Revelasion 6 - Nouvo Testaman dan Kreol Morisien

Set sele

¹ Lerla mo ti trouv Annyo ouver enn sa set sele la, e mo tann enn parmi sa kat kreatir vivan la kriye ar lavwa loraz, “Vini”.

² Mo gete e mo trouv enn seval blan. Dimoun ki ti pe mont li la, ti ena enn ark; zot ti donn li enn kouronn; lerla li ale kouma enn vinker pou gagn ankor laviktwar.

³ Ler li ouver deziem sele, mo tann deziem kreatir vivan kriye, “Vini!”

⁴ Lerla enn lot seval rouz vif sorti; dimoun ki ti pe mont li la, ti gagn permision pou fer retir lape lor later, koumsa dimoun pou masakre zot kamarad. Zot ti donn li enn gran lepe.

⁵ Ler li ti ouver trwaziem sele, mo tann trwaziem kreatir vivan kriye, “Vini!” Mo gete e mo trouv enn seval nwar; dimoun ki ti mont li la ena enn balans dan so lame.

⁶ Mo tann koumadir enn lavwa sorti kot sa kat kreatir vivan la; li ti dir, “Enn mezir dible pou enn denie e trwa mezir lorz pou enn denie, kanta delwil ek divin, pa touse.”

⁷ Ler li ouver katriem sele, mo tann katriem kreatir vivan kriye, “Vini!”

⁸ Mo gete e mo trouv enn seval ver pal. Dimoun ki ti pe mont li la apel Lamor, e Ades ti pe swiv li. Ti donn zot lotorite lor enn kar later, pou touy avek lepe, lafaminn, lepidemi e par bann zanimo sovaz.

⁹ Ler li ti ouver sinkiem sele, mo trouv anba lotel, nam bann ki ti finn masakre akoz parol Bondie ek temwagnaz ki zot ti finn done.

¹⁰ Zot ti kriye bien for, “Segner tomem Met ki sin ek veritab. Komie letan li pou pran pou ziz bann abitan later e pran to revans pou nou disan ki finn verse?”

¹¹ Alor sakenn ti gagn enn rob blan e ti dimann zot pou pran ankor pasians ziska ki konplet lalis zot bann kamarad serviter ki pou perdi lavi kouma zot.

¹² Ler li ti ouver siziem sele, mo gete e ti ena enn gran tranblemandeter; soley ti vinn nwar koumadir linz dey, e laplenn linn ti vinn kouma disan.

¹³ Zetwal dan lesiel tom lor later parey kouma fri fig ver, ki finn gagn bate dan tanpet.

¹⁴ Lesiel disparet tigit-tigit kouma enn tapi ki pe anroule; tou bann montagn ek bann zil ti deplase kot zot ti ete.

¹⁵ Bann lerwa later, bann dimoun inportan, bann zeneral, bann ris, bann pwisan, tou dimoun, esklav ek dimoun lib, kasiet dan bann kavern ek dan lagrot lor montagn.

¹⁶ Zot dir ar montagn ek ros, “Tom lor nou, kasiet nou lwin ar sa dimoun ki pe asiz lor tronn la, e lwin ar lakoler Annyo.

¹⁷ Parski gran zour zot koler finn arive, e kisannla pou kapav reziste?”