Let pou Romin 3 - Nouvo Testaman dan Kreol Morisien

Fidelite Bondie

¹ Eski kan ou Zwif ou ena kik lavantaz? Ki valer sirkonsizion ena?

² Dan boukou manier lavantaz la li gran. Premie dabor Bondie finn konfie zot so mesaz.

³ Me ki arive si ena parmi zot pa finn fidel? Ki, akoz sa Bondie pa pou fidel li?

⁴ Non, zame! Bondie pou res toultan laverite, mem si bann imin manter. Dan Lekritir finn ekrir, “Bizin rekonet lazistis dan to parol, e ki to triyonfe kan ziz twa.”

⁵ Me si bann move kiksoz ki nou fer montre lazistis Bondie, ki nou pou dir? Bondie pa zis parski li pini nou? La mo koz kouma enn imin.

⁶ Pena sime! Si Bondie pa zis, kouma li pou ziz lemonn?

⁷ Me si par mo mansonz, laverite Bondie sorti plis dan kler ek sa ogmant so laglwar, kifer bizin kondann mwa kouma enn peser?

⁸ Kifer nou pa dir, “Anou fer lemal, koumsa kiksoz bien pou arive”? Ena dimoun insilte mwa, zot dir ki swadizan mo dir sa kalite parol la. Zot merit kondanasion.

Personn pa drwat

⁹ Alors ki nou konklizion? Eski nou, bann Zwif, nou dan meyer kondision ki lezot devan Bondie? Pa ditou! Mo finn deza montre ki tou dimoun, Zwif oubien Grek, nou tou anba dominasion pese.

¹⁰ Lekritir dir, “Personn pa drwat, mem pa enn sel;

¹¹ personn pa konpran, personn pa rod Bondie;

¹² Tou finn kit bon sime; ansam tou finn perdi sime; personn pa fer seki bien, mem pa enn sel.

¹³ Zot lagorz kouma enn tonbo ouver; zot lalang servi pou tronp dimoun; menas danzere dan kwin zot lalev kouma pwazon serpan;

¹⁴ zot labous ranpli ar malediksion amer;

¹⁵ zot fini pare pou al pran lavi lezot;

¹⁶ partou kot zot ale, zot kit maler ek destriksion;

¹⁷ zot pa finn konn sime lape.

¹⁸ Zot pena lakrint Bondie.”

¹⁹ Nou kone ki seki lalwa dir, li pe adres li ar bann seki anba lalwa, pouki tou labous ferme ek ki lemonn antie rekonet ki li anba zizman Bondie.

²⁰ Koumsa personn pa trouv li zistifie devan Bondie parski li finn obzerv lalwa. Lalwa nek zis fer dimoun pran konsians ki pese ete.

Kouma nou vinn zis par lafwa

²¹ Me asterla Bondie finn montre nou kouma li rann nou drwat devan li, san ki bizin lalwa. Liv Lalwa ek liv profet rann temwagnaz lor la.

²² Bondie rann nou zis devan li par lafwa ki nou ena dan Zezi Kris. Li tret tou dimoun egal,

²³ parski tou finn fer pese e tou mank seki bizin pou rant dan laglwar Bondie.

²⁴ Me Bondie dan so bonte li zistifie dimoun gratwitman par delivrans ki Zezi Kris finn akonpli.

²⁵ Bondie finn ofer li kouma sakrifis pouki par lamor Lekris dimoun gagn pardon zot pese par lafwa ki zot ena dan li. Li ti fer sa pou montre so zistis, parski dan so pasians li ti les bann pese ki ti komet avan res san pinision;

²⁶ li ti fer sa pou montre so zistis dan letan prezan, pou montre ki limem li zis e ki li zistifie bann ki ena lafwa dan Zezi.

²⁷ Eski ena rezon pou nou fer vantar? Non, pena okenn rezon! Kifer? Parski nou obeir lalwa? Non, me akoz lafwa.

²⁸ Nou mintenir ki enn dimoun zistifie par lafwa san ki li bizin fer travay lalwa.

²⁹ Eski Bondie, li Bondie bann Zwif tousel? Eski li pa Bondie bann non-Zwif? Wi, li osi pou bann non-Zwif

³⁰ parski Bondie enn sel, e li pou zistifie bann ki pratik sirkonsizion akoz zot lafwa, e li pou zistifie bann ki pa pratik sirkonsizion akoz zot lafwa.

³¹ Eski savedir par sa lafwa la nou anil lalwa? Pa ditou! Okontrer nou donn li so vre valer.