1 Tim 4 - Nouvo Testaman dan Kreol Morisien

Tou seki Bondie kre, li bon

¹ Lespri Sin dir li klerman: dan dernie tan, ena pou abandonn lafwa. Zot prefer swiv bann lespri ki desevwar e ekout bann lansegnman demoniak.

² Pou ena predikater manter, bann ipokrit ki zot konsians finn nepli sansib komsi finn brile ar feray so.

³ Zot pou ansegn ki fode pa marye, e zot defann manz sertenn nouritir. Pourtan Bondie finn kre sa bann nouritir la afin ki bann krwayan ki konn laverite kapav rann li gras.

⁴ Tou saki Bondie kre, li bon. Nanye pa bizin zete, me akeyir plito avek remersiman.

⁵ Avek parol Bondie ek lapriyer, nouritir vinn sin; samem fer plezir Bondie.

Enn bon serviter Zezi Kris

⁶ Si to expoz tou sa bann parol la ar bann frer ek ser, to pou vinn enn bon serviter Zezi Kris. Zot pou trouve ki to pe nouri twa avek parol lafwa e ki to pe swiv bon lansegnman avek serye.

⁷ Les dekote bann zistwar payin, bann palab e tou sort komeraz. Abitie twa viv dan latasman avek Bondie.

Latasman avek Bondie pli itil

⁸ Li pa sitan itil ki to okip to lekor, me li pli bon ki to met to latet pou swiv Bondie parski li promet twa lavi zordi ek pou leternite.

⁹ Sa enn parol sir ki tou dimoun bizin aksepte dan fon zot leker.

¹⁰ Kan nou lite, kan nou debat nou montre ki nou lesperans baze dan Bondie vivan ki Sover tou dimoun, Sover bann ki ena lafwa.

¹¹ Lor sa bann zafer lamem ki to bizin insiste ek ansegne.

Enn lexanp

¹² Mo napa oule ki personn souzestim twa akoz to enn zenes. Okontrer, vinn enn lexanp pou zot par to parol, to lamour, to lafwa, to manier viv.

¹³ Ziska ki mo vini, konsakre to letan pou etidie Lekritir, fer bann predikasion ek donn lansegnman.

¹⁴ Pa negliz don lagras ki to finn resevwar kan bann profet ti pronons parol dan to faver e group bann ansien ti inpoz lame lor twa.

¹⁵ Pran tousala aker, donn twa afon dan to travay, persevere. Lerla, tou dimoun pou trouv to progre.

¹⁶ Vey lor twa ek lansegnman ki to done. Persevere. Koumsamem to pou sov tomem anmemtan ki to sov bann ki ekout twa.