1 Tes 4 - Nouvo Testaman dan Kreol Morisien

Enn lavi ki fer plezir Bondie

¹ Finalman frer ek ser, zot finn aprann avek nou kouma zot bizin konport zot pou fer plezir Bondie, e zot pe deza fer li. Asterla nou dimann zot e nou sipliy zot lor nom Segner Zezi, pou fer plis ankor.

² Parski zot kone ki linstriksion nou finn donn zot atraver Segner Zezi.

³ Samem volonte Bondie: ki zot viv enn lavi sin, e pa enn lavi imoral.

⁴ Ki sakenn kapav kontrol so prop lekor. Sak zom bizin kone kouma viv avek so fam, dan enn fason sin e respektab.

⁵ Pa les zot domine par bann move dezir parey kouma bann payin ki pa konn Bondie.

⁶ Dan sa zafer la, ki personn ant zot pa fer dimal so prosin oubien abiz lor li. Nou finn deza dir zot sa avan, la nou pe averti zot ki Bondie pou pini bann ki komet sa bann fot la.

⁷ Bondie pa finn apel nou pou viv dan imoralite, me pou viv enn lavi sin.

⁸ Akoz samem, dimoun ki rezet sa lansegnman la, li pa pe rezet enn zom me Bondie ki donn osi so Lespri Sin.

⁹ Asterla, konsernan lamour pou bann frer ek ser, nou pa bizin ekrir zot lor la, parski zot finn aprann zotmem ar Bondie kouma kontan zot prosin.

¹⁰ Biensir, zot kontan tou bann frer ek ser dan Masedwann. Me nou sipliy zot pou fer ankor plis.

¹¹ Zot bizin ena sa dezir pou viv trankil, pou get zot prop zafer e pou travay avek zot prop lame parey kouma nou ti rekomann zot.

¹² Par sa fason la, zot pou gagn respe bann ki pa krwayan, e zot pa pou depann lor personn.

Retour Lesegner

¹³ Frer ek ser, nou pa anvi ki zot res dan lignorans konsernan bann dimoun ki finn mor, pou zot pa tris kouma bann lezot dimoun ki pena lesperans.

¹⁴ Nou krwar ki Zezi finn mor e resisite, alor atraver Zezi, Bondie pou revey bann ki finn mor dan Lesegner.

¹⁵ Dapre parol Bondie, ala seki nou deklare: nou ki vivan e ki pou ankor la kan Lesegner retourne, nou pa pou pas devan zot.

¹⁶ Kan zot pou tann lavwa arkanz, tronpet pou sone, Lesegner limem pou desann; dimoun ki finn mor dan Kris pou resisite anpremie.

¹⁷ Apre sa, nou ki ankor vivan, nou pou mont ansam ar zot dan niaz pou zwenn Lesegner anler e nou pou ar li pou toultan.

¹⁸ Akoz samem zot bizin ankouraz sakenn ant zot avek sa bann parol la.