Yoana 14 - Nouveau Testament en Kilega

Yesu Ekulaga Beigisibua Bage Buno Akavua Kubatola.

¹ Mitima zeinyu tazizangezange: katiziazi Kalaga, nka­tiziazi nunne.

² Mu numba za Tatane muli biziki bingi, songo tabuligo, songo namubula; tondo nenda kumukulumizizia kiziki.

³ Nu ndi nenda kumukulumizizia kiziki, nkasubia lingo, nu nkamusekela; buno, kuko kundi mukikalagako.

⁴ Nu muizi nzila za kunkuenda.

⁵ Toma amubuide bune, Mukota, tatuizi kukuenda, buni butunamenya nzila?

⁶ Yesu amubuide bune, Nne nili nzila, nu bulili, nu kalamo: takuli muntu unabasa ku Tatane, ndi ntabasila mundi.

⁷ Ndi munizi, kasi muizi Tatane: kutukila kano kaluma mumuizi, nu muamumonineko.

⁸ Filipo amubuide bune, Mukota, tulolesie so, bubo bunatutananina.

⁹ Yesu amubuide bune, Filipo, nne neizizia neinyu, nu uwe ntunizi? Wozo ukumonako nti ekumona ku Tatane, kubuni kukubula buno, nimulolesie Tatane?

¹⁰ Ntukukatizia buno, nili mu Tatane, nu Tatane eli mundi? Nsikuitendela malagi mamano nnenyene; tondo Tatane uli mundi ukukita milimo zage.

¹¹ Nkatiziazi buno, nne nili mu Tatane, nu Tatane eli mundi; ndi ta bubo, kasi nka­tiziazi ku milimo zeno zinkukita.

¹² Lebelebe, lebelebe, nku­mubula bune, Wozo wankatizia akakita nuwe milimo zatinga zezo zinakitaga; kubuno nkuenda ku Tatane.

¹³ Kinsania kimukasega kuizina liane, nkakikita buno Tatane aganunue mu Muana wage.

¹⁴ Ndi mukunsega kokansania kuizina liane, nkakakita.

¹⁵ Ndi muantunda, nti muanze makakizio mane.

Yesu Ekubalaga Muuza Wasililila.

¹⁶ Nu nkasega ku Tatane, nuwe akamukasa ungo Mukasia, buno abe neinyu nkiko zitanakuzinda.

¹⁷ Uwozo, Muuza wa bulili: wozo kisi takinavuama kumusekela; kubuno takikumu­monako, aba takimuizi: tondo inyue mumuizi; kubuno eli neinyu, nu lingo akaba mumuli.

¹⁸ Nsikamusiga buankubi; nkamuvuila.

¹⁹ Nkungu nkeke ba ga kisi tabakamonako lingo; tondo inyue mukumonako: ku kabamba ka buno nkulama, nuinyue mualame nunse.

²⁰ Ku busi bubo mukamenva buno, nili mu Tatane, nuinyue muli mundi, nunne mumuli.

²¹ Wozo ukuanzaga maka­kizio mane, uwozo wantunda; nu atundua na Tatane, nunne nka­mutunda, nu nkedolesia kueli.

²² Yudasa (ta wozo Isakaliote) amubuzizie bune, Mukota, buni bukutenda buno ukeidolesia kutuli, tondo ta ku ba kisi?

²³ Yesu amutendile bune, Ndi muntu antunda, nti anze idagi liane: nu Tatane akamutunda, nuisue tuavue kueli, nu tukekalaga nage.

²⁴ Utantunda, ntekuanza malagi mane; nu idagi limukungua kulio ta liane, tugu lia Tatane, wozo wansingile.

²⁵ Nkumubula bubuno gankili neinyu.

²⁶ Tondo Mukasia, wozo Muuza Wasililila, ukasinga Tatane kuizina liane, we akamu­igisia bunsania, nu akamukengelezia bunsania bunamusambalide.

Yesu Ekubabobelezia.

²⁷ Bubobelelo bunamusigila; nu bubobelelo buane bunamu­kasa; nsikumukasa anga bukukasanaga ba mu kisi. Mitima zeinyu tazizangezange, nu tamukue boba.

²⁸ Mungule idagi linamubuide bune, Nkuenda, nu nkamuvuila lingo. Songo mu­antunda, munabogilebogile, kubuno nkuenda ku Tatane: kubuno Tatane antinga.

²⁹ Kano kaluma nkumubula buteba, gabuabe nti muakatizie.

³⁰ Nsikumubula bingo bingi, kubuno muangati wa kisi esavua, nu nteli na buampa kundi.

³¹ Tondo bakisi tabezi buno, Natunda Tatane, nu anga buankakizizie Tatane, ububo bunkukita. Zanzukazi, tuendazi.