Mt 28 - Nouvo Testaman dan Kreol Morisien

Rezireksion Zezi

¹ Lelandime saba, premie zour lasemenn, kan soley pe leve, Marie-Madlenn ek lot Marie al kot tonbo.

² Enn sel kout ti ena enn gran tranblemandeter parski enn anz Lesegner ki ti desann depi lesiel, ti pous sa gro ros la e li ti asiz lor la.

³ Li ti kouma enn zekler e so linz ti blan kouma lanez.

⁴ Bann gard ti telman per ki zot koumans tranble e zot ti vinn parey kouma dimoun mor.

⁵ Anz la dir bann madam la, “Pa gagn per. Mo kone ki zot pe rod Zezi, limem ki bann la finn krisifie;

⁶ li nepli la, li finn resisite parey kouma li finn dir. Rantre, gete kot ti met so lekor.

⁷ Degaze al dir so bann disip, ‘Li finn resisite parmi bann mor e li pe atann zot Galile.’ Zot pou trouv li laba. Ala seki mo ti ena pou dir zot.”

⁸ Zot sorti toutswit dan tonbo leker ranpli ar lafreyer e zot ti dan enn gran lazwa anmemtan. Zot galoupe pou al anons sa nouvel la bann disip.

⁹ Ala ki Zezi vinn devan zot e li dir zot, “Shalom.” Zot koste ar li, zot atrap so lipie e zot ador li.

¹⁰ Zezi dir zot, “Pa gagn per; al dir mo bann frer ek mo bann ser, al Galile; laba zot pou trouv mwa.”

Zistwar bann gard

¹¹ Letan bann fam la ti pe ale lor sime, detrwa gard retourn dan lavil e rakont bann sef pret tou seki finn pase.

¹² Bann sef pret la ek bann ansien tom dakor pou donn enn gro som lamone bann gard la,

¹³ e dir zot, “Zot bizin dir ki bann disip sa boug la finn vinn kokin so lekor dan lanwit letan zot ti pe dormi.

¹⁴ Si gouverner aprann sa, nou pou kapav konvink li pouki zot pa gagn problem.”

¹⁵ Bann gard pran larzan la e fer exakteman dapre bann instriksion ki zot finn gagne. Koumsamem sa zistwar la finn fane parmi bann Zwif ziska zordi.

Zezi paret devan so bann disip

¹⁶ Onz disip Zezi al Galile, lor kolinn kot li finn donn zot randevou.

¹⁷ Letan bann la trouv li, zot ador li me enn-de parmi zot ti ankor pe doute.

¹⁸ Zezi vinn pre ar zot e dir zot, “Finn donn mwa tou pouvwar dan lesiel ek lor later,

¹⁹ Al dan tou bann pep ki ena e fer zot vinn mo bann disip; batiz zot lor nom mo Papa, lor nom so Garson e lor nom Lespri Sin.

²⁰ Montre zot met anpratik tou seki mo finn komann zot. Pa bliye, mo avek zot toulezour ziska lafin-dimonn.”