Revelasion 15 - Nouvo Testaman dan Kreol Morisien

Bann anz ek bann dernie fleo

¹ Apre sa mo trouv enn lot gran sign etonan dan lesiel: set anz avek set fleo, zotmem dernie parmi bann dernie fleo. Ofet atraver zot, lakoler Bondie pou ariv so pwin final.

² E mo ti trouv koumadir enn lamer kristal melanze avek dife. Tou bann ki ti finn gagn laviktwar lor bebet la, so zimaz ek nimero so nom, ti dibout lor borlamer kristal avek dan zot lame enn bann laarp ki Bondie ti donn zot.

³ E zot ti sant kantik Moiz, serviter Bondie ek kantik Annyo: “Segner Bondie Toupwisan, to travay li gran, li enn mervey! Lerwa bann nasion, to sime li drwat, li vre!

⁴ Segner, kisannla pou oze mank twa respe, e refiz glorifie to nom? Parski to tousel ki sin, tou bann nasion pou vinn kot twa pou ador twa, parski to finn montre ki to ziz avek drwatir.”

⁵ Apre sa mo ti trouv tanp kot ti ena tabernak temwagnaz ouver dan lesiel,

⁶ e set anz avek set fleo sorti. Zot ti abiye dan enn rob an lin bien blan avek bann sang otour zot lerin.

⁷ Enn parmi sa kat kreatir vivan la donn sa set anz la, set koup an-or plin ar lakoler Bondie, ki viv pou touzour.

⁸ Tanp ti ranpli ar lafime. Sa li enn sign laglwar ek pwisans Bondie. Personn pa ti kapav rant dan tanp ziska finision travay sa set anz ek zot set fleo.