Let Zak 1 - Nouvo Testaman dan Kreol Morisien

Salitasion

¹ Mwa, Zak, enn serviter Bondie ek Segner Zezi Kris, Mo pe salye zot tou pep Bondie disperse dan lemonn antie.

Lafwa ek lasazes

² Mo bann kamarad, konsider li kouma enn lazwa letan zot fer fas avek bann moman eprev,

³ parski zot kone, kan zot lafwa pas par leprev, sa fer zot gagn landirans.

⁴ Zot landirans bizin kontigne mem pouki zot vinn parfe ek san okenn defo.

⁵ Si kikenn parmi zot mank lasazes, ki li demande, Bondie pou donn li. Bondie zenere e li donn tou dimoun avek enn gran leker.

⁶ Me demann avek lafwa, zame doute, parski seki doute li parey kouma vag lamer dirize par divan;

⁷ enn dimoun ki parey koumsa pa kapav atann pou gagn kiksoz avek Bondie,

⁸ parski li indesi e instab dan so panse.

Pov ek Ris

⁹ Ki enn krwayan pov trouv so fierte akoz Bondie lev li lao,

¹⁰ e enn krwayan ki ris trouv so fierte akoz Bondie abes li, parski risar la pou disparet kouma enn fler dan karo.

¹¹ Soley lev avek enn saler diplon ki bril bann plant; so bann fler tonbe e so bote disparet. Li parey avek enn dimoun ris; li pou disparet pandan ki li okipe ar so aktivite.

¹² Li pou bienere sa dimoun ki tini ferm dan leprev. Bann ki prouve zot ferm pou resevwar kouronn laviktwar ki Bondie finn promet bann ki kontan li.

Tantasion

¹³ Si dimoun tante par leprev, fode pa ki li dir, “Bondie ki tant mwa.” Bondie pa kapav tante par lemal, e limem li pa tant personn.

¹⁴ Me enn dimoun, li tante par so prop dezir ki sedwir li, e ki antrenn li dan lemal.

¹⁵ Lerla, kan sa dezir la finn forme, li donn nesans pese, e kan pese grandi li donn lamor.

¹⁶ Mo bann kamarad, pa les zot anbete.

¹⁷ Tou don parfe ek tou bon kado sorti depi lao kot Bondie, Kreater lalimier. E Bondie pa sanze, li pa kre lonbraz parski li sanz pozision.

¹⁸ Par so prop volonte li finn donn nou lavi par so Parol ki laverite, pouki nou kapav vinn kouma bann premie fri kreasion.

Ekoute ek obeir laparol

¹⁹ Mo bann kamarad, konpran sa bien: sakenn bizin rapid pou ekoute, me pa prese pou koze, pa ankoler vit,

²⁰ parski enn dimoun ankoler pa pou akonplir enn lavi ki drwat devan lizie Bondie.

²¹ Alor, rezet tou zot move manier ek zot mesanste. Me dan limilite, akeyir parol ki Bondie finn plant dan zot leker, samem parol ki pou sov zot.

²² Fodre pa ki zot anbet zotmem parski zot zis ekout so parol me zot pa met li anpratik.

²³ Si kikenn ekout laparol e pa met li anpratik, li parey enn dimoun ki get limem dan laglas,

²⁴ apre ki li finn get limem, li ale e li bliye kouma li ete.

²⁵ Me dimoun ki persevere pou examinn vre lalwa, lalwa laliberte, e li kontign ladan avek fidelite, li pa zis kontant li ekoute, me li osi met parol la anpratik, abe sa dimoun la li pou beni dan tou seki li fer.

²⁶ Si kikenn krwar li enn relizie e li pa vey so lalang, li pe tronp limem, so larelizion pena okenn valer.

²⁷ Ala seki Bondie Papa konsider kouma vre relizion ki pena okenn tas: pran swin bann orfelin ek vev dan zot soufrans e pa les zot kontamine par lemonn.