2 Tim 3 - Nouvo Testaman dan Kreol Morisien

Moman difisil dan dernie tan

¹ To bizin kone ki pou ena bann moman difisil dan bann dernie tan.

² Dimoun pou konn zis zotmem ek zot larzan. Zot pou egois, gourman, vantar. Lorgey ek difamasion pou trap zot. Pou ena rebel anver paran. Dimoun pou ingra, zot pou komet sakrilez,

³ zot pou san pitie, ek laenn pou ranpli leker. Zot pou ena parol blesan ek zot pa pou kontrol zot lalang. Zot pou kont tou seki bien.

⁴ Zot pou azir kouma tret; zot fronte telman lorgey amar zot. Olie kontan Bondie, zot kontan plezir.

⁵ Me zot pou fer sanblan zot relizie alor ki zot bann ipokrit. Pa frekant zot.

⁶ Ena parmi ki rant dan bann lakaz zis pou may bann fam ki feb dan zot file, bann fam ki ansene par toutsort kalite move dezir,

⁷ bann fam ki pe touzour aprann me zame kapav gout laverite.

⁸ Parey kouma Zanes ek Zanbres ki ti kont Moiz, ena ki dibout kont laverite. Zot lespri malad ek zot lafwa pa vo nanye.

⁹ Me zot pa pou al lwin, tou dimoun pou dekouver zot move zwe kouma ti ariv pou sa de la.

Dernie instriksion

¹⁰ Twa Timote, to konn mo lansegnman ek manier ki mo viv. To konn mo proze, mo lafwa, mo pasians, mo lamour, mo landirans

¹¹ dan persekision ek dan soufrans ki mo finn viv dan landrwa kouma Antios, Ikoniem, List. Ki mo napa finn sibir? E partou Lesegner finn delivre mwa.

¹² Tou dimoun ki vremem oule viv dan Lekris pou gagn persekision dan zot lavi.

¹³ Me tou bann fos krwayan ek bann sarlatan pou touzour fer progre dan lemal. Zot pou tronp dimoun ek zot pou tronp zotmem.

¹⁴ Twa, to bizin res ferm dan seki mo finn montre twa ek dan seki to finn gagne par tomem. To kone kot tousala sorti.

¹⁵ Depi to lanfans, to konn Lekritir ki kapav donn twa sazes pou ena lafwa dan Lekris Zezi ki sov nou.

¹⁶ Tou seki dan Lekritir, samem Parol Bondie ki servi pou ansegne, repran, korize, fer grandi dan lazistis,

¹⁷ afin ki enn serviter Bondie li kalifie ek ekipe pou fer enn bon travay.