Eb 6 - Nouvo Testaman dan Kreol Morisien

¹ Alor, anou les dekote bann lansegnman elemanter lor Lekris pou nou grandi kouma bann adilt. Nou pena pou retourn lor bann premie leson, kouma: aret nou bann move aksion ki amenn lamor e krwar dan Bondie;

² kouma lansegnman lor batem e inpozision lame; kouma rezireksion bann mor ek zizman eternel.

³ Ala seki nou pou fer si Bondie permet nou.

⁴ Li inposib pou retablir dimoun ki finn deza resevwar lalimier, ki finn gout bann don lesiel, ki finn vinn partner avek Lespri Sin,

⁵ ki finn gout labonte parol Bondie e finn santi pwisans lemonn ki pe vini,

⁶ e ki pourtan finn retom dan zot vie lavi. Li inposib pou fer zot sanze ankor parski zot finn fini krisifie Garson Bondie ek insilte li an piblik.

⁷ Kan enn later absorb delo lapli ki souvan tonbe e prodwir bann bon plant pou dimoun ki pe plante, Bondie pou beni li.

⁸ Me si later la raport pikan ek move lerb, li pa vo nanye, li pe pas pre ar malediksion, e li pou fini dan dife.

⁹ Kanta zot, mo bann kamarad, nou kone ki mem si nou koz koumsa, zot lor bon sime ladelivrans.

¹⁰ Bondie, li pa sa kantite inzis la pou bliye zot travay ek lamour ki zot finn montre li, letan ki zot ti pe servi bann krwayan parey kouma zot pe ankor fer zordi.

¹¹ Me nou anvi ki zot tou montre sa mem antousias ziska lafin pou ki zot lesperans kapav realize.

¹² Pa vinn pares; kontigne swiv lexanp bann ki finn krwar avek perseverans e finn erit promes Bondie.

Promes Bondie

¹³ Personn pa pli gran ki Bondie. Kan li finn fer promes avek Abraam, li finn fer serman dan so prop nom.

¹⁴ Li ti dir, “Wi, vremem, mo pou beni twa e mo pou donn twa boukou desandan.”

¹⁵ Abraam finn atann avek pasians e li finn gagn seki Bondie ti promet li.

¹⁶ Kan dimoun pret serman, li fer li lor nom kikenn oubien enn kitsoz ki pli gran ki limem, e sa serman la servi kouma garanti pou regle tou bann dispit.

¹⁷ Alor kan Bondie anvi montre so bann eritie ki pou resevwar so promes ki so desizion pa kapav kase ditou, li fer enn serman.

¹⁸ Bondie pa koz manti. Alor so promes ek so serman, sa de kiksoz ki pa kapav sanze. So promes bizin ankouraz nou pou tini ferm dan lesperans ki finn propoz nou.

¹⁹ Sa lesperans la, li kouma enn lank solid ek stab ki tini nou lavi; lesperans la travers rido lesiel pou rant ziska dan sanktyer.

²⁰ Zezi finn al laba avan nou e pou nou. Li finn vinn pou touzour enn gran pret kouma Melkisedek.