Yakobo 2 - Nouveau Testament en Kilega

Bantu ba Klisto Tababe na Bulundulundu.

¹ Mibuto zane, bukatizio bumuli nabo mu Yesu Klisto, Mukota weitu wa lutanuno, tabube ku kukutia bantu.

² Kububuno ndi muntu eli na mpete za olo, nu nsulu nsoga, eingila mu numba za musanganano weinyu; nu ndi muzambi nuwe eingila nu eli na nsulu mbi;

³ nu ndi muanza wozo uli na nsulu nsoga, nu kumubula buno, Uwe ikala gano ga kiziki kisoga; nu kubula wozo muzambi buno Uwe emana gago, aba ikala gansi;

⁴ ndi nti tamukulundulana, nu ndi nti tamuli ngatu zili na makengelo mabi?

⁵ Unguililazi, mi­buto zane batundua; ndi Kalaga ntasombuede bazambi ba kisi buno babe neiguma mu bukatizio, nu bapieni ba bukota buabikide babo bekumutundaga?

⁶ Tondo muabengile bazambi. Nu ndi ba­gumi nubo tabamubengile, nu kumubuluta ku bisumbi bia lusungio?

⁷ Ndi tabakulinga izina lilio isoga limukumanua mulio?

⁸ Tondo ndi mukuzindilizia mulembe wa bukota, anga buasanzilue buno, tunda mibuto zobe ange buwitunda uwenyene, nti muakita busoga:

⁹ tondo ndi mukukutia bantu, nti mukuaga, nu kusungibua na mulembe anga bekugukagula.

¹⁰ Kububuno ndi muntu anza mulembe unsania, nu ndi aga muikakizio limozi, nti aga mu mansa­nia.

¹¹ Kubuno we atendile bune, Ntuite meiga, atendile lingo bune, Ntuite muntu. Umpanga ndi ntuita meiga, tondo wita muntu, nti wakagula mulembe.

¹² Tendazi, nu kitazi, anga bantu bakasungibua ku mulembe wa bukandulua.

¹³ Kubuno lusungio taluli na kiombo ku wozo uteli na kiombo; nu kiombo kikukinda lusungio.

Kukatizia nu Kukita.

¹⁴ Mutali mukizi, mibuto zane, ndi muntu ekutenda buno eli na bukatizio, nuwe nteli na misako misoga? Ndi bubo bukatizio bunamonia?

¹⁵ Ndi mubuto weitu umozi, wamulume aba muki­kulu, eli buasi nu nteli neidia busi na busi,

¹⁶ nu ndi muntu umozi wa kumuli abatenda buno, Endazi busoga, mungue keiya, nu kuikuta; tondo ndi ntabakasa bibakuiyanina bia mubili; nti uli mutali mukizi?

¹⁷ Nu bubo ububo ndi bukatizio tabuli na misako misoga, kasi nti buakua.

¹⁸ Tondo muntu anatenda buno, Uwe uli na bukatizio, nunne nili na misako misoga; undolesie bukatizio buobe kuteli misako misoga zobe, nunne nakulolesie bukatizio buane ku misako misoga zane.

¹⁹ Uwe ukukatizia buno, Kalaga eli umozi; nti ukukita busoga: nu basumbu nubo bekukatizagia bubo, nu beku­giliminaga.

²⁰ Tondo, uwe muntu utakulangua, ndi ntukutunda nuwe kumenya buno bubo ubuli bukatizio ndi tabuli na misako misoga nti buakua?

²¹ Ndi tateisue Abalahama ntabingizibue ku misako misoga, ububo akasene muana wage Isaka ku kayulo?

²² Ntukumona, bukatizio buamonekileko mu misako misoga zage, nu bukatizio bubo buasililide ku misako misoga zage;

²³ nu ma­sanzo mamo mazindilide matendagua buno, Abalahama akatizizie Kalaga, nu atekuidue buno eisanana; nuwe amaninue buno, muida wa Kalaga.

²⁴ Tamukumona, ku misako za muntu ekubingibua ta ku bukatizio kankanka.

²⁵ Anga wozo Laba wabezaga kitazi ndi ntabingizibue na misako misoga gasekede batitiki, nu abanine kuingo nzila?

²⁶ Ububo ndi mubili taguli na muuza nti wakua, nu bubo ubuli bukatizio buteli na misako misoga nti buakua.