Yoana 21 - Nouveau Testament en Kilega

Yesu Amonekako Lingo na Beigisibua Bage ku Kiziba kia Tibelia.

¹ Kusila kua bubo Yesu eidolesezie lingo ku beigisibua bage ku kiziba kia Tibelia; nu eidolesezie anga bubo.

² Simona Petelo, nu Toma wamanagua Didumu, nu Natanaele wa Kana wa Galela, nu bana ba Zebedayo, nu bango babili ba ku beigisibua bage, babezaga gamozi.

³ Simona Petelo ababuide bune, Nenda kuzuba biena. Nubo bamubuide bune, Nuisue tukuenda nobe. Bendile, nu beingide mu buato; tondo mu kindi kikio tabeitile kena.

⁴ Nu gakeide busi nindunindu, Yesu emanine geisokelo: tondo beigisibua tabamenyine buno u Yesu.

⁵ Yesu ababuide bune, Bana bane, ndi muli neidia? bamubuide bune, Kilo.

⁶ Nu ababuide bune, Isazi kakila ku mukukumo wa kuseidume kua buato, nu muite. Nu bakesile, tondo tabavuamine kukabuluta kubuno kabezaga na biena bingi.

⁷ Tondo wozo muigisibua watundagua na Yesu abuide Petelo bune, U Mukota. Gongule Petelo buno, Mukota, avualile nsulu zage (kubuno abezaga mundulu) nu eiyisile mu kizi­ba.

⁸ Tondo bango beigisibua bavule na buato bukeke (kubuno tababezaga bulazi na mutili, tugu kuabezaga bulazi bua metele nkama ibili), nu babulutile kako kakila kabezaga mu biena.

⁹ Ga­beikile ku mutili, bamonine ku makangania ma keiya, nu gantata gamo gabezaga gatalikua kiena nu kampampa.

¹⁰ Yesu ababuide bune, Vuazi na biena bimuitaga.

¹¹ Tondo Simona Petelo eingide mu buato, nu abulutile kakila ku mutili, keiyala na biena binene, lukama nu makumi matano nu bisatu: nu biena biabezaga bingi nunse, tondo kakila takatikile.

¹² Yesu ababuide bune, Vuazi tanga mulie. Nu takuli muigisibua wage umozi wagelekile kumu­buzia bune, Uwe u nazi? bamenyine buno, u Mukota.

¹³ Yesu atolile kampampa, nu abakasile, nu biena lingo.

¹⁴ Lilio ulia masatu Yesu ekumonekako na beigisibua bage kusila kua kuyuka kuage ku bakuzi.

Yesu Ekutenda na Petelo.

¹⁵ Nu gabasilile kulia, Yesu abuide Simona Petelo bune, Simona, muana wa Yona, ndi wantunda kutinga bibino? amubuide bune, Mukota uwe wizi buno nakuelama. Yesu amubuide bune, Lisia biana biane bia mikoko.

¹⁶ Amubuzizie lingo bune, Simona muana wa Yona, ndi wantunda? E Mukota; uwe wizi buno naku­elama. Amubuide bune, Langa mikoko zane.

¹⁷ Amubuzizie lia masatu bune, Simona, muana wa Yona, ndi wanelama? Petelo abeide na kabebe kubuno, amubuzizie lia masatu buno, ndi wane­lama? Amubuide bune, Mukota wizi binsania nu ukumenyinina buno, nakuelama. Yesu amubuide bune, Lisia mikoko zane.

¹⁸ Lebelebe, lebelebe, nkukubula bune, Gawabezaga musikila, wa­bezaga ukuikanda uwenyene, nu kuenda kukutunda: tondo gokaba use mukungu, ukalambia maboko, nu ungo akakukanda nu kukuikia kutakutunda.

¹⁹ Amubuide bubo kumukengelezia bukaba lukita lua kukua kuage, buakaganuna Kalaga. Nu gasilile kutenda bubo, amubuide bune, Nyange.

Yesu Ekusambala bua Yoana.

²⁰ Petelo agalukile nu amonine ku wozo muigisibua watundagua na Yesu ekumuyanga; uwozo wegaminaga ku bukuba buage mu nkungu zeidia lia muigolo, wozo wamubuzizie bune, Mukota nazi wakugabule?

²¹ Gamonine Petelo ku wozo muigisibua abuide Yesu bune, Mukota wono akakita kikizi nuwe?

²² Yesu amubuide bune, Ndi natunda wono alame aba gankavua, nti uli nabo buni? tondo nyange tugu.

²³ Nu bubo buakukile ku beigisibua bansania buno wozo muigisibua ntakakua: tondo Yesu ntamubuide buno, ntakakua; tondo amubuide tugu buno ndi natunda wono alame aba gankavua, nti uli nabo buni?

Yoana Asanzile Bunsania Buligo.

²⁴ Muigisibua wozo uwalongekile bubo, nu uwasanzile bubo: nuisue tuamenya buno bulongeki buage buli bulili.

²⁵ N u kuli bungo buingi buakitile Yesu, nu songo buasanzilue bumozi bumozi, nkukengela buno kisi kinsania takinakosezie mi­kanda insania zinasanzilue.