Let pou Romin 10 - Nouvo Testaman dan Kreol Morisien

¹ Mo bann frer, mo bann ser, dezir mo leker ek lapriyer ki mo fer Bondie pou bann Izraelit, se ki zot sove.

² Mo kapav dir ki zot ena zel pou Bondie, me li enn zel ki pa baze lor vre konesans.

³ Zot pa ti konn lazistis Bondie, alor zot ti sey etablir zot prop drwatir; alor zot pa ti soumet zot ar lazistis Bondie.

⁴ Lekris finn amenn lalwa ver so lafin, pouki tou seki krwar Bondie, zot zistifie.

Delivrans pou seki met konfians dan Lesegner

⁵ Ala kouma Moiz dekrir drwatir dapre lalwa: “Dimoun ki met lalwa anpratik, li pou viv dapre lalwa.”

⁶ Me drwatir ki dapre lafwa dir: “Pa dir dan to leker, ‘Kisannla pou mont lao dan lesiel?’ Setadir, pou al demann Lekris desann kot nou.

⁷ Oubien, ‘Kisannla pou desann dan profonder lemonn anba kot bann mor?’ Setadir pou demann Lekris remont depi lamor.”

⁸ Me ki li dir? “Laparol pre ar twa, li dan to labous, li dan to leker, setadir parol lafwa ki nou pe proklame.”

⁹ Si par to prop labous to konfese ki Zezi limem Lesegner e to krwar ki Bondie finn resisit li depi lamor, to pou sove.

¹⁰ Anefe, enn dimoun zistifie parski li krwar dan so leker, e li sove parski li konfes ar so labous.

¹¹ Kouma Lekritir dir, “Seki krwar dan li pa pou konn dezoner.”

¹² Pena okenn diferans ant Zwif ek non-Zwif; toulede ena mem Segner ki beni avek labondans tou seki invok li,

¹³ parski, “Tou seki invok nom Lesegner pou sove.”

¹⁴ Me kouma zot pou invok kikenn dan ki zot pa finn krwar? E kouma zot pou krwar dan kikenn, si zot pa finn tann koz li? E kouma zot pou tande si personn pa finn anons zot sa kikenn la?

¹⁵ E kouma zot pou anons sa mesaz la, si pa anvway zot? Dapre seki finn ekrir, “Komie li zoli letan nou trouv bann mesaze ki anons bonn nouvel arive!”

¹⁶ Me pa tou Izraelit ki ti aksepte Bonn Nouvel. Izai mem ti dir, “Segner, kisannla finn krwar nou mesaz?”

¹⁷ Dimoun gagn lafwa par mesaz ki zot tande, e mesaz ki anonse li lor Lekris.

¹⁸ Me mo dimande: Eski zot pa ti tande? Biensir zot ti tande: “Finn tann zot lavwa partou lor later, e zot parol finn ariv ziska danbout lemonn.”

¹⁹ Ankor enn fwa mo dimande: Eski Izrael pa ti konpran? Dabor Moiz dir, “Mo pou fer zot zalou enn pep ki mem pa enn nasion, mo pou provok zot koler kont enn nasion san lintelizans.”

²⁰ Mem Izai oze proklam “Bann ki pa ti pe rod mwa, finn trouv mwa, Mo finn revel mwa ar bann ki pa ti pe dimann mwa nanye.”

²¹ Me konsernan Izrael li dir, “Toulezour mo finn ouver mo lebra pou akeyir enn pep dezobeisan e teti.”