Biblia Todo Logo
Bìoball air-loidhne

- Sanasan -

Let pou Romin 4 - Nouvo Testaman dan Kreol Morisien


Lexanp Abraam

1 Ki nou pou dir la lor Abraam nou anset? Dan tousala, ki li finn gagne?

2 Parski si Abraam ti zistifie par zefor ki li ti fer, dan sa ka la, li ena rezon fer gran nwar. Me pa devan Bondie.

3 Ki Lekritir dir? Abraam ti krwar Bondie, e Bondie finn konsider li kouma enn dimoun drwat akoz sa lafwa la.

4 Si enn dimoun travay, so lapey pa kapav enn kado me enn kiksoz ki dwa li.

5 Me si enn dimoun pa travay, me ena konfians ki Bondie rann bann peser zis akoz zot lafwa, sa kalite lafwa la Bondie kont li kouma enn lavi drwat.

6 Samem ki David dir letan li koz lor boner ki dimoun ena akoz Bondie konsider li kouma zis, san kont lor so bann aksion. Li dir

7 “Zot bienere, sa bann dimoun pouki Bondie finn pardonn zot fot, zot pese finn efase!

8 Li bienere, sa dimoun pouki Lesegner efas so pese dan kont!”

9 Sa boner la, eski li existe selma pou bann ki finn fer sirkonsizion, oubien osi pou bann ki pa finn fer sirkonsizion? Samem ki nou fek dir, “Bondie konsider Abraam kouma enn dimoun drwat letan li pran kont so lafwa.”

10 Kan sa ti pase? Apre sirkonsizion Abraam, oubien avan? Pa apre, me avan.

11 Plitar ki Abraam ti gagn sirkonsizion kouma enn sign ki Bondie aksepte li akoz so lafwa, mem si li pa ti ankor fer sirkonsizion. Alor Abraam finn vinn papa tou dimoun ki krwar dan Bondie san ki zot fer sirkonsizion, pouki met lazistis lor zot kont.

12 Sa fer Abraam vinn papa tou dimoun ki finn fer sirkonsizion, pa akoz sirkonsizion la, me parski zot ena lafwa dan Bondie, parey kouma Abraam ti fer avan so sirkonsizion.


Promes Bondie pou dimoun ki ena lafwa

13 Bondie ti promet Abraam ek so bann desandan ki zot pou erit later antie. Sa promes la pa ti fer lor baz ki Abraam ti obeir lalwa, me akoz lafwa ki li ti ena dan Bondie. Sa finn rann li zis devan Bondie.

14 Si Abraam ek so bann desandan finn gagn sa promes la akoz zot obeir lalwa, alor lafwa pena valer ek promes la pena okenn pwa.

15 Anefe, lalwa provok lakoler Bondie; me si pena lalwa, pena dezobeisans lalwa non pli.

16 Pou sa rezon la, promes la baze lor lafwa pouki li enn don Bondie e li valab pou tou bann desandan Abraam; pa zis pou dimoun ki obeir lalwa, me osi pou dimoun ki krwar, parey kouma Abraam ti krwar. Pou nou tou Abraam enn papa spiritiel.

17 Lekritir deklare: “Mo finn fer twa papa enn kantite nasion.” Li nou papa devan Bondie dan ki li finn krwar, sa Bondie ki donn lavi bann dimoun ki finn mor, e ki kre kiksoz depi nanye ditou.

18 Abraam ti krwar e ti ena lesperans, mem letan tou ti paret san lespwar. Li finn kontign ena lafwa e li finn vinn papa enn kantite nasion dapre seki Bondie ti dir, “To bann desandan pou bien nonbre.”

19 Li ti ena anviron sant-an; me so lafwa pa ti afebli letan li ti konsider so lekor ki ti kouma enn lekor mor, e so fam Sara pa ti dan pozision pou kapav gagn zanfan.

20 Li pa ti perdi lafwa e li pa ti dout promes Bondie; okontrer so lafwa ti fortifie li, e li ti loue Bondie.

21 Li ti ena lasirans ki Bondie ena pwisans pou akonplir so promes.

22 Akoz lafwa ki Abraam ti ena, “Bondie ti konsider li enn dimoun ki drwat.”

23 Parol ki dir, “Bondie ti konsider li enn dimoun ki drwat” pa finn ekrir zis pou li tousel,

24 me pou nou osi. Pou met sa lor nou kont, nou ki krwar dan Bondie ki finn resisit Zezi nou Segner depi lamor.

25 Li ti finn livre dan lame lamor pou nou bann pese, e li finn releve pou rann nou zis devan Bondie.

Mauritian Kreol New Testament © Bible Society of Mauritius, 2009. 

Bible Society of Mauritius
Lean sinn:



Sanasan