Misako 6 - Nouveau Testament en Kilega

Bekusombola Balangi ba Ekelezia.

¹ Mu bindi bibio, gatalikidue iganzo lia beigisibua, ba Yuda batendaga mutendezi wa baGeleka bagambaga baEbelo, ku­buno misigala zabo beibililagua ku bibio bibabeganagia busi na busi.

² Nu babo ikumi na babili bamanine kikanga kia beigisibua, nu batendile bune, Tabunatutananina kusiga musagu wa Kalaga, nu kukita mulimo wa meza.

³ Mibuto zeitu, sombolazi bantu mutuba kamo kumuli bakulumbibua, beiyala na Muuza Wasililila, nu menge, nu tubabike mu mulimo wono.

⁴ Nuisue tuakokomezie kusega, nu kusambala musagu musoga.

⁵ Nu bubuno buatana­nizizie musanganano unsania: nu basombuede Setefano, muntu weiyede na bukatizio nu Muuza Wasililila, nu Filipo, nu Polokolo, nu Nikanoli, nu Timoni, nu Palimeno, nu Nikalao wagalukile wa ku Antiokia;

⁶ bababikile ku basingua; nu gabasilile kusega, ba­babikile maboko geitoe.

⁷ Nu idagi lia Kalaga lietide; nu iganzo lia beigisibua mu Yelusalema liatalikidue nunse; nu basankoga beingi banzile bubo bukatizio.

Bekukata Setefano.

⁸ Nu Setefano, eiyede na mponga nu magala, akitile magano­gano nu tulolesio tunene munkatini mua bantu.

⁹ Tondo bantu bamozi ba numba za musanganano, zamanagua numba za musanga­nano za Bakandulua, nu za baKuleni, nu za baAlesandelia, nu za baKilikia, nu Asia, bakanizanizie na Setefano.

¹⁰ Tondo taba­vuamine kukinda mamo menge, nu Muuza Wasililila watendaga nage.

¹¹ Nu balubikanizie bantu batendaga bune, Tungua kualinga muntu wono alinga Mose nu Kalaga.

¹² Batulanizie bantu, nu bakulu, nu basanzi, bamuvuilide, bamukatile, nu bamuekile ku ngatu,

¹³ nu babikile bantu bemukandike, batendile bune, Muntu wono ntemenka kulinga kiziki kikino kiasuagibua, nu mulembe:

¹⁴ ku­buno tuamungule ekutenda buno, wono Yesu wa Nazaleta akeita kiziki kikino, nu agalukie nkita zituakasilue na Mose.

¹⁵ Nu bansania bekalaga mu lulo lusu lua luango, bamulolile kisozi, nu bamonine ku meiso mage anga meiso ma mugenzi.