Eb 2 - Nouvo Testaman dan Kreol Morisien

Enn gran delivrans

¹ Akoz samem nou bizin res ferm avek seki nou finn tande, pouki nou pa derape.

² Si mesaz ki bann anz ti amene lontan ti valid e tou dimoun ki pa ti respekte ek obeir mesaz la, zot ti gagn pinision ki zot ti merite;

³ kouma nou pou sap nou lavi si nou negliz enn gran delivrans parey? Lesegner ti koz lor la anpremie, apre lezot ti prouv li par zot temwagnaz.

⁴ Bondie limem finn soutenir sa mesaz la par bann sign extraordiner avek enn bann mirak e osi par bann don dapre volonte Lespri Sin.

Kris delivre nou

⁵ Ofet, sa lemonn ki pe vini e ki nou pe koze la, Bondie pa finn plas li anba pouvwar bann anz.

⁶ Kikpar dan Lekritir finn dir: “Ki imin ete pou to mazinn li? ki imin ete pou to pran li kont?

⁷ Pou inpe letan, to finn rann li inferyer ki bann anz, to finn kouronn li avek boukou laglwar ek loner,

⁸ to finn donn li lorite lor tou.” Si Bondie finn met tou anba lotorite imin, sa vedir ki li pa finn les nanye andeor zot lotorite. Me dan letan prezan la, nou pa trouve ki tou kiksoz anba lotorite imin.

⁹ Me nou trouv Zezi, ki pou enn tipe letan finn met li pli ba ki bann anz. Nou trouv li kourone avek laglwar e loner parski li finn soufer lamor. Par lagras Bondie, li finn gout lamor pou tou dimoun.

¹⁰ Li normal ki Bondie ki finn kre ek prezerv tou kiksoz, fer Zezi vinn parfe atraver lasoufrans, pouki boukou dimoun partisip dan so laglwar. Zezi, limem linisiater zot delivrans.

¹¹ Sa Enn ki sanktifie dimoun, ek sa bann ki resevwar sanktifikasion la, toulede zot sorti dan mem rasinn. Alor Zezi pa onte pou apel zot frer e ser.

¹² Li dir, “Mo pou proklam to nom ar mo bann frer, mo bann ser, omilie lasanble, mo pou loue twa.”

¹³ Li osi dir, “Mo pou met mo konfians dan Bondie.” e ankor, “Ala mo la avek bann zanfan ki Bondie finn donn mwa.”

¹⁴ Parski sa bann zanfan la, zot ena enn natir imin ki fer avek laser ek disan. Zezi osi partaz sa mem natir la. Li finn mor e atraver so lamor li finn detrir Satan ki ena pouvwar touy dimoun.

¹⁵ Li delivre tou bann ki ti pe pas tou zot lexistans dan lesklavaz, akoz zot per lamor.

¹⁶ Ofet li pa pe vinn osekour bann anz, me plito pou ed bann desandan Abraam.

¹⁷ Pou sa rezon la, li bizin vinn parey kouma so bann frer e ser dan tou fason, pou li kapav vinn enn gran pret fidel ek ranpli ar mizerikord dan servis Bondie, e pouki bann pese dimoun pardone.

¹⁸ Asterla, parski li finn soufer ek finn konn tantasion, li kapav ed tou bann ki soufer tantasion.