Let pou Tit 2 - Nouvo Testaman dan Kreol Morisien

Ansegn bon doktrinn

¹ Twa Tit, donn bon lansegnman.

² Instrir bann granper: zot bizin sinp, ena dignite, koz ar sazes, profon dan zot lafwa, ena lamour ek perseverans.

³ Parey pou bann gramer: azir kouma bann sint fam, pa fer palab, koz dan ledo, bwar. Okontrer donn bon lexanp

⁴ pou aprann bann zenn fam kontan zot mari ek zot zanfan,

⁵ viv de fason rezonab, pa volaz, okip lakaz, viv bien anver zot mari afin ki Parol Bondie pa blasfeme.

⁶ Invit bann zenes pa exazere dan zot konportman.

⁷ To pou enn lexanp pou zot dan manier ki to viv. Met serye ek sinserite dan to lansegnman.

⁸ Servi parol ki personn pa pou kritike ek kot to bann ladverser pa pou kapav repros twa. Zot va gagn dekonserte parski pena nanye pou dir.

⁹ Esklav bizin soumet anver zot met ek donn satisfaksion san ki fronte.

¹⁰ Fode pa zot lame long; okontrer zot bizin onet. Lerla zot pou onor lansegnman Bondie nou Sover.

¹¹ Lagras Bondie ki sov tou dimoun finn manifeste.

¹² Samem lagras ki ansegn nou rezet linkrwayans ek bann zwisans lemonn pou amenn enn lavi sinp lor later dan la zistis ek lafwa.

¹³ Nou pe atann dan lesperans sa gran zour la kot laglwar Bondie nou Sover dan Zezi Kris pou manifeste li.

¹⁴ Li finn donn so lavi pou nou afin ki li tir nou dan pese ek fer nou vinn so sel pep ki destine pou fer lebien.

¹⁵ Ala seki to pou dir kan to pou prese. Dir sa san ezite avek otorite. Pa les personn mepriz twa.