Misako 9 - Nouveau Testament en Kilega

Kugaluka kua Paolo.

¹ Tondo Saolo, abezaga eki etia beigisibua ba Mukota boba, nu alondaga kubeita, nu endede sankoga munene,

² nu asegile mukanda kuenda ku Damaseke ku numba za misanganano, buno embe amone ku bantu ba meigisia mamano, bamulume aba bakikulu, buno abalusie ku Yelusalema buno bakandue.

³ Tondo mu lu­gendo, gabezaga esayangilila kubasa ku Damaseke: kitangala besi kiengi kiatukile kuigulu nu kiamusanine:

⁴ nu aguide gansi, nu ongule kuiyuki liamubuide bune, Saolo, Saolo, kubuni kukumba­bazia?

⁵ Nu atendile bune, Uwe unazi, Mukota? nu atendile bune, Nne u Yesu ukubabazia:

⁶ tondo zanzuka, wende ku muino, nu wasambalilue bunsania buwakite.

⁷ Nu bamulume bendaga nage bemanine bakatile mukobi, bongule kuiyuki, tondo tabamonine ku muntu.

⁸ Nu Saolo, azanzukile; nu galimbuide meiso, ntamenyaga kumona lingo; nu bamukatile ku kuboko, bendile nage Damaseke.

⁹ Nu atingizie bindi bisatu ntakumona lingo, nu ntaliaga nu ntanuaga.

¹⁰ Nu ku Damaseke kuabezaga muigisibua umozi, izina lage Anania, nu Mukota amubuide mu kalolesio bune, Anania. Nu eitabide bune, Nili gano, Mukota.

¹¹ Nu Mukota amubuide bune, Zanzuka, nu wende mu nzila zikumanua Zisa, nu nti wabuzia ku numba za Yudasa kuli muntu umozi ukumanua Saolo, muntu wa Taliso: kubuno ekusega;

¹² nuwe amonine ku muntu izina liage Anania engila, amubikile maboko, buno amone lingo.

¹³ Tondo Anania akuide, Mukota, nungule ku misagu za muntu wono ku bantu beingi buno, ekukitila basuagibua bobe bubi buingi ku Yelusalema.

¹⁴ Nu eli na buangato gano bua ku basankoga banene kukanda bansania bekusegaga kuizina liobe.

¹⁵ Tondo Mukota amubuide bune, Enda, kubuno ese musombolua wane, kuenda neizina liane ku baBilongo, nu ku bakota, nu ku bana ba Isalele:

¹⁶ kubuno namulolesie mbabazio inga zakababazibua ku kabamba keizina liane.

¹⁷ Nu Anania endile, nu engide mu numba; nu amubikile maboko mage, nu atendile bune, Mubuto wane Saolo, Mukota Yesu, wakubaside mu nzila ansinga, buno umone lingo, nu kuiyazibua na Muuza Wasililila.

¹⁸ Nu kazanga kongo ku meiso mage kuakolokile biasusania anga magamba, nu amonine lingo, nu azanzukile nu abatizizibue;

¹⁹ nu alile idia, nu abeide na magala. Nu eikeide bindi bimozi kuko na beigisibua babezaga ku Damaseke.

Paolo Ekulinga Mulimo Wage.

²⁰ Nu kazanga kongo asambede musagu wa Yesu mu numba za misanganano, buno we eli Muana wa Kalaga.

²¹ Nu bansania bonguaga buakutenda bangamine, nu batendile bune, Ta uwono ukuitaga babo bekusegaga kuizina lilino mu Yelusalema? nu avua tugu gano, buno abeke ku kikando ku basankoga banene.

²² Tondo Saolo eitide kuba na magala, angamizie baYuda beikalaga ku Damaseke, akokomezie buno wono eli Klisto.

²³ Aba bindi bingi biatingile, baYuda bakalile luango buno bamuite:

²⁴ tondo kulongeka kuabo kuamenyinue na Saolo. Nu balangile ku nibi musi nu kindi, buno bamuite:

²⁵ tondo beigisibua bage bamutolile mu kindi, nu bamugezizie mu kitutu mu luzi.

Paolo Ekuenda ku Yelusalema nu ku Taliso.

²⁶ Saolo gabasile ku Yelusalema, atundile kugomia na beigisibua: tondo bamukule boba bansania, aba tabakatizizie buno eli muigisi­bua,

²⁷ Tondo Balanaba amutolile, nu endile nage ku basingua, nu abasambalide lukita luamonine ku Mukota mu nzila, nu buno atendile nage, nu lukita luasambede na luatu kuko ku Damaseke kuizina lia Yesu.

²⁸ Nuwe endaga nabo kankanka mu Yelusalema,

²⁹ nu asambede na luatu muizina lia Mukota: atendile na baYuda batendaga mutendezi wa ba Geleka, endile nabo miango: nu ba­tundaga kumuita.

³⁰ Tondo mibuto zage gabongule ku misagu zeno, bendile nage ku Kaisalia, buno ende ku Taliso.

³¹ Umpanga ekelezia liabobelede ku Yudaya unsania, nu ku Galela nu ku Samalia, balindizibue; nu beitide, nu batabangile nu kuanza Mukota, nu mu kubobelezia kua Muuza Wasililila.

Aenea Onezibue.

³² Nu gabeide Petelo ekutinga ku biziki binsania, agelile ku basuagibua babezaga ku Lidia.

³³ Nu kuko amonine ku muntu umozi izina liage Aenea, wiyombekaga ku mugu miaka kinana; kubuno abezaga na lusambo lua koma kiganza.

³⁴ Nu Petelo amubuide, Aenea, Yesu Klisto akonia; zanzuka, nu wanze mugu wobe nu kazanga kongo azanzukile.

³⁵ Nu bantu bansania be­kalaga ku Lidia nu ku Salona bamumonineko, nu bagalukile ku Mukota.

Bekuyukia Dolokasa ku Bakuzi.

³⁶ Nu kuabezaga mu Yopa, muigisibua wamanagua bune, Tabita, buisulilua bualio Dolokasa; mukikulu wono abezaga eiyala na misako misoga, nu mponga zakitaga.

³⁷ Nu gabede bindi bibio, abezaga na lusambo, nu akule: nu gabamogezie, bamubikile mu busio bua kuigulu.

³⁸ Nu kukuba Lidia eli buigi na Yopa, nubo beigisibua bongule buno Petelo eli kuko, bamusingide bantu babili, bamusegile buno asasie kuvua kubeli.

³⁹ Nu Petelo atukile, nu endile nabo. Nu gavule, bendile nage ku busio bua kuigulu: nu misigala insania bemanine buigi nage, bekulila, nu balolesizie nkanzu nu nsulu zalukaga Dolokasa, gabezaga nabo.

⁴⁰ Tondo Petelo atikizie bansania, akomine mazu, nu asegile; nu agalukide ku kitumba, atendile bune, Tabita, Yuka. Nu alimbuide meiso; nu gamonine ku Petelo ayukile.

⁴¹ Nu amulambizizie kuboko, nu amuzanzuide; nu amanine basuagibua nu misigala, nu amubi­kile lisa nabo ese na kalamo.

⁴² Buakukene ku Yopa unsania: nu bantu beingi bakatizizie Mukota.

⁴³ Nu Petelo eizizizie ku Yopa mu numba za muntu umozi wamanagua Simona, mukulumizi wa bikoba.