Mk 1 - Nouvo Testaman dan Kreol Morisien

Proklamasion Zan Batis

¹ Premie komansman Bonn Nouvel Zezi Kris Garson Bondie.

² Dan liv profet Izai finn ekrir: “Gete, mo pe avoy mo mesaze devan twa, Limem pou tras enn sime pou twa.

³ Enn lavwa ape kriye dan dezer, prepar sime Nou Segner, ouver enn sime kler pou li.”

⁴ Zan Batis paret dan dezer; li proklam enn batem pouki bann dimoun sanz zot leker e ki zot pese pardone.

⁵ Tou dimoun ki res Zide ek Zerizalem ti pe vinn get Zan. Li ti pe batiz zot dan larivier Zourdin letan zot tou ti pe konfes zot pese anpiblik.

⁶ Zan ti met enn linz pwal samo ek enn sang lapo dan so lerin. Li ti manz sotrel ek dimiel sovaz.

⁷ Li ti pe proklame, “Ena enn ki pli for ki mwa, li pe vinn apre mwa; mo pa ase bon, pou mo kourbe devan li, pou larg so sandalet.

⁸ Mwa, mo finn batiz zot ar dilo, me li, li pou batiz zot ar Lespri Sin.”

Batem Zezi

⁹ Samem lepok la, Zezi sorti depi Nazaret, ki trouv dan Galile; lerla Zan finn batiz li dan larivier Zourdin.

¹⁰ Zis kouma li pe sorti dan dilo, Zezi trouv lesiel fann an-de. Lespri Sin, parey kouma enn kolonb, desann lor li.

¹¹ Enn lavwa, dan lesiel dir, “Tomem mo Garson, ki mo bien kontan; sa fer mwa enn gran lazwa pou swazir twa.”

Tantasion Zezi

¹² Zis apre sa, Lespri pous li dan dezer.

¹³ Dan dezer, Satan finn tant li, pandan karant zour. Li ti avek bann bebet sovaz e bann anz ti pe servi li.

Proklamasion Zezi

¹⁴ Letan bannla finn aret Zan, Zezi rant dan Galile. Li koumans proklam Bonn Nouvel Bondie.

¹⁵ Li dir: “Ler finn arive, Rwayom Bondie pe koste. Sanz zot leker, krwar dan Bonn Nouvel.”

Zezi apel so bann premie disip

¹⁶ Letan li ti pe mars-marse dan borlamer Galile, li trouv de peser, Simon, avek so frer Andre ki ti pe lapes lasenn.

¹⁷ Zezi dir zot, “Vini, swiv mwa; mo pou montre zot lapes dimoun.”

¹⁸ Lor vites, zot kit zot file, zot swiv Zezi.

¹⁹ Inpe pli lwin, li trouv de garson Zebede: Zak ek so frer Zan. Toulede ti dan pirog; zot ti pe demay zot file.

²⁰ Enn sel kout, li apel zot; zot kit zot papa Zebede anplan dan bato avek bann travayer. Zot swiv Zezi.

Enn boug posede par enn move lespri

²¹ Zezi ek so bann disip al Kafarnaom. Zour saba, Zezi rant dan sinagog e li koumans donn lansegnman.

²² So parol ti inpresionn dimoun. So koze, so lansegnman ti ena pwa parski li pa ti parey kouma bann dokter lalwa.

²³ Zisteman dan zot sinagog, ti ena enn boug posede par enn move lespri. Li ape kriye for-for:

²⁴ “Zezi Nazaret, ki to oule, ki to vinn rode ar nou? To finn vini pou fini nou? Mo kone ki to ete: tomem Sin, tomem sorti kot Bondie.”

²⁵ Zezi menas li. Li dir li: “Ferm to labous; sorti la, ale.”

²⁶ Move lespri la sakouy-sakouy dimoun la. Li irle letan li larg dimoun la.

²⁷ Lasistans gagn sok; sakenn dimann ar so kamarad, “Ki pe arive, ki sa vedir? Ala enn nouvo manier koze ki ena pwa. Mem move lespri la ekout li.”

²⁸ Lerlamem so koze fane partou kote dan Galile.

Zezi geri belmer Simon

²⁹ Kouma bannla kit sinagog, zot rant dan lakaz Simon ek Andre, ansam avek Zak ek Zan.

³⁰ Belmer Simon ti lor lili ar enn move lafiev. Bannla raport sa Zezi.

³¹ Zezi koste, li trap so lame, li lev li. So lafiev kit li ale. Lerla belmer la koumans servi zot.

Gerizon bann malad

³² Aswar vini, soley ti pe al dormi, zot sarye devan Zezi tou seki ti malad, tou seki ti ena demon lor zot.

³³ Tou dimoun dan landrwa finn rasanble devan laport.

³⁴ Zezi geri boukou dimoun ki ti ena tout sort kalite maladi; Li sas demon lor bann ki ti posede. Li ferm labous bann demon parski zot ti kone ki Zezi ete.

Zezi kit Kafarnaom

³⁵ Gramatin boner, kan ti ankor fer nwar, Zezi leve, li kit lakaz, li al dan enn landrwa retire pou priye.

³⁶ Simon ek so bann kamarad ti pe rod li partou.

³⁷ Ler zot retrouv li, zot dir li, “Tou dimoun pe rod twa.”

³⁸ Li dir zot, “Anou al inpe pli lwin dan bann lezot landrwa; laba osi, mo bizin proklam Bonn Nouvel. Akoz samem mo finn vini.”

³⁹ Koumsamem li ti al partou dan Galile, li ti pe proklam Bonn Nouvel dan zot sinagog e li ti pe sas demon.

Zezi geri enn lepre

⁴⁰ Enn dimoun ki ti ena lalep vinn get li. Li ti tom azenou devan Zezi, li sipliye li, “Si sa to volonte, to kapav pirifie mwa.”

⁴¹ Sa fer Zezi enn gran lapenn; Zezi avans so lame e li tous li. Zezi dir li, “Samem mo volonte, aster to pou pirifie.”

⁴² Deswit lalep kit li, ek li ti pirifie.

⁴³ Apre ki Zezi ti warn li severman, li fer li ale.

⁴⁴ Li dir li: “Sirtou pa al rakont sa personn; ale, al get enn pret; donn seki Moiz finn dir pou pirifikasion; sa pou enn temwagnaz pou lezot.”

⁴⁵ Kouma li sorti deor, li koumans rakonte, li fann nouvel partou. Akoz samem Zezi ti bizin kasiet-kasiet e pa ti kapav rant dan lavil; li ti oblize al dan bann landrwa retire; kanmem sa, dimoun ti sorti partou pou vinn get li.