Yakobo 3 - Nouveau Testament en Kilega

Bukatizio bua Bulili Bukumenyua ku Kuisungula ku Kutenda.

¹ Mibuto zane, kumuli takube basozi beingi, menyazi buno tukasungibua nunse.

² Kubuno tukuikuka mu bitondo bingi. Ndi muntu ntekuikuka ku kutenda, wono nti u muntu wasililila, nu nti anavuama kuangata mubili wage unsania.

³ Nu anga bubo butukubikaga biuma mu tunua tua mpunda buno zituanze, nu butu­kuzitimbulaga.

⁴ Unguililazi, anga buli mato; meli manene nu mekusindikua na lumpumpu lubibu, ku kugalukibua na kiuma kikeke nunse, nu mekuenda anga bukutunda musondelezia.

⁵ Ubu­bo lulami nulo luli kiganza kikeke, tondo lukuikakaga ku bitondo binene. Tuizi ubuli keiya nuko keli kakeke, kakombolaga nkuzi ningi nunse!

⁶ Nu lulami nulo luli keiya kanene nunse: nu kisina kia misako mibi mu biganza bietu, lukubigia mubili unsania, nu lukubangia bumba bua buagi, nu kugulumizibua na Gehena.

⁷ Kubuno na lukita na lukita lua nyama, u nu lua tuzoni, u nu lua bikugelegeta, u nu lua bili mu kitatenge, u nu lua bikutugagua, nu bibio biasilile kutugua na bantu:

⁸ tondo lulami talunavuama kutu­gua; luli lubi talunavuama kutugua, luli luiyala na buganga nunse.

⁹ Tukuganunaga Mukota nu Tateisue nalo; nu tukusuililaga bantu nalo, bakitilue ku kisusania kia Kalaga:

¹⁰ mu kanua kamozi muku­tukaga busoga nu kisuililo. Mibuto zane, bubuno tabuatunganana.

¹¹ Ndi mu kanuabalongo kamozi munabasa mazi meli nse nu mazi meli lubaba?

¹² mibuto zane, ndi muti wa figi unakolama kiguma kia oleve, aba muzigi kukolama figi? Kasi mazi meli anga ma munkange tamanaba nse.

¹³ Nazi wa kumuli uli na menge nu bumenyinino? Nu alolesie makitilo mage ku misako zage misoga nu menge mabota.

¹⁴ Tondo ndi muli na lugi nunse, nu miango mu mitima zeinyu, tamuikake aba tamutende buteligo.

¹⁵ Menge mamano tamamo matukile kuigulu, tondo meli ma kisi, nu ma lukita lua bantu, nu Satana.

¹⁶ Kubuno ndi kuli lugi nu miango, nti ukukusakua nu nti ukuli misako mingi mibi.

¹⁷ Tondo menge makutukaga kuigulu meli masoga, nu meli ma bubobelelo, nu mabota, nu mekusasia kungua bitondo bia bantu, nu meli na kiombo nu misako misoga, tamekukutia, nu tameli na buengelezi.

¹⁸ Nu misako za kuisanana zikukitua mu bubobelelo ku babo babobelela.