Tito 3 - Nouveau Testament en Kilega

Bingo Bitondo Bikutunda Kalaga Buno Bantu Bage Bakite.

¹ Bakengelesie buno banze bakota, nu bangati, babe na luanzo, nu babe kayikayika ku mulimo na mulimo musoga,

² taba­linge muntu, nu tabende miango, nu bole, nu babote ku bantu bansania.

³ Kubuno wakalazi nuisue tuabezaga bikongolo, nu banani, nu tuengeledue, nu tuabogagabogaga mu bitondo bitasuaga, nu tuabezaga na kiango nu lugi, tuabezaga tuasombana.

⁴ Tondo gamonekile busoga bua Kalaga Monia weitu, nu lutundo luage ku bantu,

⁵ ta ku misako zeisa zituakitile, tondo ku kiombo kiage kia­tukuilide, atonezie ku kusugua kua kubutua lingo nu kuba bato na Muuza Wasililila,

⁶ watukasile nunse mu Yesu Klisto Monia weitu;

⁷ buno, tubingibue ku mponga zage, buno tupiene ku kilemanizio kia kalamo katanakuzinda.

⁸ Musagu wono watananina kukatizi­bua, nu bitondo bibino nkutunda wakokomezia kubitenda, buno babo bakatizizie Kalaga bakengele kukita kankanka misako misoga. Bitondo bibino bili bisoga nu bia mutali ku bantu:

⁹ tondo bembuka mbuzio za bukongolo, nu misagu za bibuti, nu nsake, nu miango ku kitondo kia mulembe; kubuno tabili na mutali, bili buliabulia.

¹⁰ Ndi muntu ekuanzukania bantu, kungua wamusungula itangi nu lia mabili ntongua, nti widekanukia nage;

¹¹ nu nti wamenya buno muntu uli bubo, alubikana, nu akuaga, nti ekuisungia wenyene.

¹² Kungua nasinga Alutema kuguli, aga Tukiko, nti wasasia kuvua kuno kundi ku Nikopoli: kubuno nende kuikala kuko mu nkungu za mpego.

¹³ Sasia kusinga Zena musozi wa mulembe nu Apolo ku lugendo luabo, buno tabasige kena.

¹⁴ Nu bantu beitu beiyigisie kukita misako misoga kankanka, buno bakite busoga, bubaba na biguma.

¹⁵ Bansania bendi nabo bekukusambizia. Watusambizizia babo bakutuelama mu bukatizio. Mponga zibe kumuli bansania.