife ti tom dan lamer,

⁹ e enn tier lamer vinn disan, enn tier bann kreatir vivan dan lamer mor, e enn tier bann bato ti detrir.

¹⁰ Trwaziem anz soufle so tronpet e enn gro zetwal ti tom depi lesiel. Zetwal la brile koumadir enn tors e li tom lor enn tier bann larivier ek lor lasours delo.

¹¹ Zetwal la ti apel Absint. Enn tier delo ti vinn amere boukou dimoun ti mor akoz delo la ti telman amer.

¹² Katriem anz ti soufle so tronpet e enn tier soley, lalinn ek bann zetwal ti afekte. Zot ti vinn som e lanwit kouma lizour ti perdi enn tier so klarte.

¹³ Apre sa mo gete e mo tann enn leg pe anvole bien ot dan lezer; li ti pe kriye avek enn lavwa for, “Maler, maler, maler pou zot, abitan later, letan sa trwa lezot anz pou soufle zot tronpet!”