Revelasion 2 - Nouvo Testaman dan Kreol Morisien

Mesaz pou legliz dan Efez

¹ Let ki finn ekrir pou anz legliz dan Efez: “Ala deklarasion sa kikenn ki tini set zetwal dan so lame drwat e ki mars omilie set lalanp an-or.

² Mo konn tou seki to finn fer, mo konn to lapenn, to pasians ek landirans. Mo kone ki to pa siport bann move dimoun. To finn teste bann ki deklar zot apot e to finn dekouver ki zot bann manter.

³ To ena boukou pasians, to finn soufer akoz mwa e to pa finn dekouraze.

⁴ Ala seki mo ena kont twa: to nepli kontan mwa parey kouma dan komansman.

⁵ Rapel bien kot to finn sorti pou tom la, sanz to konportman e azir parey kouma to ti abitie fer dan komansman. Si to pa sanz twa, mo pou vinn tir to sandelie dan so plas.

⁶ Pourtan to ena kitsoz bon dan twa. Parey kouma mwa, to deteste konportman bann Nikolait.

⁷ Seki ena zorey, ekout bien seki Lespri ena pou dir bann legliz! Mo pou akord bann ki finn ranport laviktwar drwa pou manz fri zarb lavi ki trouv dan zardin Bondie.”

Mesaz pou legliz dan Smirn

⁸ Let ki finn ekrir pou anz dan legliz Smirn: “Sa kikenn ki premie ek dernie ki ti finn mor e ki finn resisite deklare:

⁹ Mo konn to leprev ek to lamizer, me anrealite to ris! Mo konn bann dimal ki zot dir lor twa. Zot fer krwar, zot Zwif, me pa ditou, zot plito enn sinagog Satan.

¹⁰ Pa per si zot pou bizin soufer. Diab pou bon tant zot e pou met plizir parmi zot dan prizon pou dis zour. Res touzour fidel ziska lamor e mo pou rekonpans zot.

¹¹ Si zot ena zorey ekout seki Lespri ena pou dir bann legliz. Seki ranport laviktwar lor diab pa pou konn deziem lamor.”

Mesaz pou legliz dan Pergam

¹² Let ki finn ekrir pou anz dan legliz Pergam: “Sa kikenn ki ena lepe ki koup de kote deklare:

¹³ Mo kone kot to abite; la akot tronn Satan ete. Me to finn tini ferm ar mwa e to pa finn renie to lafwa, mem dan letan Antipas mo temwin fidel ki ti trouv lamor kot zot, la akot Satan abite.

¹⁴ Me mo ena enn ti repros pou fer twa: to ena kot twa enn bann dimoun ki ankor atase ar doktrinn Balam ki ti insit Balak pou met enn piez pou blok bann Izraelit. Li ti pous zot pou manz laviann ki finn ofer kouma sakrifis pou bann idol e pou fer prostitision.

¹⁵ Kot twa osi ena ki ankor atase avek lansegnman bann Nikolait.

¹⁶ Alor sanz to lavi sinon mo pou desann kot twa pou konbat zot avek lepe mo labous.

¹⁷ Si zot ena zorey, ekout seki Lespri ena pou dir bann legliz! Seki gagn laviktwar, mo pou donn li lamann ki dan sekre. Mo pou donn li enn ros blan avek enn nouvo nom ekrir lor la. Personn pa konn sa nouvo nom la, exsepte sa dimoun ki resevwar li.”

Mesaz pou legliz dan Tiatir

¹⁸ Let ki finn ekrir pou anz dan legliz Tiatir: “Ala seki garson Bondie ki ena lizie kouma enn laflam dife ek lipie parey kouma bronz ki finn bien poli deklare.

¹⁹ Mo konn tou to travay, to lamour, to lafwa, to servis ek to landirans. Mo kone ki to ankor pli aktif ki avan.

²⁰ Me mo ena enn repros pou fer twa. To toler Zezabel ki apel limem enn profet, ki pe ansegne e ki pe detourn mo bann serviter pou pratik imoralite ek manz manze ki finn ofer kouma sakrifis pou bann idol.

²¹ Mo ti donn li letan pou repanti, me li ti refize e kontign prostitie li.

²² Fer atansion, mo pou zet li lor enn lili douler e so bann partner osi, mo pou tret zot parey si zot pa sanz zot konportman.

²³ Mo pou touy to bann zanfan. Tou bann legliz pou kone ki mo enn kikenn ki konn bann panse ek lespri tou dimoun. Mo pou tret sakenn zot dapre seki zot merite.

²⁴ Me pou leres dimoun dan Tiatir ki pa finn atas zot ar sa bann fos doktrinn la, e ki pa finn aprann swadizan profonder lansegnman Satan, mo dir sa bann dimoun la ki mo pa pou met lor zot okenn lezot fardo,

²⁵ me seki zot ena gard li bien ziska mo vini.

²⁶ Dimoun ki gagn laviktwar e ki fer mo volonte ziska lafin, mo pou donn li pouvwar lor tou bann nasion.

²⁷ Li pou diriz zot avek enn baton lasie; li pou kas zot parey kouma enn po later.

²⁸ Parey kouma mo finn resevwar pouvwar ek mo Papa, mo pou donn li zetwal ki leve avan lizour.

²⁹ Dimoun ki ena zorey, ekoute pou tande seki Lespri pe dir bann legliz.”