Yoana 12 - Nouveau Testament en Kilega

Yesu Ekulia na Beida Bage mu Betania.

¹ Kuabezaga kuse kuasigala bindi mutuba na kulinga kua kisagulo kiesuluko, Yesu abasile ku Betania, kuabezaga Lazalo wayukizie ku bakuzi.

² Kuko ukubamuyikide idia lia igolo; Malata abezaga ekubakasia; nu Lazalo abezaga umozi wa ku babo babezaga nage ku meza.

³ Malia akatile nkindi za bula­go, bua bukunza bunene, abongezie Yesu zo ku magulu, nu amu­nyonyuene na nzuili zage, numba zizede neiyugo lia bulago.

⁴ Tondo muigisibua wage umozi, Yudasa Isakaliote, use buigi kumugabula, amubuzizie bune,

⁵ Kubuni tamuakunzia bulago bubuno ku falanga nkama isatu, nu zinakasilue bazambi?

⁶ Ate­ndile bubo, ntabezaga na kiombo ku bazambi; tondo abezaga muibi kubuno abezaga neisuku, nu atikizie biabezaga mumo.

⁷ Yesu ababuide bune, Musigazi abulange aba nu ku busi bua kuiyikua kuane.

⁸ Muli na bazambi bindi binsania, tondo tamuli nanne bindi binsania.

⁹ Bantu beingi ba baYuda bongule musagu bune, We eli kuko; tabavuilide Yesu tugu, tondo buno bamone ku Lazalo wozo wayu­kizie ku bakuzi.

¹⁰ Tondo basankoga banene bakalile luango luabo buno, beite Lazalo;

¹¹ kubuno baYuda beingi beidekanu­kizie na banyabo nu bakatizizie Yesu ku bubo.

Yesu Ekubasa mu Yelusalema na Lutanuno.

¹² Gakede busi musanganano munene wavule ku kisagulo, gabongule buno, Yesu ekuvua ku Yelusalema,

¹³ bakatile manga ma bibila, nu bendile kumukulumania, nu balalukile bune, Hosana: Mbogimbogi ku wozo ukuvua muizina lia Mukota, Mukota wa balsalele.

¹⁴ Nu gasangile Yesu muana wa mpunda, eikede gantata gazo, anga buasanzilue bune,

¹⁵ Mukinga wa Siona, ntunakua boba; unguilila, Mukota wobe ekuvua gantata ga muana wa mpunda.

¹⁶ Tondo beigisibua bage tabalingile kumenyinina bubo; tondo gaganuinue Yesu, bakengede bubo buasanzidue nu bamukitide bubo.

¹⁷ Bantu beingi babezaga nage gayukagia Lazalo mu nsinda, nu gamumanaga ku bakuzi, babo bamulonge­kede.

¹⁸ Ku kabamba kako musanganano wendile kukulumana nage, kubuno bongule buno akita mugeleko wozo.

¹⁹ BaFalese batendene buabo buabo bune, Buni butuakite, lolazi, kisi kinsania kikumuyanga.

BaGeleka Bekutunda Kumona ku Yesu.

²⁰ BaGeleka bamozi ba kubeli bendile kuganuna ku kisagulo;

²¹ bavule ku Filipo muntu waBetesaida wa Galela, nuwe bamubuide bune, Mukota, tukutunda kumona Yesu.

²² Filipo endile ku Andele, atendile nage; Andele nu Filipo bendile ku Yesu, nu bamubuide bubo.

²³ Yesu abakuide bune, Nkungu za kuganunua kua Muana wa muntu zakuka.

²⁴ Lebelebe, lebelebe, nkumubula bune, Ndi kaguma ka mumpunge kakoloka gansi mu bilongo, ndi takakua, nti kakusigala kekenyene; tondo ndi kakua, nti kakubuta tuguma tuingi.

²⁵ Wozo watunda kalamo kage akakazimizia; nu wozo wasomba kalamo kage mu kisi kikino akalanga kalamo katanakuzinda.

²⁶ Ndi muntu ekunkambila, anyange; nu ngendi ugakaba mukambi wane: ndi muntu ekunkambila, Tatane ekamu­anza.

²⁷ Kano kaluma nili na kabebe, nikite buni? Tatane, nonie mu nkungu zeno. Tondo ku kabamba kakano navule ku zeno nkungu.

²⁸ Tatane, ganunia izina liobe. Nu iyuki liatukile muigulu bune, Naliganunia, nu nikaliganunia lingo.

²⁹ Musa­nganano wabezaga buigi, gungule kuiyuki lilio, babuide bune, Mukulumino wa mbula: bango bune, Mugenzi uwatenda nage.

³⁰ Yesu ababuide bune, Iyuki lilino taliatendua ku kabamba kane, tondo liatendua ku kabamba keinyu.

³¹ Kano kaluma lusungio lua kisi kikino luseli: nu kano kaluma muangati wa kisi kikino akuisua kumbuga.

³² Nunne, ndi nasakikua ga kisi, nkubuluta hansania kundi.

³³ We atendile bubo ku kubakengelezia ku bua­kakua,

³⁴ Bantu bamubuzizie bune, Tungule ku mulembe buno, Klisto akeikalaga nkiko zitanakuzinda: nu buni bukutenda bune, Muana wa muntu atunganana ku sakikua? Nazi wozo Muana wa muntu?

³⁵ Yesu ababuide bune, Mukili na kiengi mu nkungu nkeke. Tabangazi mu kiengi, buno kapilo kanavua kumuvuama: wozo ukutabanga mu kapilo ntekumenya kuakuenda.

³⁶ Nkungu zimuli na kiengi, katiziazi kiengi, buno mube bana ba kiengi. Nu gatendile Yesu bubo, atukile gago, nu ababisamine.

³⁷ Tondo anakitile migeleko mingi ku babezaga, tondo tabanamuka­tizizie:

³⁸ buno lizindilile liatendile mulengania Yesaya bune, Mukota, nazi wakatizizie musagu weitu? Nu kuboko kua Mukota kuamonekile kunazi?

³⁹ Ku kabamba kako tabakatizizie, kubuno Yesaya atendile lingo bune,

⁴⁰ We abazibile meiso, nu abikile mitima zabo mibibu; Buno banavua kutitika, nu kumenyinina mu mitima zabo, nu banagaluka buno nibonie.

⁴¹ Yesaya atendile bubuno, kubuno amonine ku luganuno luage; nu atendile musagu wage.

⁴² Tondo bangati beingi bamukatizi­zie; tondo tabeitabizizie ku kabamba ka baFalese, buno banavua kutikibua mu numba za musanganano:

⁴³ kubuno batundile lutanuno lua bantu kutinga lutanuno lua Kalaga.

⁴⁴ Yesu alalukile neiyuki inene bune, Wozo wankatizia, nti nte­kunkatizia nnenyene tugu; tondo nti ekukatizia wozo wansingile.

⁴⁵ Nuwe ukumonako nti ekumona ku wozo wansingile.

⁴⁶ Na­vule buno nibe kiengi kia kisi, buno unsania wankatizia ntasigale mu kapilo.

⁴⁷ Nu ndi muntu ekungua ku moki mane, nu ndi nta­kumanza, nne nsikumusungia: kubuno nsiavule kusungia kisi, tondo navule kukionia.

⁴⁸ Wozo ukunsomba, nu utasekela malagi mane, eli na umozi ukamusungia: idagi lilio linatendile ulikamu­sungia busi buzinda.

⁴⁹ Kubuno nsikuitendela nnenyene; tondo Tatane wansingile ankakizizie bunsania bunkutenda nu bunsania bunkubula.

⁵⁰ Nu nizi buno, kukakizia kuage kuli kalamo kata­nakuzinda; nu bubo bunkutenda nkubutenda anga buantendile Tatane.