Revelasion 20 - Nouvo Testaman dan Kreol Morisien

Mil banane

¹ Lerla mo trouv enn anz vini ki sorti dan lesiel. Dan so lame ena lakle pwi-san-fon ek enn gro lasenn lour.

² Li trap dragon, samem sa vie serpan la, limem diab ek Satan, e li atas zot ar lasenn pou mil an.

³ Li zet dragon la dan pwi-san-fon, li ferm li akle, met sele, pouki li pa sedwir bann pep ankor ziska lafin sa mil an la. Apre sa, zot pou bizin larg li pou enn tigit letan.

⁴ Lerla mo trouv bann tronn, e bann ki ti pe asiz lor sa bann tronn la ti ena lotorite pou zize. Mo ti trouv osi nam bann dimoun ki zot latet ti koupe akoz zot temwagnaz lor Zezi ek parol Bondie. Zot pa ti ador Bebet ni so zimaz e zot pa ti resevwar so mark lor zot fron ou zot lame. Zot ti regagn lavi e zot ti regne avek Kris pandan mil an.

⁵ (Lezot mor pa ti regagn lavi avan lafin sa mil an.) Sa ti premie rezireksion.

⁶ Bann ki ti partaz sa premie rezireksion la, zot ti vremem ere ek sin. Deziem lamor pena okenn pouvwar lor zot. Zot pou vinn pret pou Bondie ek Kris, e zot pou regn avek li pandan mil an.

Laviktwar final

⁷ Alafin sa mil an la, Satan pou libere dan prizon,

⁸ e li pou sorti pou sedwir bann nasion dan kat kwin later, Gog ek Magog. Li pou rasanble zot pou lager; zot pou osi nonbre ki lagrin disab dan lamer.

⁹ Zot ti rant partou lor later e zot anvayir landrwa kot bann pep Bondie ti viv e zot ti rant dan site bieneme. Me enn dife sorti depi lesiel e ti devor zot.

¹⁰ Lerla zot ti zet Satan, ki ti sedwir tou dimoun, dan landrwa kot dife ek souf ti pe brile; samem landrwa la kot zot ti zet bebet ek fos profet. Lanwit-lizour zot pou tourmante pou touzour.

Dernie zizman

¹¹ Apre mo trouv enn gran tronn blan avek enn kikenn asiz lor la. Later ek lesiel disparet devan li e personn pa trouv zot ankor.

¹² Lerla mo trouv bann mor, bann tipti kouma bann gran pe debout devan tronn e zot ouver enn bann liv. Enn lot liv ki apel liv lavi ti osi ouver e bann mor ti zize dapre seki zot ti fer, dan manier ki finn ekrir dan bann liv la.

¹³ Lamer ti retourn tou bann mor ki li ti kontenir; lamor ek Ades ti retourn bann kadav, e sakenn ti zize dapre seki li ti fer.

¹⁴ Apre ti zet lamor ek Ades dan basin dife. Basin dife, samem deziem lamor.

¹⁵ Dimoun ki so nom pa ti ekrir dan liv lavi, ti zet li dan basin dife.