2 Tes 1 - Nouvo Testaman dan Kreol Morisien

Salitasion

¹ Pol, Silvin ek Timote pe ekrir legliz Bondie Papa ek Lesegner Zezi Kris dan Tesalonik:

² Nou souete ki Bondie nou Papa ek Segner Zezi Kris donn zot lagras ek lape.

Aksiondegras e lapriyer

³ Nou bann frer ek ser, nou bizin touzour rann gras Bondie pou zot. Li bien ki nou fer sa, parski zot lafwa pe boukou grandi, e lamour ki sakenn ena ant zot pe osi grandi.

⁴ Akoz samem nou koz lor zot avek boukou fierte dan legliz Bondie. Zot pe tini ferm dan zot lafwa malgre tou bann persekision ek detres ki zot ankor pe siporte.

⁵ Samem prev ki zizman Bondie li drwat, e seki zot pe siporte la, li pou rann zot dign Rwayom Bondie, pou ki zot pe soufer.

⁶ Ofet, Bondie li zis; seki fer zot soufer, li pou soufer li osi.

⁷ Bondie pou soulaz zot, ki pe soufer, e parey nou osi. Li pou fer sa kan Lesegner Zezi retourne depi dan lesiel avek so bann anz bien pwisan,

⁸ zot pou vini avek enn laflam dife, pou vanz kont bann ki pa konn Bondie e ki pa obeir Bonn Nouvel nou Segner Zezi Kris.

⁹ Zot pinision pou detrir zot pou touzour e pou separ zot avek prezans Bondie ek pwisans so laglwar.

¹⁰ Letan li vini zour so glorifikasion parmi tou so pep, li pou admire par bann dimoun ki finn krwar dan li e zot osi zot pou parmi akoz zot temwagnaz.

¹¹ Akoz samem nou priye pou zot, nou dimann Bondie ki zot reste fidel ar so lapel e ki so lagras permet zot realiz zot dezir pou fer seki bien e rann zot lafwa aktif.

¹² Alor, nom Segner Zezi pou glorifie dan zot, e zot dan li, dapre lagras Bondie e nou Segner Zezi Kris.