Misako 3 - Nouveau Testament en Kilega

¹ Petelo na Yoana babezaga bekuenda ku numba nnene za ku­kumbamina, nkungu za kusega, ku nkungu mubula.

² Nu wozo muntu wabutilue kitunga, bamuekaga busi na busi kumubika ku luibi lua numba nnene za kukumbamina, luamanagua buno, Lusoga, asege bikulo kubabo bengilaga mu numba zezo.

³ Nu wono amonine ku Petelo nu Yoana, gabengilaga mu numba nnene za ku­kumbamina, asegile buno bamukase lukaso.

⁴ Tondo Petelo nu Yoana bamulolile Petelo atendile bune, Tulole,

⁵ Abalolile, akengede buno, bekumukasa kena,

⁶ Tondo Petelo atendile bune, Nsili na feza nu olo; tondo kinili nakio, ukinkukukasa, muizina lia Yesu Klisto wa Nazaleta, emanuka nu utabange.

⁷ Nu amukatile ku kuboko kuaseidume, nu amuzanzuide: kazanga kongo magulu mage nu ngologoso za magulu zalindile.

⁸ Nu asasizie kuemanuka, nu atabangile eingide nabo mu numbannene zakukumbamina, eitolo­kile nu aganuine Kalaga.

⁹ Nu bantu bansania bamumonineko ekuenda nu ekuganuna Kalaga:

¹⁰ nu bamumenyine buno uwozo ukuikalaga ku Luibi Lusoga lua numba nnene za kukumbamina buno akasue lukaso; bangamine nu baganineganine ku bubo bubamonine kubo.

Petelo Ekubula Bantu bua Yesu.

¹¹ Nu gakatile Petelo nu Yoana, bantu bansania basasizie kuba­konganina mu lusu luamanagua buno, lua Solomo, bangamine nunse.

¹² Nu gamonine Petelo ku bubo, abuide bantu bune, Inyue bantu baIsalele, kubuni mukuangama na bubuno? nu muku­tulola, anga ku magala meitu tubenyene, aba ku bulili bueitu tube­nyene, ubuatabangia wono?

¹³ Kalaga wa Abalahama, nu wa Isaka, nu wa Yakobo, Kalaga wa batateisue, aganuine Mukambi wage, Yesu; umuagabuide, nu muamutunine kua Pilato, gatundaga kumumenka.

¹⁴ Tondo nuinyue muatunine wozo Wasililila, nu wozo Wisanana, muasegile mukasue muiti,

¹⁵ nu muitile Mukota wa kalamo, wayukizibue na Kalaga ku bakuzi; mueli tuli balongeki balio.

¹⁶ Nu ku bukatizio muizina liage, izina liage lialindia muntu wono ukumumonako, nu ukumumenya; nu bukatizio buli kueli, buamukasile magala mamano kumuli inyue bansania.

¹⁷ Nu kano kaluma mibuto zane, nizi buno, ku bukongolo ukinsa muakitile bubo anga buakitile bangati beinyu.

¹⁸ Tondo misako zeno uga­sambalaga Kalaga wakalazi mu tunua tua balengania bage bansania buno, Klisto wage akababazibua, nu azindilizizie bubo.

¹⁹ Iya­niazi, nu mugaluke, bubo misako za buagi bueinyu zitikibue, bubo gakakuka nkungu za kumuna zikatuka kua Mukota;

²⁰ nu buno amusingile Klisto gumuabikidue, u Yesu;

²¹ watunganene kuse­kelua muigulu aba nu nkungu za kukulumizibua kua binsania, bia­tendile Kalaga ku tunua tua balengania basililila bage bakalazi.

²² Kubuno Mose atendile lebelebe bune, Mukota Kalaga akamusa­kikila mulengania kutuka ku mibuto zeinyu, anga bundi; muko­nguilila ku binsania biakamutenda.

²³ Nu kukaba buno, na muntu na muntu utonguilila wozo mulengania, nti akazimina bulazi na bantu.

²⁴ Nu balengania bansania kutukila ku Samuele nu babo bamukatikania, bansania basambalaga misagu za bindi bibino.

²⁵ Nuinyue muli bana ba balengania, nu beidagano lialagene Kalaga na basoinyue, abuide Abalahama bune, Mu kikanga kiobe babilongo bansania bakakitua mponga.

²⁶ Kalaga, asilile kuyukia Mukambi wage, alingile kumusingilawe, buno amukite mponga, kugalukia muntu na muntu ku misako za buagi buage.