Misako 28 - Nouveau Testament en Kilega

Paolo Ekutubua na Nzoka.

¹ Nu gatuasilile kona, tuamenyine buno, kasi kisanga kikio kiamanagua Melita.

² Nu babo babezaga ga kikio kisanga, batukitide mponga nunse: nu batusekede isue bansania nu bagulu­mizizie keiya, kubuno mbula zalokaga, nu kuabezaga mpego.

³ Paolo akundamanizie kibombo kia misali nu gazibikaga ga keiya, nzoka zabasile na muzuzo wa keiya izina liazo mpoma, zamuba­ngile ku kuboko kuage.

⁴ Nu babo bantu gabamonine ku zezo nzoka nkali zikuzembelazembela ku kuboko kuage, batendene buabo buabo bune, embe muntu wono eli muiti, onine mu kitatenge lingo, tondo Buisanana tabunamulamia.

⁵ Tondo Paolo atituide nzoka mu keiya nu ntasambile.

⁶ Bamulolile nunse, bakengede buno anatumba, aba kugoa gansi kitangala besi nu kukua: tondo gabasilile kulindila nkungu ndazi nu bamonine buno ntaba bungo, bagalukizie makengelo mabo, batendile bune, Wono eli kalaga.

Paolo Ekukita bua Kuangamia. Ekonia Isi wa Popolio.

⁷ Buigi na kiziki kikio kuabezaga masoa ma mukota wa kisanga, izina liage Popolio; atusekede, nu atukungile anga bageni bage bindi bisatu.

⁸ Nu gabezaga isi wa Popolio ekusamba neisusila nu kuansa mikila: Paolo eingide kuabezaga, nu asegile, nu amubikile maboko mage kueli, amonezie.

⁹ Nu gabede bubuno buasila kuba, bango babezaga na nsambo mu kisanga bavule, nu bonezibue:

¹⁰ nubo batuanzile nunse; nu gatuatukile, babakamizizie bingi ku buato bituiyaninaga.

Paolo Ekuenda ku Lomo.

¹¹ Nu gatingile miezi isatu, tuendile na buato bua Alesandelo, buabezaga mu kikio kisanga mu nkungu za mpego, kakengelezio kage kabeide Masa Ma Bamulume.

¹² Nu gatuabasile ku Sala­kusa, tuikeide gago bindi bisatu.

¹³ Nu kutuka gago tuatimbile, tuabasile ku Legio; nu gatingile kindi kimozi lumpumpu luapupile luatukaga kunsi, nu ku kindi kia bibili, tuabasile ku Potiolo;

¹⁴ tua­monine ku mibuto zeitu kuko, batubuide buno tuikaleko bindi mutuba kamo; nu bubo tuabasile ku Lomo.

¹⁵ Nu mibuto zeitu batukile ku Lomo gabongule ku misagu zeitu, nu bavule kutukulu­mania ku Isoko lia Apio nu Numba isatu za Bageni; nu Paolo gabamonineko aganuine Kalaga, nu alangamene.

¹⁶ Nu gatuabasile ku Lomo, Paolo abuidue buno nti eikala wenyene na mukoloboyo wamulangaga.

Paolo Ekubula baYuda Babezaga ku Lomo Musagu wa Yesu.

¹⁷ N u gatingile bindi bisatu Paolo akungikile bakulu ba baYuda: nu gabavule ababuide bune, Mibuto zane, nsiakitile buampa ku muntu aba ku misako za batateisue, tondo nakandilue ku Yelu­salema na baLomo:

¹⁸ nu babano gabasilile kumbuzia, batundile kunkandula, kubuno nsiakitile bunakuila.

¹⁹ Tondo baYuda gabasombile luango lulo, neidangizie buno nende kua Kaisa; ta kubuno natundaga kusongela kilongo kia kueitu.

²⁰ Ku kabamba kakano namumanine buno nimumoneko nu nitende neinyu: kubuno ku kabamba ka kilemanizio kia baIsalele nakandua na makoki mamano.

²¹ Nu bamubuide bune, Tatuamonine ku mukanda kutuka ku Yudaya wa mulondo wobe, aba takuli mubuto weitu umozi wavule kutusambalila misagu zobe, aba kututenda misako zobe mibi.

²² Tondo tukukengela buno buli busoga ndi watusa­mbalila bukukengela: kubuno ku bua kikanga kikino, tuizi buno kikubengua kunsania.

²³ Nu bamubikide busi, nu bantu beingi bamuvuilide mu numba zage; abasambalide nu alongekede bukota bua Kalaga, nu ku­balolesia musagu wa Yesu mu mulembe wa Mose, nu mu mikanda za balengania, kutukila nindunindu aba nu muigolo.

²⁴ Bamozi bakatizizie bubo buatendagua, nu bango tabakatizizie.

²⁵ Nu gabateitabizanizie, batukile gasilile kutenda Paolo bumozi, Muuza Wasililila atendile busoga ku mulengania Yesaya ku basoinyue,

²⁶ atendile bune, Endazi ku bantu babano, nu mutende, Kungua mungue nu tamuamenyinine; Nu kumona muamone, nu tamuatitike:

²⁷ Kubuno mitima za bantu babano zili mibibu, Nu matuzi mabo tamakunguaga, Nu basila kuziba meiso; Buno banavua kutitika, Nu kungua na matuzi, Nu kumenyinina mu mitima zabo, Nu kugaluka lingo, Nu ninabonia.

²⁸ Menyazi umpanga buno, lonio luluno lua Kalaga luekua ku baBilongo: nu bongue.

²⁹ Gasilile kutenda bubuno, baYuda batukile nu bakanizanizie.

³⁰ Nu Paolo eikeide miaka ibili mu numba zage zaligile we wenyene, nu asekelaga bansania bamuvuilaga,

³¹ kusambala musagu wa bukota bua Kalaga, nu kuigisia misagu za Mukota Yesu Klisto na luatu, nu ntazugidue na muntu wampa.