Let pou Filipien 4 - Nouvo Testaman dan Kreol Morisien

Rekomandasion

¹ Mo bann frer e ser, mo bien kontan zot, e mo pe atann zot avek inpasians. Zotmem mo lazwa; res fidel dan zot lavi avek Bondie.

² Mo inplor Evodi ek Sintik pou viv anakorite dan Lesegner.

³ Mo pe osi dimann twa, mo partner, fidel pou ed sa bann fam la parski zot finn konbat ansam avek mwa pou propaz Bonn Nouvel parey kouma Kleman ek leres bann kolaborater finn fer. Zot nom finn ekrir dan liv lavi.

⁴ Rezwir zot toultan dan Lesegner. Mo repete; rezwir zot.

⁵ Les tou dimoun konn zot bonte. Lesegner pe vini biento.

⁶ Napa bizin zot trakase ditou, me dan ninport ki sitiasion, avek enn leker rekonesan, ofer zot lapriyer ek siplikasion Bondie.

⁷ Lape Bondie ki depas tou lintelizans, pou gard zot lekor ek zot lespri dan Zezi Kris.

⁸ Finalman, mo bann frer e ser, pans bien lor tou seki vre, onorab, zis, pir, admirab ek tou seki merit nou louanz.

⁹ Kontigne fer tou seki zot finn aprann ek resevwar ar mwa, seki zot finn tande e trouv mwa fer. Bondie lape pou res avek zot.

Rekonesans pou kado ki finn resevwar

¹⁰ Asterla mo ena enn gran lazwa dan Lesegner ki zot finn montre lintere pou mwa. Zot tou deza ena sa lintere la pou mwa, me zot pa ti ena lokazion pou exprim li.

¹¹ Pa lakoz mo dan bezwin ki mo koz koumsa, non, mo finn aprann ki dan ninport ki leta mo ete mo bizin kontan.

¹² Mo konn viv dan lamizer ek dan labondans, kan mo ena ou kan mo pena nanye pou manze.

¹³ Mo kapav fer fas avek tou sa bann sitiasion la parski Lekris li fortifie mwa.

¹⁴ Kanmemsa, zot finn bien fer pou siport mwa dan mo bann difikilte.

¹⁵ Zot, bann Filipien bien kone ki depi komansman ler mo ti kit Masedwann, apart zot okenn legliz pa ti partisip dan mo bann depans,

¹⁶ mem ler mo ti dan Tesalonik, zot ti avoy mwa led.

¹⁷ Mo pa zis anvi rod enn donasion ki pou mo prop benefis.

¹⁸ Mo finn resevwar tou, mem plis ki seki mo pou bizin. Epafrodit finn aport mwa zot bann don kouma enn sakrifis kifer plezir Bondie.

¹⁹ Mo Bondie pou donn zot seki zot bizin dapre so larises dan laglwar Zezi Kris.

²⁰ Laglwar pou Bondie papa, asterla e pou touzour, amenn.

Salitasion final

²¹ Fer konpliman tou bann pep Bondie dan Zezi Kris. Bann kamarad ki avek mwa fer zot osi konpliman.

²² Tou pep Bondie e spesialman bann desandan Sezar fer zot konpliman.

²³ Ki lagras sorti kot Zezi Kris, res avek zot.