1 Pi 4 - Nouvo Testaman dan Kreol Morisien

Nouvo lavi bann krwayan

¹ Lekris finn soufer dan so lekor; zot osi, zot bizin ena mem konviksion, parski kan kikenn finn soufer dan so lekor, savedir li finn kas lasenn pese,

² pou kapav viv leres zot lavi lor later pa dapre bann dezir imin me dapre volonte Bondie.

³ Zot finn deza pas enn kantite letan fer seki bann payin kontan fer: parey kouma viv dan debos, kraze par move dezir, soular ek ador bann idol.

⁴ Asterla bann payin etone parski zot refiz partisip dan sa bann move kondwit la e bannla insilte zot.

⁵ Me zot bizin rann kont Bondie pou zot aksion, li ki touzour pare pou ziz bann vivan parey kouma bann mor.

⁶ Akoz samem nou pres Bonn Nouvel ar bann mor, parski mem si zot finn zize dan zot lekor parey kouma tou dimoun, zot pou kapav viv dapre lansegnman Bondie dan zot lespri.

Bon administrater bann don Bondie

⁷ Lafin tou kitsoz pe aprose. Zot bizin serye ek disiplinn zotmem pou zot kapav priye.

⁸ Avan tou, kontan zot kamarad, parski lamour pou fer zot pardonn boukou pese lezot.

⁹ Ouver zot laport ar tou dimoun san ki zot plegne.

¹⁰ Sakenn, parey kouma enn bon serviter, servi bien bann diferan kalite lagras ki Bondie finn donn zot.

¹¹ Si kikenn koze, li bizin transmet mesaz Bondie; seki servi, li bizin servi avek lafors ki sorti kot Bondie, pouki par Zezi Kris, nou kapav glorifie Bondie dan tou kiksoz.

¹² Mo bann kamarad, pa bizin ki zot etone par sa bann eprev la kouma dir kiksoz etranz pe arive.

¹³ Okontrer, zot bizin kontan ki zot pe partaz soufrans Kris, pouki zot kapav gonfle ar lazwa ek kontantman kan li revel li dan so laglwar.

¹⁴ Sa enn benediksion pou zot si zot pe gagn insilte akoz zot disip Kris, savedir Lespri Bondie ek Lespri so laglwar res ar zot.

¹⁵ Ki personn parmi zot pa soufer akoz li enn kriminel, enn voler, enn bandi ou akoz li finn mel dan zafer ki pa regard li.

¹⁶ Me si kikenn soufer akoz li Kretien, fode pa ki zot konsider sa kouma enn dezoner; glorifie plito Bondie parski zot port so nom.

¹⁷ Ler finn arive kot zizman pou koumanse lor pep Bondie; si li koumans avek nou, kouma sa pou ete avek lezot ki dezobeir Bonn Nouvel ki sorti kot Bondie?

¹⁸ E kouma Lekritir dir nou: “Si li difisil pou enn zis sove, ki pou arive ar bann ki move e ki pe begn dan pese?”

¹⁹ Alor bann ki pe soufer akoz volonte Bondie, ki zot kontigne fer seki bien e zot soumet devan zot Kreater ki gard touzour so promes.