Yoana 4 - Nouveau Testament en Kilega

Yesu Ekuenda ku Galela.

¹ Gamenyine Mukota buno baFalese bongule buno, Yesu atinga Yoana ku beigisibua nu ku kubatizia

² (tondo Yesu wenyene ntabatizagia, tondo beigisibua bage ubabatizagia tugu),

³ atukile ku Yudaya, nu asubanizie lingo ku Galela.

Mukikulu wa Samalia.

⁴ Nu buamutunganene buno atinge mu Samalia.

⁵ Avule ku muino wa Samalia, izina liago Sikala, buigi na lilio isoa lia Yakobo liakasaga muana wage Yosefu:

⁶ nu gago ugabezaga kanua balongo ka Yakobo, Yesu akutilue na lugendo, eikeide buigi na kanua ba­longo. Zabezaga zise nkungu mutuba.

⁷ Mukikulu wa mu Samalia avule kutaga mazi. Yesu amubuide bune, Nkase mazi ma kunua.

⁸ Kubuno beigisibua bage babezaga basila kuenda ku muino kukunza idia.

⁹ Nu wozo mukikulu wa mu Samalia amu­buide bune, Buni bunili nobe uwe muYuda ukutunda nkukase mazi, nunne nili mukikulu wa mu Samalia? (Kubuno baYuda nu ba­Samalia tabakugomanagia.)

¹⁰ Yesu amuakuide bune, Songo wizi lukaso lua Kalaga, nu nazi ukukubuzia, buno nkase mazi ninue, songo unamusegile, nuwe anakukasile mazi ma kalamo.

¹¹ Wozo mukikulu amubuide bune, Mukota, ntuli na kituma kia kutaga, kubuno kanua balongo keli kazindu: nu kuni kuwasangile mazi ma kalamo?

¹² Ndi uwe watinga tateisue Yakobo, watukasile kanua balongo kakano, kanuaga muko na bana bage nu bituganua biage?

¹³ Yesu amuakuide bune, Wanua ku mazi mamano anakua na mpusia lingo:

¹⁴ tondo wanua ku mazi manamukasa ntanakua na mpusia nunse; tondo mazi manamukasa manaba mueli anga kanua balongo ka mazi kakukulungukaga mu kalamo katanakuzinda.

¹⁵ Wozo mukikulu amubuide bune, Mukota, nkase mamo mazi buno nsikue na mpusia lingo, buno nsivue kutaga lingo gano.

¹⁶ Yesu amubuide bune, Enda umane iba wobe, uvue nage gano.

¹⁷ Wozo mukikulu amuakuide bune, Nsili na wamulume. Yesu amubuide bune, Watenda buligo nunse, ntuli na wamulume:

¹⁸ kubuno wabezaga na bamulume batano, nu wozo uli kueli kano kaluma nteli iba wobe: watenda buligo.

¹⁹ Wozo mukikulu amubuide bune, Mukota, namenya buno, uli mulengania.

²⁰ Batateisue bakumbaminaga ku muiduko wono; tondo inyue mukutenda buno, mu Yelusalema muli kiziki kiatunganana kuku­mbaminuamo.

²¹ Yesu amubuide bune, Mukikulu, nkatizie, nkungu zikakuka tamukakumbamina Tatane ku muiduko wono, aba ku Yelusalema.

²² Inyue mukukumbamina kimutizi: isue tuku­kumbamina kituizi; kubuno lonio lukutuka ku baYuda.

²³ Tondo nkungu zikakuka, nu ziseli, buno bakumbamizi ba lebelebe bakukumbamina Tatane mu muuza nu bulili: kubuno Tatane ekulonda bantu anga babano buno bamukumbamine.

²⁴ Kalaga eli Muuza; nubo bansania bakumukumbamina batunganana kumukumbamina mu muuza nu mu bulili.

²⁵ Wozo mukikulu amubuide bune, Nkumenya buno Masiya ekuvua (ekumanua buno, Klisto): ga­kavua, akatumenesia bunsania.

²⁶ Yesu amubuide bune, Unne wono gukutenda nage.

²⁷ Nu beigisibua bage bavule mu nkungu zezo; nu bangamine kubuno atendaga na mukikulu; takuli wamubuzizie bune, Kikizi kiukulonda? aba buni bukutenda nage?

²⁸ Nu wozo mukikulu asigile idega, nu endile ku muino, nu abuide bantu bune,

²⁹ Vuazi mulole muntu wabulaga misako insania zinakitaga: ndi wono nteli Klisto?

³⁰ Batukile ku muino, nu bamuvuilide.

³¹ Mu zezo nkungu beigisibua bamusegile bune, Labi, lia.

³² Tondo ababuide bune, Nili neidia limutizi.

³³ Beigisibua babuzanizie bune, Ndi kuli muntu wamuvuilide neidia?

³⁴ Yesu ababuide bune, Idia liane lili kukita kusombola kua wozo wansingile, nu kusila mulimo wage.

³⁵ Ndi tamunatenda buno, kusila kua miezi inazi nti matu­bulo meika? Nkumubula bune, Galaminazi, mulole masoa, kubuno mese mela nu mese buigi na kutubulua.

³⁶ Ukutubula eli na mutali, nu ekukundamania biguma biage ku kalamo katanakuzinda; bubo muyiki nu mutubuzi babogeboge gamozi.

³⁷ Bubuno buligo, Umozi ekuyikaga, nu ungo ekutubulaga.

³⁸ Namusingile kutubula bimutakitide mulimo; bango bakitile mulimo, nuinyue muingila mu mulimo wabo.

Basamalia Beingi Bekukatizia Yesu.

³⁹ Nu baSamalia bengi ba mu muino wozo bamukatizizie ku kutenda kua mukikulu kuatendaga bune, Ambuide bunsania buna­kitaga.

⁴⁰ Gamuvuilide baSamalia, bamusegile buno, ekale nabo nu eiyombekile kuko bindi bibili.

⁴¹ Nu bango bantu beingi bamukatizizie ku kutenda kuage;

⁴² nu babuide mukikulu bune, Tuamukatizia kano kaluma, ta ku kutenda kuobe: tondo kubuno tuiyunguila isue benyene, nu tuamenya nunse buno, wono u Monia wa kisi.

⁴³ Nu gatingile bindi bibili atukile kuko, nu endile ku Galela.

⁴⁴ Kubuno Yesu wenyene atendile bune, Mulengania ntekuanzua kuabo.

⁴⁵ Gabasile ku Galela, baGalela bamusekede, kubuno bamonine ku misako insania zakitaga ku Yelusalema mu nkungu za kisagulo; kubuno babo bendile ku kisagulo.

Yesu Ekonia Muana wa Mukota.

⁴⁶ A vule lingo ku Kana wa Galela, kuagalukagia mazi buno mabe maku. Nu mukambi wa mukota abezaga na muana wage wasambaga ku Kapenuma.

⁴⁷ Gongule ku musagu buno, Yesu atuka ku Yudaya, nu avua ku Galela, amuendede, nu amusegile bune, Vua, wonie muana wane; kubuno ese buigi na kulekana.

⁴⁸ Yesu amubuide bune, Ndi inyue tamukumona ku tulolesio nu migeleko, inyue tamunakatizia nunse.

⁴⁹ Mukambi wa mukota amubuide bune, Mukota, vua wonie muana wane nti ntelekana.

⁵⁰ Yesu amubuide bune, Enda; muana wobe alama. Wozo mukambi akatizizie bubo buamubuide Yesu, nu endile.

⁵¹ Nu gendaga mu nzila, bakambi bage bakulumene nage, bamubuide bune, Muana wobe alama.

⁵² Ababuzizie nkungu zonine. Ba­mubuide bune, Walubi mu nkungu mutuba kamo muzuzo wasilile.

⁵³ Bubo isi amenyine buno, mu nkungu zezo zamubuide Yesu buno, muana wobe alama: nu akatizizie na numba zage insania.

⁵⁴ Wono uli mugeleko weibili wakitile Yesu gatukile mu Yudaya, gendile ku Galela.