Let Zak 5 - Nouvo Testaman dan Kreol Morisien

Warning kont bann ris

¹ Asterla, bann ris, plore e kriye akoz bann maler ki pe vinn lor zot.

² Zot larises finn pouri e zot linz pe fini ar lever mous.

³ Zot lor ek zot larzan pe rouye. Sa larouy la pou servi kouma enn temwagnaz kont zot e li pou manz zot laser kouma dife. Zot finn anpil enn ta larises dan sa bann dernie zour la.

⁴ Ekout mwa! Zot finn refiz pey saler bann travayer ki finn travay dan zot karo. Bannla pe fer konplint e lavwa bann ki fer larekolt finn ariv dan zorey Bondie tou pwisan.

⁵ Lor later zot finn viv enn lavi konfortab, dan lix ek plezir. Zot finn angres zot kouma bann zanimo pou labousri.

⁶ Zot finn kondann ek touy bann dimoun inosan ki pa finn montre rezistans.

Ena pasians dan lapriyer

⁷ Mo bann frer ek ser, zot bizin ena pasians ziska ki Lesegner vini. Fermie atann ki later donn bann bon fri. Zot atann avek boukou pasians ziska sezon lapli.

⁸ Zot osi, bizin ena pasians. Tini zot leker ferm akoz Lesegner pe arive biento.

⁹ Pa bizin fer konplint enn kont lot, sinon Bondie pou ziz zot - e ziz la zis deryer laport.

¹⁰ Bann frer ek bann ser, rapel bann profet ki ti koz dan nom Lesegner. Zot bann lexanp kouma bizin ena pasians dan moman gran soufrans.

¹¹ Nou deklar bannla bienere parski zot finn ena landirans. Zot finn tann landirans Zob e zot finn trouve seki Bondie finn fer, kouma li finn montre konpasion ek mizerikord pou li.

¹² Mo bann frer e ser, sirtou, pa fer serman, ni par lesiel, ni par later, ni par okenn lot fason. Kan zot dir “Wi” ki li “Wi” e kan zot dir “Non” ki li “Non.” Koumsa zot pa pou tom dan kondanasion.

¹³ Ena kikenn parmi zot ki pe soufer? Ki li priye. Ena kikenn dan lazwa? Ki li sant louanz.

¹⁴ Eski ena parmi zot ki malad? Li bizin apel bann ansien legliz pou priy pou li, e met lonksion delwil lor li dan nom Lesegner.

¹⁵ Enn lapriyer ki fer avek lafwa, pou sov malad la; Lesegner pou remet li dibout e so bann pese pou pardone.

¹⁶ Alors, zot bizin konfes zot pese ant zot e sakenn priye pou so kamarad, pouki zot kapav geri. Lapriyer enn dimoun ki zis, li ena enn pwisans e li efikas.

¹⁷ Eli ti enn imin parey kouma nou. Li ti priye avek boukou ferver pouki lapli pa tonbe; e pandan trwa-zan sis-mwa lapli pa ti tonbe lor later.

¹⁸ Apre sa li priye ankor, e lesiel finn donn lapli e later finn raport enn zoli rekolt.

¹⁹ Mo bann frer e ser, si enn parmi zot finn egare e enn lot ramenn li,

²⁰ rapel bien: dimoun ki retir enn peser dan trou, li pou sov lam sa peser la depi lamor, e enn kantite pese pou pardone.