1 Ko 16 - Nouvo Testaman dan Kreol Morisien

Kolekt anfaver bann krwayan

¹ Asterla nou vinn lor kolek ki pe fer pou lepep Bondie dan Zide. Zot bizin swiv instriksion ki mo finn donn bann legliz dan Galasi.

² Premie zour lasemenn sakenn parmi zot bizin met dekote enn som larzan dapre so reveni. Fode pa atann mwa vini pou ramas sa kas la.

³ Letan mo vini lerla zot pou swazir dimoun ki pou al Zerizalem ar zot kontribision. Mo pou donn zot enn let pou prezant zot.

⁴ Si li vo lapenn ki mo ale, lerla zot va akonpagn mwa.

Pol so bann plan

⁵ Mo pou vizit zot letan mo fini pas Masedwann; mo oblize al Masedwann.

⁶ Kikfwa mo pou pas enn letan kot zot, li mem posib mo pas liver net kot zot. Koumsa zot va ed mwa kontign mo larout, la kot mo pou ale.

⁷ Mo pa oule zis pas enn tiletan kot zot, mo souete li enn long letan, si Lesegner permet.

⁸ Me mo pou res Efez ziska Lapantkot.

⁹ Laport finn ouver angran pou fer enn travay isi, mem si ena bann adverser.

¹⁰ Si Timote vini, fer enn manier ki li pena okenn freyer, parski li pe travay parey kouma mwa dan travay Lesegner.

¹¹ Ki personn pa mepriz li. Okontrer ed li kontign so vwayaz dan lape pou li kapav retourn kot mwa. Mo pe atann li vini ansam avek bann frer e bann ser.

¹² Aster, konsernan nou frer Apolos. Mo finn ankouraz li fer zot enn vizit ansam avek lezot frer, me li pa interese vini asterla. Kouma li gagn enn lokazion li pou vini.

Bann dernie parol

¹³ Res lor zot gard, ferm dan lafwa, gard kouraz ek lafors.

¹⁴ Met lamour dan tou seki zot fer.

¹⁵ Frer ek ser, zot kone ki Stefanas ek so fami ti bann premie konverti dan Akai. Zot finn devoue zotmem pou servi lepep Bondie. Mo sipliye zot, frer ek ser,

¹⁶ obeir sa kalite dimoun la e lezot seki travay ansam ar zot.

¹⁷ Vizit Stefanas, Fortinatis ek Akais finn fer mo boner, parski sa ranplas zot labsans.

¹⁸ Bannla finn fer mo lespri trankil, kouma finn fer sa osi pou zot. Bizin konn apresie sa kalite dimoun la.

¹⁹ Bann legliz dan provins Lazi salye zot. Akila ek Prisil ansam ar legliz ki zwenn dan zot lakaz, avoy zot salitasion dan Lesegner.

²⁰ Tou bann frer-ser avoy zot bonzour. Anbras zot kamarad dan lamitie Lesegner.

²¹ Mwa, Pol, mo pe ekrir sa bonzour la avek mo prop lame.

²² Si kikenn pa kontan Lesegner, ki li modi. Maranata. Vini Segner!

²³ Ki lagras Lesegner Zezi res ar zot.

²⁴ Mo avoy zot mo lamour dan lakominion avek Zezi Kris. Amen.