Revelasion 5 - Nouvo Testaman dan Kreol Morisien

Liv sele avek kat sele

¹ Dan lame drwat sa kikenn ki ti pe asiz lor tronn la, mo ti trouv enn liv dan form enn roulo lor ki ti finn ekrir de kote; li ti ferme avek set sele.

² E mo ti trouv enn anz pwisan ki ti proklame avek enn lavwa for, “Kisannla ki kapav kas sa bann sele la e ouver liv la?”

³ Me personn dan lesiel ni lor later ou anba later pena pouvwar pou ouver liv pou gete ki ena ladan.

⁴ E mo finn bien plore parski personn pa ti dign pou ouver liv la pou get ladan.

⁵ Lerla enn parmi bann ansien ti dir mwa, “Pa plore! Ala, lion tribi Zida, desandan David ki finn ranport laviktwar; li kapav kas sa set sele la, e ouver liv la.”

⁶ Lerla mo trouv enn Annyo pe diboute ant tronn ek kat kreatir vivan. Li ti parmi bann ansien koumadir finn sakrifie li. Li ti ena set korn ek set lizie, set lespri Bondie ki ti finn anvwaye partou lor later.

⁷ Li ti ale e ti pran roulo ki ti dan lame sa dimoun ki ti pe asiz lor tronn.

⁸ Ler ki fini resevwar roulo la, sa kat kreatir vivan ek sa vennkat ansien la prostern devan Annyo la; sakenn ti ena enn laarp ek enn bann koup dore ranpli ar parfin ki ti reprezant lapriyer bann krwayan.

⁹ Zot sant enn nouvo kantik: “To merit pran liv la e kas so bann sele parski zot finn touy twa, e avek to disan, to finn raste pou Bondie, dimoun tousort tribi, langaz, pei ek nasion.

¹⁰ To finn fer zot vinn enn rwayom ek enn bann pret pou Bondie, e zot pou regne lor later.”

¹¹ Mo ti get ankor e mo ti tann lavwa enn kantite anz otour tronn e otour bann kreatir vivan e bann ansien. Zot ti la par milie e par milion.

¹² Zot ti pe dir bien for. “Annyo imole to dign pou resevwar pouvwar, rises, lasazes ek lafors, loner, laglwar ek louanz!”

¹³ Mo tann osi bann kreatir dan lesiel ek lor later, anba later ek dan lamer, kreatir liniver antie pe sante: “Pou sa kikenn ki pe asiz lor tronn e pou Annyo la louanz, loner, laglwar, ek pwisans, pou touzour ek touzour!”

¹⁴ Sa kat kreatir vivan la ti dir, “Amen!” Lerla bann ansien tom azenou pou adore.