Revelasion 21 - Nouvo Testaman dan Kreol Morisien

Nouvo Zerizalem

¹ Apre sa mo ti trouv enn nouvo lesiel ek enn nouvo later; ofet premie lesiel ek premie later ti disparet e lamer nepli ti existe.

² E mo ti trouv lavil sin, nouvo Zerizalem, sorti kot Bondie e desann depi lesiel. Li ti bien abiye parey kouma nouvel-marye pe atann so bieneme.

³ E mo tann enn lavwa for depi tronn ki pe dir, “Asterla, lakaz Bondie li omilie so pep! Li pou res avek zot e li pou vinn zot Bondie.

⁴ Li pou souy tou zot larm. Pa pou ena ni lamor, ni dey, ni lamantasion, ni douler. Tousa parski vie lemonn finn disparet.”

⁵ Seki ti asiz lor tronn dir, “Mo pe fer tou kitsoz nef!” Apre li dir, “Ekrir sa, parski sa bann parol la zot sir ek vre.”

⁶ Lerla li ti dir mwa, “Fini asterla! Momem Alfa ek Omega, komansman ek lafin. Dimoun ki gagn swaf, mo pou donn zot delo lasours lavi ki pa pou kout zot nanye.

⁷ Dimoun ki gagn laviktwar pou resevwar sa don la, e mo pou vinn so Bondie e li pou vinn mo zanfan.

⁸ Me bann las, bann infidel, bann deprave, bann asasin, bann ki viv lavi imoral, bann mazisien, bann ki ador zimaz, ek tou bann manter, zot plas pou dan basin dife ek souf; samem deziem lamor.”

Nouvo Zerizalem

⁹ Apre sa, enn parmi sa set anz ki ti ena set koup ranpli ar set dernie fleo, vini e li dir mwa, “Vini, mo pou montre twa fianse la, limem ki pou marye avek Annyo.”

¹⁰ Lerla, Lespri Bondie vinn dan mwa e li sarye mwa lor enn montagn bien ot, e li montre mwa lavil sin Zerizalem ki sorti kot Bondie pe desann depi lesiel.

¹¹ Laglwar Bondie ekler lavil la e li briye parey kouma enn pier presiez transparan ki resanble diaman.

¹² Lavil la ti ena bann gran miray bien ot avek douz laport. Douz anz ti pe gardien bann laport e lor sak laport ti ekrir nom douz tribi Izrael.

¹³ Dan sak kote lavil ti ena trwa laport: trwa dan les, trwa dan lenor, trwa dan lesid e trwa dan lwes.

¹⁴ E miray lavil la ti ena douz fondasion, e lor sak fondasion ti ena nom douz apot Annyo Bondie.

¹⁵ Anz ki ti pe koz ar mwa ti ena enn golet an-or pou mizir lavil ek so bann laport ek miray.

¹⁶ Lavil la ti kare. So longer ek so larzer parey. Li mizir li avek so golet; ti ena douz mil stad.

¹⁷ Apre li ti osi mizir miray lavil ki ti ena san karann-kat bras.

¹⁸ Miray la ti konstrir ar pier presiez e lavil lamem ti fer avek lor pir, transparan parey kouma kristal.

¹⁹ Fondasion miray lavil la ti orne ar bann pier presiez; premie avek zasp, deziem avek safir, trwaziem avek agat, katriem avek emrod,

²⁰ sinkiem avek onix, siziem avek kornalinn, setiem avek krizolit, witiem avek beril, neviem avek topaz, diziem avek krisopraz, onziem avek yasint, douziem avek ametis.

²¹ Sa douz laport la, zot ti osi douz perl e sak laport ti fer avek enn sel perl. Laplas lavil ti an-or pir, kler kouma kristal.

²² E mo pa ti trouv okenn tanp dan lavil parski tanp lavil ti Segner Bondie Toupwisan ek Annyo.

²³ Lavil la pa ti bizin soley ouswa lalinn pou ekler li. Laglwar Bondie so lalimier e Annyo Bondie so flanbo.

²⁴ Tou bann nasion pou mars dapre so lalimier; e bann lerwa later pou amenn zot laglwar.

²⁵ So bann laport zame pa pou ferme dan lazourne e pa pou ena lanwit laba.

²⁶ Lamem zot pou amenn tou laglwar ek loner bann lepep.

²⁷ Me okenn inpirte pa pou rant dan lavil la, ni personn ki pratik abominasion ou mansonz, me zis dimoun ki so nom finn ekrir dan liv lavi Annyo.