Yakobo 1 - Nouveau Testament en Kilega

Yakobo Ekubasambizia.

¹ Yakobo, mukobe wa Kalaga nu wa Mukota Yesu Klisto, ku bilongo ikumi nu bibili bia balangene, samba kumuli.

Bantu ba Kalaga Babogeboge mu Malindiko Mansania.

² Mibuto zane, mubogeboge nunse, gamukulindikua na malindiko ma lukita na lukita;

³ menyazi buno kulindikua kua bukatizio buei­nyu kukulusia nkiki.

⁴ Tondo nkiki zibe zasililila, musililile mu binsania, tamuide kena.

⁵ Tondo ndi umozi wa kumuli eida menge, asege Kalaga, ukukasanaga binsania nu ntamuzugile; nuwe akasue.

⁶ Tondo asege mu bukatizio, ta na miango nunse; kubuno wozo uli na miango, asu­sania na bimpumi bia kitatenge bikutengatenga na lumpumpu nu kuidibula gano nu kuko.

⁷ Kubuno wozo muntu ntakengele buno akakasua kena kua Mukota;

⁸ kubuno, muntu uli na mitima ibili, ekutalatala mu nkita zage insania.

⁹ Tondo mubuto wane ndi ntukuanzua, bogaboga kubuno uku­ganunua;

¹⁰ nu mugumi abogeboge kubuno ekukegibua: kubuno akaba anga maluba ma bisugu makukoloka.

¹¹ Kungua musi use wazuza nunse, nti womia bisugu; nu maluba nti makoloka, nu mulangalo wamo nti wazinda: nti luazimine: anga bubo mugumi akazimina mu misako zage insania.

Kalaga Ntakulindikaga Bantu.

¹² Mbogimbogi ku wozo muntu ukukinda mu malindiko, nu kungua asila kulindikua, nti akakasua nkumbu za bukota za kalamo, zalagile Mukota ku babo bekumutunda.

¹³ Ndi muntu ekulindikua ntatende bune, Nkulindikua na Kalaga; kubuno Kalaga ntanali­ndikua na bubi, aba we wenyene ntanalindika muntu:

¹⁴ tondo na muntu na muntu ekulindikua gakulutua nu kuengelelua na lutundo luage wenyene.

¹⁵ Kungua lutundo luetila, nti luabuta buagi; bubo buagi nubo kungua buitila, nti buabuta lukuo.

¹⁶ Tamu­engelelue, mibuto zane batundua.

¹⁷ Na kukasana na kukasana na kuli kusoga, nu nakio nakio na kiasililila nti kikutukaga kuigulu kulsi wa kiengi, nu we ntanagaluka nunse, aba ntekuigelelaga nunse.

¹⁸ Ku kusombola kuage wenyene, atubutile kuidagi lia bulili, buno tube lukita lua bibumbua biage bitangi.

Bantu ba Kalaga Bekunguaga Kuiyuki Liage.

¹⁹ Umpanga, mibuto zane batundua, muizi. Tondo na muntu na muntu asasie kungua, tondo ntasasie kutenda, nu ntasasie kongua;

²⁰ kubuno bongua bua muntu tabukuzindilizia kuisanana kua Kalaga.

²¹ Umpanga sigazi nsese insania nu bubi buetila buingi, sekelazi idagi ku kubota liabikilue mu mitima, linavuama kumonia.

²² Tondo mube bakiti beidagi, tondo ta bonguilizi tugu, munavua kuiyengelela.

²³ Kubuno ndi muntu eli munguilizi weidagi tugu nuwe ta mukiti walio, nti muntu wono eli anga muntu ukuidola ku meiso mage mu kiyolo;

²⁴ kubuno ekuidola, nu kusila kuidola nti enda, nu ku nkungu zezo nti iyibilila buimonagako.

²⁵ Tondo widolaga mu mulembe wasililila wabukandulua, nu kugukita, ntabe muibilizi wa biakungua kubio, tondo mukiti wa mulimo, nuwe nti abogeboge mu mulimo wage.

²⁶ Ndi muntu wa kumuli ekuke­ngela buno eli na meigisia, nuwe ndi ntekuisungula mu kutenda, nti ekuiyengelela, nti meigisia ma muntu wono tameligo.

²⁷ Meigisia meli masoga nunse u mamo meteli na nsese ku Kalaga Tateisue, u mamo, kukunga nkubi, nu misigala mu tubebe tuabo, nu kutaba na kabalibango mu kisi.