Mt 3 - Nouvo Testaman dan Kreol Morisien

Predikasion Zan Batis

¹ Sa mem lepok la, Zan Batis ti pe proklame dan dezer Zide.

² Li ti pe dir, “Sanz zot leker, Rwayom Bondie finn aprose.”

³ Profet Izai finn koz lor Zan e li finn dir: ‘Enn lavwa ape kriye dan dezer: prepar sime Lesegner, ouver enn sime kler pou li.’

⁴ Zan ti met enn linz pwal samo ek enn sang lapo dan so lerin. Li ti manz sotrel ek dimiel sovaz.

⁵ Dimoun Zerizalem, tou Zide ek rezion larivier Zourdin ti vinn kot Zan.

⁶ Li ti batiz zot letan zot ti pe konfes zot pese anpiblik.

⁷ Ler li trouv enn kantite Farizien ek Sadisein vinn kot li pou pran batem, li dir zot, “Bann espes serpan, kisannla finn dir zot ki zot pou kapav evit lakoler Bondie.?

⁸ Prodwir bon fri ki montre ki zot finn sanz zot leker.

⁹ Pa nek dir dan zotmem, ‘Abraam nou papa!’ Parski les mo dir zot ki avek sa bann ros la, Bondie kapav fer bann desandan Abraam leve.

¹⁰ Asterlamem laserp finn fini pare pou koup bann pie depi zot rasinn. Tou bann pie ki pa raport bon fri pou koupe zet dan dife.

¹¹ Mwa, mo pe batiz zot dan dilo pou zot repanti. Me Sa-Enn ki pe vini apre mwa, li pli for ki mwa; mo pa ase bon, pou mo kourbe devan li pou larg so sandalet.

¹² Li, li pou batiz zot ar Lespri Sin ek dife. Ena enn gro fours dan so lame pou separ lagrin dible ek lapay. Lagrin dible, li ramas dan stor, lapay, li bril li dan dife ki zame pou tegn.”

Zezi resevwar batem

¹³ Letan Zezi sorti Galile, li al dan Zourdin, pou resevwar batem ar Zan.

¹⁴ Zan ti refiz li, e li dir, “Mwa ki bizin resevwar batem ar twa.”

¹⁵ Zezi reponn li, “Les ale asterla, parski koumsamem ki nou pou akonpli lazistis Bondie.”

¹⁶ Alor Zan aksepte. Zis kouma Zezi fini batize, li sorti dan dilo; lesiel fann an-de e Lespri Sin parey kouma enn kolonb desann lor li.

¹⁷ Enn lavwa dan lesiel dir, “limem mo Garson ki mo bien kontan; li donn mwa boukou lazwa.”