Mt 25 - Nouvo Testaman dan Kreol Morisien

Parabol dis fidoner

¹ “Alor rwayom lesiel pou parey kouma zistwar sa dis zennfi ki pran zot lalanp pou al zwenn nouvo marye.

² Sink ladan ti insousian, e sink ti bien saz.

³ Ler bann insousian la pran zot lalanp, zot pa pran ase delwil avek zot;

⁴ me bann saz la ti pran plizir flakon delwil anplis pou zot lalanp.

⁵ Nouvo marye tarde pou arive; bann zennfi la koumans kaskou e zot gagn somey.

⁶ Ler minwi sone, kikenn kriye: ‘Gete! Ala nouvo marye! Sorti pou al zwenn li!’

⁷ Alor, bann fidoner leve e koumans prepar zot lalanp.

⁸ Bann insousian la dimann bann seki bien saz la: ‘Fer nou gagn inpe delwil ar zot, parski nou lalanp pe tegn.’

⁹ Bann saz la reponn: ‘Non, li pa posib, parski pa pou ena ase pou nou e pou zot. Pli fasil zot al laboutik e aste inpe delwil pou zotmem.’

¹⁰ Bann insousian la al aste delwil; zis dan sa lerla, nouvo marye arive. Sa sink zennfi ki ti pare la rant ansam avek nouvo marye dan lasal e bann la met lakle dan laport.

¹¹ Plitar, sa sink insousian la arive, e zot kriye: ‘Misie, misie, ouver laport!’

¹² Me li reponn zot: ‘Laverite, mo dir zot, mo pa konn zot.’ ”

¹³ Zezi kontigne, li dir: “Pran kont, parski zot pa konn ni zour, ni ler.”

Parabol bann talan

¹⁴ “Rwayom lesiel parey kouma enn dimoun ki pe al anvwayaz, li apel so bann serviter pou konfie zot so dibien.

¹⁵ Li donn enn sink talan, enn lot de talan e enn lot enn sel talan, sakenn dapre so kapasite, lerla li ale.

¹⁶ Serviter ki ti resevwar sink talan la, vitvit li finn al fer komers avek sa larzan la e sa finn raport li ankor sink talan.

¹⁷ Serviter ki ti resevwar de talan la fer parey li osi, e li gagn ankor de talan.

¹⁸ Me seki ti resevwar enn sel talan la, li fouy enn trou dan later e li kasiet larzan so patron.

¹⁹ Enn bon letan apre, zot patron retourne e li koumans regle so kont ar zot.

²⁰ Seki ti resevwar sink talan la aprose e prezant so patron sa sink talan ki li ti finn gagne anplis, e li dir li: ‘Met, ou finn donn mwa sink talan, ala mo finn gagn ankor sink.’

²¹ So met dir li: ‘To finn bien fer, bon serviter fidel. To finn fidel pou enn ti zafer, mo pou met twa ansarz pli gran zafer ankor. Vinn partaz lazwa to met.’

²² Serviter ki ti resevwar de talan la aprose li osi, li dir: ‘Met, ou finn donn mwa de talan, ala mo finn gagn ankor de.’

²³ So met dir li: ‘To finn bien fer, bon serviter fidel. To finn fidel pou enn ti zafer, mo pou met twa ansarz pli gran zafer ankor. Vinn partaz lazwa to met.’

²⁴ Apre sa, serviter ki ti resevwar enn sel talan la aprose e li dir: ‘Met, mo kone kouma enn dimoun bien ti dir: ou rekolte kot ou pa finn plante, ou ramase kot ou pa finn seme.

²⁵ Mo finn gagn per, e mo finn al kasiet talan la anba later. Ala, mo rann ou li.’

²⁶ Patron la reponn li, ‘Eta move serviter pares! To bien kone ki mo rekolte kot mo pa finn plante, e mo ramas kot mo pa finn seme?

²⁷ Alor to ti bien kapav met mo larzan dan labank, koumsa ler mo retourne mo ti va regagn li avek lintere.

²⁸ Repran sa talan la ar li e donn li sa dimoun ki ena dis la.

²⁹ Parski tou dimoun ki ena, pou gagn plis ankor, e zot pou dan labondans; me dimoun ki pena nanye, mem sa tigit ki zot ena la, pou ras sa ar zot.

³⁰ Sa serviter ki pa vo nanye la, pran li zet li deor dan nwar, kot pou ena boukou plore, kriye ek grinsman ledan.’ ”

Dernie zizman

³¹ “Kan Garson Limanite vini dan so laglwar avek tou bann anz, li pou asiz lor so tronn rwayal.

³² Tou bann nasion pou rasanble devan li, e li pou separ bann dimoun sakenn so kote, parey enn berze separ mouton ek kabri.

³³ Li pou met bann mouton dan so kote drwat e bann kabri dan so gos.

³⁴ Alor lerwa pou dir ar bann ki dan kote drwat, ‘Vini, zot ki mo papa finn beni. Resevwar rwayom ki Bondie finn prepare pou zot depi kreasion lemonn.

³⁵ Avredir mo ti fin e zot finn donn mwa manze. Mo ti swaf e zot finn donn mwa bwar. Mo ti enn etranze e zot finn akeyir mwa.

³⁶ Mo ti touni, e zot finn donn mwa linz. Mo ti malad, e zot finn vizit mwa. Mo ti dan prizon e zot finn vinn get mwa.’

³⁷ Alor bann ki finn obeir Bondie, zot dir lerwa: ‘Segner, kan nou finn trouv twa pe mordefin e nou finn donn twa manze? Oubien to ti swaf e nou finn donn twa bwar?

³⁸ Kan nou finn trouv twa enn etranze e nou finn akeyir twa, oubien touni nou finn donn twa linz?

³⁹ E kan nou finn trouv twa malad oubien dan prizon e nou finn vizit twa?’

⁴⁰ Lerla lerwa reponn zot: ‘Laverite, mo dir zot, sak fwa ki zot finn fer sa ar enn sa bann pli tipti la ki dan mo fami, ar momem ki zot ti fer sa.’

⁴¹ Apre lerwa pou dir bann ki dan so kote gos: ‘Al lwin ar mwa zot modi! Al dan dife eternel ki pa pou zame tegn e ki finn prepare pou Satan ek so bann asosie.

⁴² Parski mo ti fin e zot pa finn donn mwa manze. Mo ti swaf e zot pa finn donn mwa bwar.

⁴³ Mo ti enn etranze e zot pa finn akeyir mwa, touni zot pa finn donn mwa linz, malad ek dan prizon, zot pa finn pran mwa swin?’

⁴⁴ Alor zot osi, zot pou dir lerwa: ‘Segner, kan eski nou finn trouv twa, to ti gagn fin ek swaf, etranze, touni, malad e dan prizon e nou pa finn ed twa?’

⁴⁵ Alor li pou reponn zot: ‘Laverite mo dir zot, letan zot pa finn fer sa pou enn sa bann pli tipti parmi zot, ar mwa osi zot pa finn fer li.’

⁴⁶ E sa bann la pou pini pou toultan, me bann zis, zot pou gagn lavi eternel.”