Tito 1 - Nouveau Testament en Kilega

Mukanda Wasingaga Paolo ku Tito. Paolo Ekusambizia Tito.

¹ Paolo, mukobe wa Kalaga, nu musingua wa Yesu Klisto, ku bu­katizio bua basombolua ba Kalaga, nu bumenyinino bua bulili buli mu kuanza Kalaga,

² nu kilemanizio kia kalamo katanakuzinda, kalagilue na Kalaga utekuekaga buza, mu nkiko za wakalazi gabe­zaga ntebegania kisi nu meigulu;

³ tondo ku nkungu zage abisuide idagi liage mu musagu, gunakasilue kuikakizio lia Kalaga Monia weitu;

⁴ ku Tito, muana wane wa bulili mu bukatizio bumozi: Mponga nu bubobelelo bikutukaga ku Kalaga Isi nu ku Mukota Yesu Klisto Monia weitu bibe kuguli.

Paolo Asigile Tito ku Kulete Kulongeka Bitondo bia baKlisto.

⁵ Ku kabamba kakano nakusigile ku Kulete, buno ulongeke bitondo biasigede, nu kubika bakulu mu muino na muino, anga buna­kukakizizie;

⁶ muntu uteli na lukumu lubi, nu wamulume uli na mukikulu umozi, nu uli na bana bakatizia, batakubingua ku bitondo bibi, nu beteli na kabenga.

⁷ Umpanga buatunganana mukulu wa ekelezia ntabe na lukumu lubi, kubuno eli mukiti wa Kalaga; ntabe muntu wa kuikotia, nu ntabe na kasungu, nu ntanue maku, nu ntabe mulibuzi, nu ntelame bikulo bia nsese;

⁸ tondo abe musambizia, nu mutundi wa busoga, nu wola, nu wisa, nu wasililila, nu muisunguzi;

⁹ nu ukukokomezia idagi lia bukatizio anga buigisizibuelio, buno ane bantu mu meigisia ma kalamo, nu kuluta babo beli na miango.

¹⁰ Kubuno kuli beingi batakuanza, nu bekutenda butakulungana, nu bengelezi, nu lebelebe mu babo bamonesibua,

¹¹ buatunganana bazugilue; kubuno bekugalukia bikanga bingi, nu bekuigisia buta­kulungana, kubuno bekutunda bikulo bingi.

¹² Umozi wa kubeli, mulengania wabo bobenyene, atendile bune, BaKulete bekuekaga buza kankanka, Beli nyama mbi, Beli biliagundu batakukita mulimo.

¹³ Bulongeki bubuno buligo. Bazugile nunse, buno balinde mu bukatizio,

¹⁴ buno tabonguilile misumo za baYuda, nu kukakizia kua bantu bekuibembukia na bulili.

¹⁵ Binsania bili bisoga kubabo beli basoga; tondo ku babo beli na nsese nu batakatizia, takuli kimozi kili kisoga; tondo bumenyinino buabo nu kalenganio kabo bili na nsese.

¹⁶ Bekutenda buno beizi Kalaga; tondo ku misako zabo bakumutuna, basombi, nu banani, nu ku kitondo na kitondo kisoga tabakuitabizibua.