Let pou Filemon 1 - Nouvo Testaman dan Kreol Morisien

Salitasion

¹ Mwa Pol, ki dan kaso akoz travay mo finn fer pou Zezi Kris, ansam avek Timote nou frer, Mo pe ekrir twa Filemon, nou kamarad travayer bieneme,

² nou ser Apia, Arsip nou kamarad solda ek tou bann manm legliz ki reyni dan to lakaz:

³ Ki Bondie nou papa ek Segner Zezi Kris, akord zot so lagras ek so lape.

Lamour ek lafwa Filemon

⁴ Sak fwa mo priye, mo pans twa e mo dir mersi mo Bondie,

⁵ parski mo finn tann to lamour pou tou bann krwayan ek to lafwa dan Segner Zezi.

⁶ Mo priye ki sa lafwa ki nou partaze la, li fer nou konpran pli bien sak benediksion ki nou resevwar letan nou res ini avek Kris.

⁷ Frer, to lamour finn donn mwa boukou lazwa ek lankourazman parski to finn rekonfort leker bann krwayan.

Pol fer enn reket dan faver Onezim

⁸ Pou sa rezon la, mem si mo santi mwa ase for dan Kris pou donn twa lord pou fer to travay,

⁹ pourtan mo pou plito fer twa enn lapel baze lor lamour. Mwa, Pol, enn vieyar, anplis asterla enn prizonie Zezi Kris,

¹⁰ mo priye twa pou mo prop zanfan Onezim dan Kris.

¹¹ Enn letan li ti initil pou twa, asterla li itil pou nou toulede.

¹² Mo pe retourn li kot twa, limem mo leker.

¹³ Mo ti pou kontan gard li ar mwa pou li kapav servi mwa lor to nom letan ki mo dan prizon akoz la Bonn Nouvel.

¹⁴ Me mo pa anvi fer kiksoz san to konsantman pouki to bonte pa vinn enn obligasion me to prop volonte.

¹⁵ Kikfwa, akoz samem ki li finn separe ar twa, pouki to kapav regagn li pou touzour,

¹⁶ pa kouma esklav, me pli meyer ki enn esklav, kouma enn frer bieneme, spesialman pou mwa, me ankor plis pou twa dan to lavi ek dan Lesegner.

¹⁷ Alor si to pran mwa kouma to partner, resevwar li osi parey kouma to ti pou resevwar mwa.

¹⁸ Si zame li finn fer twa ditor, oubien li dwa twa kiksoz, met sa lor mo kont.

¹⁹ Mwa, Pol pe ekrir sa avek mo prop lame, mo pou ranbours twa. Mo pa anvi rapel twa ki to dwa mwa to prop lavi.

²⁰ Wi, mo frer, rann mwa enn servis pou lamour Lesegner; rekonfort mo leker dan Kris.

²¹ Mo sir ki letan mo pe ekrir twa to pou fer seki mo pou demann twa, e to pou fer plis ankor.

²² Anmemtan to prepar enn lasam pou mwa, parski grasa zot lapriyer mo pe espere gagn mo liberte.

Salitasion final

²³ Mo kamarad dan Zezi Kris, Epafras, li fer zot konpliman;

²⁴ Mark osi, Aristark, Delmas ek Lik mo bann kamarad travay.

²⁵ Ki lagras Segner Zezi Kris li res ar twa.