Eb 5 - Nouvo Testaman dan Kreol Morisien

¹ Sak gran pret ki finn swazir parmi bann zom, finn mandate pou azir dan faver tou bann imin dan zot relasion avek Bondie, pou ofer bann don ek sakrifis.

² Li pou kapav azir avek douser kont tou bann ignoran ek bann peser, parski limem, li feb.

³ Akoz sa li oblize ofer sakrifis pou so prop pese e osi pou pese tou lezot dimoun.

⁴ Personn pa kapav pran sa bann loner gran pret la pou limem. Bondie ki finn apel li parey kouma li finn apel Aaron.

⁵ Me Zezi Kris pa ti pran loner pou donn limem sa tit gran pret, me, li finn resevwar sa kot Bondie ki ti dir: “Tomem mo garson, depi zordi mo to papa.”

⁶ Enn lot plas, li finn osi dir: “To enn pret pou touzour kouma Melkisedek.”

⁷ Pandan so lavi lor later, Zezi finn priye bien for ziska vers so larm, li finn sipliy Sa Enn ki kapav sov li depi lamor, e so lapriyer ti exose akoz so soumision.

⁸ Mem si li Garson Bondie, li finn aprann obeir par tou seki li finn soufer.

⁹ E sa finn rann li parfe e li finn vinn lasours enn delivrans eternel pou tou dimoun ki obeir li.

¹⁰ Ofet Bondie finn deklar li gran pret kouma Melkisedek.

Warning kont danze perdi lafwa

¹¹ Lor sa size la, nou ena boukou pou dir, me li difisil pou explike, parski zot pran letan pou konpran.

¹² Depi tou sa letan la, zot ti bizin fini vinn profeser, me zot pe bizin kikenn pou ansegn zot ankor bann prinsip parol Bondie. Zot nepli kapav manz manze solid, zot bizin bwar dile.

¹³ Tou dimoun ki nouri li ar dile, li pena okenn lexperyans, parski li enn tibaba.

¹⁴ Par kont manze solid li pou bann adilt ki konn disern seki bien ek seki mal.