Yoana 20 - Nouveau Testament en Kilega

Kuyuka kua Yesu ku Bakuzi.

¹ Mu busi bua kulinga kuizinga, Malia wa Magadala avule ku nsinda mu nindunindu, busi tabuzibuka, amonine ku lilio ikozi liatikibua ku nsinda.

² Nu eitumine lubilo ku Simona Petelo, nu ku wozo muigisibua watundagua na Yesu, nu ababuide bune, Batikia Mukota mu nsinda, nu tatuizi kuni kubamubikile.

³ Petelo endile, nu wozo ungo muigisibua, nu bendile ku nsinda.

⁴ Nu beitumine lubilo bobabili: nu wozo muigisibua asasizie kutinga Petelo, nu alingile kubasa ku nsinda;

⁵ nu einamine, nu alolilemo, amonine ku zezo nsulu zabota zili gansi; tondo nteingi­demo.

⁶ Simona Petelo avule amuyanga, nu eingide mu nsinda; nu amonine ku zezo nsulu zabota zili gansi,

⁷ tondo zezo nsulu zabezaga kuitoe, tazabezaga gamozi na zezo ingo nsulu, tugu za­bezaga zagondua mu kingo kibe.

⁸ Bubo nu wozo muigisibua walingaga kubasa ku nsinda, eingidemo, nu amonine kuzo, nu akatizizie.

⁹ Kubuno babezaga tabemenyinina masanzo, buno atunganana kuyuka ku bakuzi.

¹⁰ Babo beigisibua basubizie lingo ku numba zabo.

Yesu Amonekako na Malia wa Magadala.

¹¹ Tondo Malia abezaga emana ku mbuga buigi na nsinda; nu alilaga, einamine, nu alolile mu nsinda.

¹² Nu amonine ku mi­genzi ibili, beli na nsulu zenga bekile, umozi kuitoe nu ungo ku magulu, gago gababikile kitumba kia Yesu.

¹³ Nubo bamubuide bune, Mukikulu, ukulilila kikizi? ababuide bune, Bendile na Mukota wane nu nsizi ku bamubikile.

¹⁴ Nu gasilile kutenda bubo akebetukile kumbusa, amonine ku Yesu emine, ntamenyaga buno u Yesu.

¹⁵ Yesu amubuzizie bune, Mukikulu, ukulilila kikizi? Ukulonda nazi? Nuwe akengelaga buno, wozo eli mulangi weisoa, amubuide bune, Mukota, ndi uwe uwamutukizie kasi mbule ku­wamubikile, nunne nimutole.

¹⁶ Yesu atendile bune, Malia. Nu agalukile, amubuide mu kiEbelo Laboni, buisulilua buno, Musozi.

¹⁷ Yesu amubuide bune, Ntuneitubia kundi; kubuno nsibakama ku Tatane: tondo enda, ku mibuto zane gubabule bune, Nabakama ku Tatane nu soinyue, nu ku Kalaga wane nu Kalaga weinyu.

¹⁸ Malia Magadala endile kusolela beigisibua musagu bune, Namona ku Mukota nu bubuno ubuambulaga.

Yesu Amonekileko na Beigisibua Bage Tondo Toma Ntabezagago.

¹⁹ Gabede buse muigolo lia busi buakulinga buizinga, beigisibua babezaga beigala nibi, kubuno bakuaga baYuda boba, Yesu aba­baside, nu emene kima munkatini muabo, nu ababuide bune, Bobelelazi.

²⁰ Nu gasilile kutenda bubo, abalolesezie maboko mage nu mumpege. Babo beigisibua babogilebogile gabamonine ku Mukota.

²¹ Yesu ababuide lingo bune, Bobelelazi: anga buansingile Tatane; ububo nunne bunkumusinga.

²² Nu gasilile kutenda bubo, abopide, nu ababuide bune Sekelazi Muuza Wasili­lila:

²³ unsania umuasigilila misako za buagi, nti asigililua; nu unsania umutasigilila, nti akasigala na misako za buagi buage.

Yesu Amonekako Lingo na Beigisibua Bage nu Toma Eseligo.

²⁴ Tondo umozi wa ku beigisibua ikumi nu babili, Toma wa­managua Didumu, ntabezaga nabo gabamonaga ku Yesu.

²⁵ Bango beigisibua bamubuide bune, Tuamonine ku Mukota. Tondo we ababuide bune, Ndi nsiamona ku mikolu za misomani mu maboko mage, nu kuingizia munue wane mu matengu ma miko­lu za misomani, nu kuingizia ikasa liane mu mpege zage, nne nsinakatizia nunse.

²⁶ Nu gatingile bindi kinana, beigisibua bage babezaga lingo beigala nibi, nu Toma abezaga nabo, Yesu ababaside, nu nibi zabezaga zigalua, nu emene munkatini muabo, nu ababuide bune, Bobelelazi.

²⁷ Nu abuide Toma bune, Vua na munue wobe, ulole maboko mane; nu vua neikasa liobe, nu ulingizie mu mpege zane: unakivua kutakatizia, tondo katizia.

²⁸ Toma amuakuide bune, Mukota wane nu Kalaga wane.

²⁹ Yesu amubuide bune, Wakatizia, kubuno wamonako: tondo mbogimbogi ku babo bata­monako, nu kukatizia.

Yoana Ekusambala Buasanzilue.

³⁰ Tondo ingo migeleko mingi zakitile Yesu nu nti beigisibua bage bekumona, tazasanzilue mu mukanda wono.

³¹ Tondo bubo buasanzilue, buno mukatizie buno, Yesu eli Klisto, Muana wa Kalaga; nu mu kukatizia muabe na kalamo muizina liage.