Misako 24 - Nouveau Testament en Kilega

Paolo Eli ku Feliki.

¹ Nu gatingile bindi bitano Anania sankoga munene agelile na bakulu bamozi, nu mutendi umozi, izina liage Tetula; nu basambalide muangati musagu wa Paolo.

² Nu gabamanine Paolo, Tetula alingile kumusongela nu atendile bune, Feliki, wanzua nu wasimua, isue tuli na mbogimbogi, nu bubobelelo butuli nabo buli kuguli, nu ku menge mobe bekulo­ngeka milondo mibi zili mu kilongo kikino,

³ tukubogaboga ku bubo bindi binsania nu ku biziki binsania.

⁴ Nu nsikukukutia nunse, tondo nkukusega utunguilile ku milondo mikeke mu kubota kuobe.

⁵ Kubuno tuamona buno wono muntu eli mukiti wa milondo, nu ekubika misona munkatini mua baYuda bansania beli mu kisi kinsania, nuwe u mukota wa meigisia ma baNazaleta:

⁶ we alondile kubigia numba za kukumbamina; bubo tuamukatile, nu tuatundile kumusungia ku mulembe weitu.

⁷ Tondo Lusia mukota munene wa bita abasile, nu atugulusuidewe nunse,

⁸ aka­kizizie babo bamusongelagile buno bavue kuguli, uwe nti wamubuzia buno umenye bunsania butuamusongede.

⁹ Nubo baYuda beita­bizizie nu batendile buno, bubo buligo.

¹⁰ Nu muangati amutengezezie kuboko buno atende, nu Paolo akuide bune, Kubuno nizi uli ngatu mu kilongo kikino miaka mingi, ukinsa nkukusambalila milondo zane na mbogimbogi:

¹¹ wizi nu uwe buno tagetinga bindi ikumi na bibili naganibakamina kukumbamina ku Yelusalema:

¹² nu babano tabamonine ku­nkuenda na muntu miango aba kukita mulubu mu numba za kukumbamina, aba mu numba za misanganano, aba mu muino.

¹³ Aba tabanavuama kulolesia bumozi buligo bubansongelede kano kaluma.

¹⁴ Tondo kitondo kikino nkukitabizia ku Nzila zezo zibakumana buno, kingo kikanga, nkukumbamina Kalaga wa batate­isue, nu nkukatizia bunsania buasanzilue mu mulembe, nu bua balengania;

¹⁵ nkubezaga na kilemanizio ku Kalaga anga nubo bubakuitabizia, buno kuli iyukilo lia beisanana, nu lia bateisanana.

¹⁶ Mu bubuno nagomia, kuba na kalenganio kuteli bubi ku Kalaga nu ku bantu bindi binsania.

¹⁷ Nu gese gatinga miaka mingi naganivuila na mitebe nu nkaso ku kilongo kia kueitu:

¹⁸ baYuda bamozi batukaga ku Asia bansangile nise nengibua mu numba za kukumbamina, nu takuabezaga musanganano, aba kazege—

¹⁹ ubu­bavua kuguli buno bansongele, ndi beli na bubembelede nabo.

²⁰ Aba ndi bantu babano bebenyene bantende mibi mikizi ziba­monine kuzo ganemanine ku bakazi ba luango,

²¹ tugu kuiyuki limozi linasambede ganemene munkatini, muabo, ku kabamba keiyukilo lia bakuzi nasungibua kumuli lelo.

²² Tondo Feliki, kukumenya bua Nzila zeno, abatendile bune, Gavue Lusia mukota munene wa bita, uganatule mulondo weinyu.

²³ Nu akakizizie mulangi bune, Langa Paolo tondo ntumukande aba ntuzugile beida bage kumukitila.

Paolo Eli ku Feliki Lingo.

²⁴ Tondo gatingile bindi bimozi, Feliki gavule na Dusila muki­kulu wage, wabezaga muYuda, amanine Paolo, amunguilile ku bukatizio mu Klisto Yesu.

²⁵ Nu Paolo gatendaga musagu wa kuisanana nu wa kuisungula, nu wa lusungio lukavua, Feliki akule boba, nu amuakuide bune, Enda kano kaluma; kuingo nkungu nakumane kuane.

²⁶ Tondo akengede buno Paolo amukase bikulo buno amukandule: kubuno eitide kumumana nu kusambala nage.

²⁷ Tondo gatingile miaka ibili, Pokio Festo uwasigede na mulimo wa Feliki; nu Feliki ku kutunda kubogiabogia baYuda, asigile Paolo ku kikando.