୧ତେସ 4 - ପୁଃନି ମେ଼ରା କୁୱି ପୁଃନି ମେ଼ରାମାହାପୂରୁ ରା଼ହାଁ ଆ଼ନିଲେହେଁ ନୀଡିନାୟି 1 ଏ଼ ମା଼ ତାୟିୟାଁତେରି, ମାହାପୂରୁଇଁ ରା଼ହାଁ କିୱି କିୟାଲି ଏ଼ନିକିଁ ନୀଡିନାୟି ମାନେ, ଏ଼ଦାଆଁ ମୀରୁ ମା଼ ତା଼ଣାଟି ଏ଼ନିକିଁ ଜା଼ପାମାଞ୍ଜେରି ଅ଼ଡ଼େ ଏଲେକିହିଁଏ ନୀଡାମାଞ୍ଜେରି, ସାମା ଏ଼ଦାଣିକିହାଁ ହା଼ରେକା ନେହିଁ କିୟାଲି ମା଼ମ୍ବୁ ପ୍ରବୁ ଜୀସୁ ଦ଼ରୁତଲେ ମିଙ୍ଗେ ହା଼ରେକା ବାତିମା଼ଲି ମାଞ୍ଜାନମି । 2 ଏ଼ନାଆଁତାକି ଇଚିହିଁ ମା଼ମ୍ବୁ ପ୍ରବୁ ଜୀସୁ ତା଼ଣାଟି ମିଙ୍ଗେ ଏ଼ନି ଏ଼ନି ହୁକୁମି ହୀହାମାଞ୍ଜାତମି ଏ଼ଦାଆଁ ମୀରୁ ପୁଞ୍ଜାମାଞ୍ଜେରି । 3 ମୀରୁ ସୁଦୁ ଗାଟାତେରି ଆ଼ହାଁ ମାଞ୍ଜୁ, ଈଦିଏ ମାହାପୂରୁତି ଅଣ୍ପୁ ତଲେ ମାଞ୍ଜୁ, ଅ଼ଡ଼େ ବାରେ ଲେହେଁତି ଦା଼ରିକାମାଟି ଏଟ୍କା ଆ଼ହାନା ମାଞ୍ଜୁ । 4 ମାହାପୂରୁଇଁ ପୁନାଆତି ଲ଼କୁ ଲେହେଁ ଆଙ୍ଗାତି ଜୂପ୍କାତି ଅଣ୍ପୁ ତଲେ ମାନାଆନା ମୀରୁ ରଅ ରଅତେରି ମୀ ମୀ ଡକ୍ରି ତଲେ ଲ଼କୁ କାନୁତା ସୁଦୁ ଅ଼ଡ଼େ ମା଼ନି ତଲେ ମାଞ୍ଜାଲି ପୁଞ୍ଜୁ । 5 ଇଞ୍ଜାଁ ମାହାପୂରୁଇଁ ପୁନାଆତି ଏଟ୍କା କୂଡ଼ାତି ଲ଼କୁ ଲେହେଁ ଆଙ୍ଗାତି ଅଣ୍ପୁ ତଲେ ମାନାଆନା । 6 ଏମ୍ବାଟିଏ ଈ ବାରେ କାତାତା ଆମ୍ବାଆସି ତାନି କ୍ରୀସ୍ତାନା ତାୟିଇଁ ଦ଼ହ କିଆପେସି, କି ନା଼ଡ଼ି କିଆପେସି, ଏ଼ନାଆଁତାକି ଇଚିହିଁ ପ୍ରବୁ ଏଲେ କିନାଣାଇଁ ଡଣ୍ତ ହୀନେସି ଇଞ୍ଜିଁ ମା଼ମ୍ବୁ ତଲିଏ ମିଙ୍ଗେ ୱେସାନା ଜାଗ୍ରାତା କିହାଁ ସା଼କି ହୀହାମାଞ୍ଜାତମି । 7 ଇଚିହିଁ ମାହାପୂରୁ ମାଙ୍ଗେ ପ଼ଲ୍ଆଗାଟି କାମାତା ନୀଡାଲି ଆ଼ଏ, ସାମା ସୁଦୁ ଗାଟାତାୟି ଆୟାଲି ଆ଼ଚାମାଞ୍ଜାନେସି । 8 ଏ଼ନାଆଁତାକି ଇଚିହିଁ ଆମ୍ବାଆସି ଈ ଜା଼ପ୍ନାଣି ଅ଼ପଅସି, ଏ଼ୱାସି ମାଣ୍ସିଇଁ ଆ଼ଏ, ସାମା ମିଙ୍ଗେ ମୀ ହିୟାଁତା ଆମିନି ମାହାପୂରୁ ସୁଦୁଜୀୱୁ ହୀହାମାଞ୍ଜାନେସି ଏ଼ୱାଣାଇଁ ଅ଼ପଅସି । 9 ତାୟିୟାଁ ଅ଼ଡ଼େ ତାଙ୍ଗିସ୍କାଣି ଜୀୱୁ ନ଼ନାଣି ରା଼ଚାଲି ଲ଼ଡ଼ା ଆ଼ଏ, ଇଚିହିଁ ମୀରୁ ମୀରୁଏ ଜୀୱୁ ନ଼ୱିଆୟାଲି ମାହାପୂରୁ ତା଼ଣାଟି ଜା଼ପାମାଞ୍ଜେରି । 10 ଅ଼ଡ଼େ, ମୀରୁ ଏଲେକିହିଁଏ ମାକିଦନିୟାତା ମାନି ବାରେ କ୍ରୀସ୍ତାନା ତାୟିୟାଁ ଅ଼ଡ଼େ ତାଙ୍ଗିସ୍କାଣି ଜିକେଏ ଜୀୱୁ ନ଼ହିମାଞ୍ଜେରି । ସାମା ଆତିହିଁ ଜିକେଏ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମୀରୁ ଏ଼ନିକିଁ ଅ଼ଡ଼େ ଆଗାଡ଼ା କିହାଲି ରା଼ହାଁ କିଦେରି, 11 ଅ଼ଡ଼େ ମିଙ୍ଗେ ହୀପ୍କିଆ଼ହାମାନି ମା଼ ହୁକୁମି ଲେହେଁ ମୀରୁ ଏ଼ନିକିଁ ହିତ୍ଡ଼ି ତଲେ ନୀଡା ବାତ୍କିଦେରି, ଜାହାରା କାମାତା ହିକିଦେରି ଅ଼ଡ଼େ ଜାହାରା କେୟୁତଲେ କାମା କିହାଲି ପା଼ଡ଼ାଆ଼ତାୟି ଇଞ୍ଜିଁ ଅଣ୍ପାଦୁ, ଈଦାଆଁତାକି ମା଼ମ୍ବୁ ମିଙ୍ଗେ ବାତିମା଼ଲି ମାଞ୍ଜାନମି, 12 ଏ଼ନିକିଁ ପାଙ୍ଗାତି ଲ଼କୁତାକି ମୀରୁ ନେହିଁ ମାଣ୍କି ତ଼ହ୍ନାତେରି ଆ଼ଦେରି ଇଞ୍ଜାଁ ମିଙ୍ଗେ ଏ଼ନାୟି ଜିକେଏ କା଼ତାରା ଆୟେଏ । ପ୍ରବୁତି ୱେଣ୍ତା ୱା଼ନାୟି 13 ଏ଼ ମା଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ବା଼ର୍ସୁ ହିଲାଆ ଏଟ୍କାତି ବାରେ ଲ଼କୁ ଲେହେଁ ମୀରୁ ଏ଼ନିକିଁ ଦୁକୁ ଗାଟାତେରି ଆ଼ଅତେରି, ଈଦାଆଁତାକି ହା଼ତାରି କାତାତି ମୀରୁ ପୁନାଆନା ମାଞ୍ଜୁ ଈଦି ମା଼ ଅଣ୍ପୁ ଆ଼ଏ । 14 ଏ଼ନାଆଁତାକି ଇଚିହିଁ ମା଼ର ନାମିନାୟି, ଜୀସୁ ହା଼ହାନା ୱେଣ୍ଡେ ନିଙ୍ଗାମାନେସି, ଆତିହିଁ ମାହାପୂରୁ ଜୀସୁ ତା଼ଣାଟି ହା଼ହାମାନି ଲ଼କୁଣି ଏଲେଆ଼ହିଁ ତାନିତଲେ ତାନେସି, ଈଦାଆଁ ଜିକେଏ ନାମିନାୟିମାନେ । 15 ମା଼ମ୍ବୁ ପ୍ରବୁତି ବ଼ଲୁଲେହେଁ ମିଙ୍ଗେ ଈଦାଆଁ ୱେସିମାଞ୍ଜାନମି, ମା଼ର ଏଚେକା ଲ଼କୁ ପ୍ରବୁତି ୱେଣ୍ଡେ ୱା଼ନି ଦିନା ପାତେକା ନୀଡାହାଁ ଡ଼ୟା ମାନାୟି, ମା଼ମ୍ବୁ ଏ଼ନିକିଁ ଜିକେଏ ହା଼ହାମାନି ଲ଼କୁତି ନ଼କିତା ହାଲଅମି । 16 ଏଚେଟିଏ ପ୍ରବୁତି କାଜା ଦୂତୁତି ହୁକୁମି ହୀହାମାନି ହା଼ଡା ଅ଼ଡ଼େ ମାହାପୂରୁତି ତୀତ୍ରି ମ଼ହ୍ରି ହା଼ଡାତଲେ ଲାକପୂରୁଟି ରେ଼ଚା ୱା଼ନେସି, ଇଞ୍ଜାହାଁ କ୍ରୀସ୍ତଇଁ ନାମାହାଁ ହା଼ହାମାନାରି ଏ଼ୱାରି ନ଼କେଏ ନିଙ୍ଗିନେରି; 17 ଅ଼ଡ଼େ ଡା଼ୟୁ ଏ଼ ଦିନା ନୀଡାମାନି ଲ଼କୁତାୟି ବାରେ, ଏ଼ୱାରିତଲେ ପ୍ରବୁଇଁ ବେଟାଆ଼ହାଲି ଦୂନ୍ଦ୍ରା ତଲେ ୱାର୍ଇ ହା଼ଗୁତା ଅ଼ୱିଆ଼ନାୟି ଏଲେକିହିଁଏ ମା଼ର ପ୍ରବୁ ତଲେ କା଼ଲାକା଼ଲା ତାକି ଡ଼ୟିନାୟି । 18 ଏ଼ନାଆଁତାକି ଇଚିହିଁ ଈ ବାରେ କାତା ଆସାନା ମୀରୁ ମୀରୁଏ ରଅତେରି ରଅଣାଇଁ ସା଼ସା ହୀୱି ଆ଼ଦୁ । |
The New Testament in Kuvi Language © The Word for the World International and Kuvi Translation Samithi, Semiliguda, Koraput, Odisha 2020