Ef 5 - Nouvo Testaman dan Kreol Morisien

Viv dan lalimier

¹ Zot, bann zanfan ki Bondie kontan, zot bizin imit li.

² Zot manier viv bizin inspire par lamour, parey kouma Lekris ti kontan nou e li ti donn limem pou nou, kouma enn lofrand ek enn sakrifis ki ena enn bon parfin ki fer Bondie plezir.

³ Parski zot manm lepep Bondie, li pa korek ki zot koz lor bann size imoralite sexiel, inpirte, lanvi posed kiksoz ki pa pou zot.

⁴ Fode pa ena langaz obsenn, koze bet, ou vilger; okontrer zot bizin dir mersi Bondie.

⁵ Ala mo dir zot enn zafer ki sir: okenn dimoun imoral, indesan ou akaparer - sa enn form idolatri - pa pou gagn so par dan Rwayom Lekris ek Bondie.

⁶ Napa les personn anbet zot ar bann parol vid, parski sa bann kiksoz lamem ki amenn lakoler Bondie lor bann dimoun ki dezobeir.

⁷ Pa asosie zot ar sa kalite dimoun la.

⁸ Avan zot ti teneb, asterla dan Lesegner zot lalimier; mars kouma bann zanfan lalimier.

⁹ Fri lalimier li dan tou seki bon, tou seki bien, tou seki vre.

¹⁰ Sey rod tou seki fer Bondie plezir.

¹¹ Pa al rant dan bann travay initil ki fer dan kasiet; okontrer denons zot.

¹² Li fer dimoun onte pou mem mansionn seki sertin fer dan kasiet.

¹³ Tou kiksoz ki expoze par lalimier li vinn vizib;

¹⁴ e seki vizib, li lalimier. Akoz sa ena enn koze ki dir, “Twa ki dan somey, lev twa, twa ki dan lamor, lev twa, e Lekris pou briy lor twa.”

¹⁵ Alor vey bien kouma zot pou viv zot lavi; pa viv kouma bann ignoran, me kouma bann saz.

¹⁶ Servi bien tou bann lokazion ki prezant devan zot, akoz sa letan asterla li move.

¹⁷ Napa fer bet, me konpran bien ki volonte Bondie ete.

¹⁸ Pa nek soul zotmem ar divin, sa pou amenn dezord dan zot lavi; me ki Lespri ranpli zot.

¹⁹ Ankouraz zot kamarad par Psom, kantik ek sante spiritiel. Sante ek selebre Lesegner ar tou zot leker.

²⁰ Dan nom nou Segner Zezi Kris, dir mersi Bondie Papa touletan e pou tou kiksoz.

Fam ek mari

²¹ Zot ki ena respe pou Lesegner, zot bizin viv lobeisans ant zotmem.

²² Fam, to bizin obeir to mari, parey kouma to fer pou Lesegner;

²³ parski enn mari limem latet so fam, parey kouma Lekris sef legliz. Lekris limem Sover legliz ki so lekor.

²⁴ Alor bann madam bizin viv dan lobeisans devan zot mari, parey kouma legliz viv dan lobeisans devan Lekris.

²⁵ Mari, kontan zot fam parey kouma Lekris ti kontan legliz e li ti donn so lavi pou li

²⁶ pou sanktifie li; pou pirifie legliz, li finn lav li dan dilo, e par so parol,

²⁷ pouki li kapav prezant legliz devan li dan tou so bote, san okenn tas, san okenn rid, ni defo; li anvi ki legliz li sin e san repros.

²⁸ Koumsamem bann mari bizin kontan zot fam, kouma zot prop lekor. Dimoun ki kontan so fam kontan limem.

²⁹ Personn pa air so prop lekor, me li nouri li e donn li boukou latansion, parey kouma Lekris fer pou so legliz.

³⁰ Nou manm so lekor.

³¹ “Akoz sa enn zom kit so papa ek so mama, e li inir li ar so fam, e toulede zot vinn enn sel.”

³² Sa mister la li bien gran; mwa mo dir ki sa ena pou fer avek Lekris e so legliz.

³³ Me li aplik ar zot osi. Ki sakenn kontan so fam kouma li kontan limem, e fam la bizin respekte so mari.