1 Ko 8 - Nouvo Testaman dan Kreol Morisien

Lor size sakrifis ki ofer bann idol

¹ Asterla mo pou ekrir lor manze ki dimoun ofer kouma sakrifis pou bann idol. Nou kone ki “Tou dimoun ena konesans.” Konesans gonfle latet ar lorgey, me lamour fer lakominote vinn pli for.

² Seki krwar li konn kiksoz li pa ankor konn tou seki bizin kone.

³ Me dimoun ki kontan Bondie, Bondie osi kontan li.

⁴ Alors, lor size manz nouritir ki finn ofer idol, nou kone ki enn idol pa reprezant nanye dan lemonn, e ki ena enn sel Bondie.

⁵ Mem si swadizan ena bann bondie dan lesiel ou lor later - ofet, ena boukou bondie ek segner -

⁶ me pou nou ena enn sel Bondie, nou Papa, ki finn kre tou kiksoz, e par li ki nou ena lavi. Ena osi enn sel Segner, Zezi Kris; par li tou kiksoz existe e par li nou ena lavi.

⁷ Me pa tou dimoun ki konn sa laverite la. Ena ki telman abitie frekant bann idol, ki mem asterla zot manz seki finn sakrifie komsi li vremem finn ofer bann idol. Zot konsians feb e zot santi zot sali par sa manze la.

⁸ Pourtan pa enn kiksoz ki nou manze ki pou fer nou vinn pli pre ar Bondie. Nou pa perdi nanye akoz manze, e nou pa gagn nanye akoz manze.

⁹ Alor to bizin fer atansion ki sa liberte ki to servi la li pa fer enn lot ki feb dan lafwa tom dan lerer.

¹⁰ Si kikenn ki feb trouv twa ki enn for dan konesans pe manze dan enn tanp idol, to pa panse ki sa pou ankouraz li manz seki finn ofer bann idol?

¹¹ Akoz to konesans enn frer ki feb pou tonbe, samem frer pouki Lekris finn donn so lavi.

¹² Kan zot fer pese koumsa kont zot bann frer, ek bles zot konsians, zot pe fer pese kont Lekris limem.

¹³ Akoz sa, si nouritir ki lakoz ki fer enn frer ou enn ser tom dan lerer, zame mo pa pou manz laviann ankor.