Let pou Tit 3 - Nouvo Testaman dan Kreol Morisien

Konportman Kretien

¹ Rapel tou dimoun ki zot bizin respekte bann dirizan ek bann otorite sivil. Zot bizin viv dan lobeisans ek fer bann bonaksion.

² Pa koz bonavini lor personn, evit dispit ek montre zot bienveyan anver zot prosin san lev lavwa anpiblik.

³ Lontan nou pa ti servi nou lespri, nou ti rebel ek dan erer. Nou ti esklav tou sort kalite plezir. Nou ti viv dan lemal ek lanvi. Lezot ti air nou, e nou ti air zot.

⁴ Me kan Bondie nou Sover finn montre so bonte ek so lamour pou dimoun,

⁵ li finn sov nou. Pa akoz nou bann bon laksion me par so mizerikord. Li finn sov nou atraver delo ki donn enn nouvo nesans ek enn renouvelman par Lespri Sin.

⁶ Bondie finn repann anabondans Lespri Sin lor nou atraver Zezi Kris nou Sover,

⁷ e kan li rann nou zis par lagras, nou gagn dan lesperans leritaz lavi eternel.

⁸ Sa enn parol sir. Mo oule ki to met lanfaz lor sa bann kestion la afin ki bann ki finn met zot lafwa dan Bondie, zot ena aker pou fer lebien devan tou dimoun, seki enn bon zafer an limem.

⁹ Evit bann fos largiman, bann long lalis anset, diskision ek lager konsernan Lalwa. Tousa initil.

¹⁰ Pou seki konsernn bann divizer, apre de warning, bizin koupe ar zot.

¹¹ Sa kalite dimoun la, zot koronpi. Zot pese fini kondann zot.

Dernie rekomandasion

¹² Mo pans pou avoy twa Artemas ek Tisik. Depes twa vinn rezwenn mwa dan Nikopolis parski mo pou pas liver la.

¹³ Prepar bien vwayaz avoka Zenon ek Apolos. Veye ki zot napa mank nanye.

¹⁴ Bann Kretien bizin aprann servi zot letan fer bon kiksoz pou reponn bann vre bezwin. Koumsa zot pou raport bann fri.

¹⁵ Tou dimoun ki avek mwa salye twa. De to kote, salye bann ki kontan nou dan lafwa. Lagras Bondie avek zot.